सी-टीईटी 2026 साठी अर्ज प्रक्रिया सुरू! ‘या’ तारखेपर्यंत करता येईल अर्ज

सी-टीईटी 2026 साठी अर्ज प्रक्रिया सुरू झाली असून अर्जाची अंतिम तारीख 18 डिसेंबर 2025 आहे. परीक्षा 8 फेब्रुवारी 2026 रोजी होणार आहे.

• इच्छुक उमेदवारांना १८ डिसेंबर २०२५ पर्यंत अर्ज सादर करण्याची संधी
• ८ फेब्रुवारी २०२६ रोजी ही परीक्षा
• २०२६ साठी अर्ज भरण्याची प्रक्रिया सुरू

केंद्रीय शिक्षक पात्रता परीक्षा (सी-टीईटी) २०२६ साठी अर्ज भरण्याची प्रक्रिया सुरू झाली आहे. राज्यात नुकतीच टीईटी परीक्षा घेतल्यानंतर आता केंद्रीय माध्यमिक शिक्षण मंडळ (CBSE) येत्या ८ फेब्रुवारी २०२६ रोजी ही परीक्षा घेणार आहे. इच्छुक उमेदवारांना १८ डिसेंबर २०२५ पर्यंत अर्ज सादर करण्याची संधी देण्यात आली आहे. महाराष्ट्रासह देशभरातील शिक्षकांना शिक्षक पात्रता परीक्षा उत्तीर्ण करणे बंधनकारक ठरविणाऱ्या सर्वोच्च न्यायालयाच्या निर्णयानंतर या परीक्षेबाबत उमेदवारांमध्ये मोठी उत्सुकता पाहायला मिळत आहे. (Application process for C-TET 2026 begins)

कॉम्प्रेहेन्सिव्ह मॉड्यूलर सर्व्हे एज्युकेशन २०२५ जाहीर! महाराष्ट्रातील प्रति विद्यार्थी सरासरी खर्च ‘इतका’

अलीकडेच राज्य परीक्षा परिषदेमार्फत आयोजित करण्यात आलेल्या टीईटी परीक्षेला अपेक्षेपेक्षा जास्त प्रतिसाद मिळाला. हजारो उमेदवारांनी या परीक्षेसाठी हजेरी लावल्यामुळे पुढील सी-टीईटी परीक्षेलाही मोठी गर्दी राहणार असल्याचे स्पष्ट झाले आहे. सीबीएसईने जारी केलेल्या अधिसूचनेनुसार २७ नोव्हेंबर ते १८ डिसेंबर २०२५ या कालावधीत उमेदवारांना ऑनलाईन अर्ज भरता येणार आहेत.

सी-टीईटी परीक्षा देशभरातील प्रमुख शहरांमध्ये घेण्यात येते. या दोन पेपरांच्या परीक्षेत पेपर १ हा प्रामुख्याने इयत्ता १ ते ५ पर्यंतच्या शिक्षक पात्रतेसाठी तर पेपर २ इयत्ता ६ ते ८ पर्यंतच्या शिक्षकपदांसाठी असतो. यंदाच्या परीक्षेसाठी फीमध्ये देखील कोणताही बदल करण्यात आलेला नसल्याचे सीबीएसईने स्पष्ट केले आहे.

शुल्क संरचना

सर्वसाधारण संवर्ग :

• पेपर १ – ₹१०००
• दोन्ही पेपर – ₹१२००

SC/ST संवर्ग :

• पेपर १ – ₹५००
• दोन्ही पेपर – ₹६००

उमेदवारांना अधिकृत संकेतस्थळ ctet.nic.in वर जाऊन ऑनलाईन अर्ज भरावा आणि शुल्क भरावे लागेल. अर्ज भरताना उमेदवारांनी आपली वैयक्तिक माहिती, शैक्षणिक पात्रता, ओळखपत्र तसेच छायाचित्र आणि स्वाक्षरी योग्य स्वरूपात अपलोड करणे आवश्यक आहे. अर्जात केलेली चूक पुढे दुरुस्त करता येणार नसल्याने सर्व माहिती काळजीपूर्वक भरावी, असा सल्ला दिला जात आहे. सी-टीईटी २०२६ च्या परीक्षेची वेळापत्रकही जाहीर करण्यात आले आहे. त्यानुसार पेपर २ सकाळी ९.३० ते दुपारी १२.०० या वेळेत घेण्यात येईल. तर पेपर १ दुपारी २.३० ते ५.०० या कालावधीत होणार आहे. परीक्षेचे प्रवेशपत्र (Admit Card) परीक्षा तारखेच्या काही दिवस आधी संकेतस्थळावर उपलब्ध करून दिले जाणार आहे.

मराठी शाळांचे अस्तित्व टिकवण्यासाठी प्रयत्न! ठाण्यात ‘मराठी शाळा कृती समिती’ची स्थापना

देशभरातील केंद्रीय शाळा, नवोदय विद्यालये, तसेच अनेक राज्य आणि खाजगी शाळांमध्ये शिक्षक पदासाठी सी-टीईटी हा आवश्यक पात्रतेचा निकष मानला जातो. त्यामुळे या परीक्षेला राष्ट्रव्यापी पातळीवर मोठे महत्त्व असून शिक्षक होऊ इच्छिणाऱ्या उमेदवारांसाठी ही परीक्षा करिअरमधील एक महत्त्वाची पायरी आहे. सीबीएसईने दिलेल्या माहितीनुसार, यंदा परीक्षा प्रक्रिया अधिक पारदर्शक, तांत्रिकदृष्ट्या सक्षम आणि उमेदवारांना सोयीस्कर होईल, यासाठी डिजिटल प्रणाली अधिक मजबूत करण्यात आली आहे. प्रश्नपत्रिका तयार करण्यापासून ते मूल्यमापनापर्यंतच्या प्रक्रियेत अनेक तांत्रिक सुधारणा करण्यात आल्या असून सर्व केंद्रांवर सुरक्षा मानके वाढवण्यात आली आहेत. सी-टीईटी हा शिक्षक होण्यासाठी आवश्यक असलेल्या गुणात्मक पात्रतेचा राष्ट्रीय मानदंड असल्यामुळे या परीक्षेत उत्तीर्ण होणे उमेदवारांसाठी महत्वाचे आहे. आगामी काही दिवसांत अर्ज भरण्याचा वेग वाढेल, अशी अपेक्षा व्यक्त केली जात असून योग्य पात्रता असलेल्या सर्व उमेदवारांनी निर्धारित मुदतीत अर्ज करण्याचे आवाहन सीबीएसईने केले आहे.