ai study
AI study app China : आजच्या काळात आर्टिफिशियल इंटेलिजन्स फक्त मोठ्या इंजिनिअर्स किंवा प्रोग्रामर्सपुरता मर्यादित राहिलेला नाही. याचे सर्वात मोठे उदाहरण चीनमधील १३ वर्षांची विद्यार्थिनी झू शुहान (Zhu Shuhan) आहे. आश्चर्याची गोष्ट म्हणजे तिला अजिबात कोडिंग येत नव्हती, तरीही तिने AI च्या मदतीने एक असे स्टडी ॲप तयार केले, ज्याने लॉन्च झाल्यानंतर अवघ्या तीन दिवसांत सुमारे २.५ लाख रुपयांची कमाई केली.
झू शुहान शांघायमधील एका ज्युनिअर सेकंदरी शाळेत शिकते. आई-वडील कामात व्यस्त असताना अनेक मुले अभ्यासाच्या वेळी मोबाईल वापरतात किंवा आपली जागा सोडतात, हे तिने अनुभवले. स्वतः तिच्यासोबतही असेच होत होते. या समस्येवर उपाय शोधण्यासाठी तिने एक असे AI ॲप बनवण्याचा निर्णय घेतला, जे मुलांच्या अभ्यासादरम्यान एका डिजिटल पालकाप्रमाणे लक्ष ठेवेल.
झूने आपल्या ॲपचे नाव ‘जाई चांग’ (Zai Chang) ठेवले आहे, ज्याचा अर्थ “जागीच उपस्थित” असा होतो. या ॲपमध्ये पालक त्यांचा एक फोटो अपलोड करतात. त्यानंतर AI त्या फोटोनुसार पालकांचे एक व्हर्च्युअल रूप तयार करतो. मूल अभ्यास करत असताना कॅमेरा त्याच्या हालचालींवर लक्ष ठेवतो. जर मूल मोबाईल वापरू लागले किंवा जागेवरून उठले, तर AI त्याच व्हर्च्युअल पालकांच्या आवाजात त्याला अभ्यासावर लक्ष केंद्रित करण्याची आठवण करून देतो. अभ्यास संपल्यानंतर ॲप मुलाच्या एकाग्रतेचा आणि अभ्यास केलेल्या वेळेचा अहवाल देखील तयार करतो.
हे ॲप ऑगस्टमध्ये हांगझोउ येथे आयोजित राष्ट्रीय AI उत्पादन मार्केटिंग स्पर्धेत सादर करण्यात आले. या स्पर्धेत ५० हून अधिक स्पर्धकांनी सहभाग घेतला होता. येथे विजेत्यांची निवड तांत्रिक तपासणीच्या आधारावर नाही, तर त्यांच्या AI उत्पादनाच्या विक्रीच्या आधारावर करण्यात आली.
झूच्या ॲपला तीन दिवसांत ९० ऑर्डर्स मिळाले आणि त्यातून सुमारे १८,००० युआन म्हणजेच जवळपास २.५ लाख रुपयांची विक्री झाली. या शानदार कामगिरीसाठी तिला स्पर्धेत तिसरे स्थान मिळाले आणि सुमारे ७० हजार रुपयांचे रोख पारितोषिकही मिळाले.
सर्वात रंजक गोष्ट म्हणजे झू शुहानने स्वतः कोणतेही प्रोग्रामिंग केलेले नाही. तिने सांगितले की, तिने आपली कल्पना एका मोठ्या AI लँग्वेज मॉडेलला समजावून सांगितली. AI ने त्याच आधारावर ॲपचा कोड तयार करण्यास मदत केली. डिझाईनपासून मुख्य फीचर्स तयार करण्यापर्यंतचे संपूर्ण काम फक्त ३ ते ४ दिवसांत पूर्ण झाले. झूचे म्हणणे आहे की, या अनुभवावरून तिला समजले की जर एखाद्याकडे चांगली कल्पना असेल, तर AI ती प्रत्यक्षात आणण्यासाठी मोठी मदत करू शकते.
झू शुहानचे म्हणणे आहे की, लोकांची आवड अशीच कायम राहिली, तर ती हे ॲप अधिक चांगले बनवेल आणि कमी किंमतीत जास्तीत जास्त लोकांसाठी उपलब्ध करून देईल. AI चा योग्य वापर मुलांची अभ्यास करण्याची पद्धत सोपी आणि शिस्तबद्ध बनवू शकतो, असा तिचा विश्वास आहे.
१३ व्या वर्षी कोडिंग न शिकता लाखो रुपये कमावणारी झू शुहानची ही गोष्ट हे दाखवून देते की, AI च्या काळात केवळ तांत्रिक ज्ञानच नाही, तर एक चांगली कल्पना देखील मोठी यश मिळवून देऊ शकते. तिची ही कामगिरी जगभरातील विद्यार्थ्यांसाठी एक नवी प्रेरणा ठरत आहे.
.png "Videos"){kind=small}
