उच्चशिक्षणात डिजिटल परिवर्तनाची गती! मंत्री चंद्रकांत पाटील यांचे मुंबईतील कार्यक्रमात निर्देश

महाराष्ट्रातील उच्च व तंत्रशिक्षण मंत्री चंद्रकांत पाटील यांनी सर्व विद्यापीठांना पुढील 15 दिवसांत एकत्रित डिजिटल डॅशबोर्ड परिपूर्ण करण्याचे निर्देश दिले.

• डिजिटल परिवर्तनाला गती
• डॅशबोर्ड पुढील 15 दिवसांत पूर्णपणे परिपूर्ण करणे बंधनकारक
• विद्यापीठांनी आपल्या दैनंदिन कामकाजाचा नियमित आढावा घेणे आवश्यक

महाराष्ट्रातील उच्च व तंत्रशिक्षण व्यवस्थेत डिजिटल परिवर्तनाला गती देण्यासाठी आणि ‘विकसित महाराष्ट्र दृष्टीक्षेप 2047’ साध्य करण्यासाठी राज्यातील सर्व विद्यापीठांनी अधिक ठोस पावले उचलावीत, असे स्पष्ट निर्देश उच्च व तंत्रशिक्षण मंत्री चंद्रकांत पाटील यांनी दिले. प्राध्यापक भरती प्रक्रिया, शैक्षणिक गुणवत्ता, प्रशासनिक कामकाज आणि विद्यापीठांच्या एकूण कार्यक्षमतेत पारदर्शकता आणण्यासाठी तयार करण्यात आलेला एकत्रित डिजिटल डॅशबोर्ड पुढील 15 दिवसांत पूर्णपणे परिपूर्ण करणे बंधनकारक असल्याचेही त्यांनी अधोरेखित केले. ‘विकसित महाराष्ट्र दृष्टीक्षेप 2047 व उच्च शिक्षणातील शैक्षणिक परिवर्तन: विद्यापीठांची भूमिका व योगदान’ या विषयावर मुंबई विद्यापीठात आयोजित परिषदेत ते बोलत होते. मंत्री पाटील यांनी सांगितले की, राज्यातील सर्व विद्यापीठांच्या कामकाजाचे एकत्रित निरीक्षण आणि साहित्यिक-सांख्यिक आकलन एका ठिकाणी उपलब्ध करून देणारा हा डॅशबोर्ड उच्च शिक्षणातील सुधारणा अधिक वेगवान आणि प्रभावी करणार आहे. (Accelerating digital transformation)

बक्कळ पैसा कामवायचाय? मग बना स्पोर्ट्स फिजिओथेरपिस्ट! पैसेच पैसे

डॅशबोर्ड वेळेत पूर्ण करण्यासाठी दोन सदस्यांची स्वतंत्र समर्पित टीम प्रत्येक विद्यापीठासाठी नियुक्त करण्यात येणार आहे. ही टीम प्रत्यक्ष विद्यापीठात भेट देऊन माहितीची सत्यता तपासेल आणि आवश्यक ते मार्गदaर्शन करेल. यामुळे डॅशबोर्डवरील सर्व आकडेवारी अचूक, निदोष आणि अद्ययावत राहण्यास मदत होईल, असेही मंत्री पाटील यांनी सांगितले. विद्यापीठांनी आपल्या दैनंदिन कामकाजाचा नियमित आढावा घेणे आवश्यक असून, डिजिटल प्रक्रियेमुळे निर्णयप्रक्रिया अधिक गतिमान होईल, असा विश्वास त्यांनी व्यक्त केला.

उच्च शिक्षण विभागाकडून दर तीन महिन्यांनी एकात्मिक आढावा बैठक आयोजित करण्यात येणार आहे. या बैठकीत डॅशबोर्डची स्थिती, प्रलंबित मुद्दे, प्रगतीचा वेग आणि आवश्यक सुधारणा याची सविस्तर चर्चा केली जाईल. यामुळे विद्यापीठांमधील प्रशासनिक कामकाज अधिक सक्षम, शिस्तबद्ध आणि परिणामकारक होणार असल्याचे पाटील यांनी नमूद केले. याचबरोबर, वंदे मातरम् गीताला 150 वर्ष पूर्ण होत असल्याने सर्व विद्यापीठांनी विशेष सांस्कृतिक व शैक्षणिक उपक्रमांचे आयोजन करावे, असे आवाहनही त्यांनी केले. विद्यार्थ्यांमध्ये राष्ट्रभावना, संस्कृतीविषयक जाणीव आणि सहभागाची भावना वाढावी यासाठी हे उपक्रम महत्त्वाचे ठरणार असल्याचे त्यांनी स्पष्ट केले.

प्रथम येणाऱ्यास प्रथम प्राधान्य! प्रवेश प्रक्रियेला सुरुवात, शिकून घ्या ‘चित्रपट निर्मिती करणे’

अपर मुख्य सचिव रेड्डी यांनी डॅशबोर्डच्या अचूकतेवर विशेष भर देत सांगितले की, कोणतीही त्रुटी, विसंगती अथवा माहितीचा अभाव राहणार नाही याची विद्यापीठांनी काळजी घ्यावी. सर्व माहिती डॅशबोर्डवर एकाच ठिकाणी उपलब्ध असेल याची खात्री करा, आणि प्रत्येक विद्यापीठाने आपला डॅशबोर्ड तपशीलवार तपासून त्यातील कमतरता तातडीने दूर करावी, असे त्यांनी सुचवले. तसेच, सर्व प्रलंबित मुद्दे 30 नोव्हेंबरपर्यंत निकाली काढण्याचे निर्देशही त्यांनी स्पष्टपणे दिले. राज्यभरात उच्च शिक्षणातील डिजिटल पारदर्शकता वाढवण्यासाठी, प्राध्यापक भरती प्रक्रियेला गती देण्यासाठी आणि शैक्षणिक गुणवत्तेचे उन्नयन करण्यासाठी हा डॅशबोर्ड आगामी काळात केंद्रबिंदू ठरणार असून, 30 नोव्हेंबर हा विद्यापीठांसाठी अत्यंत निर्णायक कालावधी ठरणार आहे. डिजिटल प्रणालीमुळे विद्यापीठांचे कामकाज अधिक पारदर्शक, सुव्यवस्थित आणि गुणवत्तापूर्ण होईल, आणि 2047 च्या विकसित महाराष्ट्राच्या दृष्टीकोनाचे लक्ष्य साध्य करण्यासाठी हे एक महत्त्वपूर्ण पाऊल ठरणार असल्याचेही बैठकीत अधोरेखित करण्यात आले.