Yuva Shakti Samriddhi: कमाई सुरू होण्यापूर्वीच गुंतवणुकीचे ज्ञान! विद्यार्थ्यांसाठी ‘युवा शक्ती समृद्धी’ची सुरुवात

Yuva Shakti Samriddhi: कॅनरा रोबेको अॅसेट मॅनेजमेंट कंपनीने विद्यार्थ्यांमध्ये आर्थिक साक्षरता वाढवण्यासाठी ‘युवा शक्ती समृद्धी’ हा गुंतवणूकदार शिक्षण उपक्रम सुरू केला आहे.

• विद्यार्थ्यांना गुंतवणुकीचे धडे
• कॅनरा रोबेको AMCचा ‘युवा शक्ती समृद्धी’ उपक्रम सुरू
• SIP, STP, SWPचे धडे देणार कॅनरा रोबेको AMC

मुंबई : तरुण पिढीमध्ये आर्थिक साक्षरता वाढवून त्यांना करिअरच्या सुरुवातीपासूनच योग्य आर्थिक निर्णय घेण्यासाठी सक्षम करण्याच्या उद्देशाने कॅनरा रोबेको अॅसेट मॅनेजमेंट कंपनी लिमिटेड (Canara Robeco AMC) ने विद्यार्थी-केंद्रित गुंतवणूकदार शिक्षण उपक्रम ‘युवा शक्ती समृद्धी’ लाँच केला आहे.

कंपनीच्या माहितीनुसार, रोजगार किंवा व्यवसायाच्या माध्यमातून कमाई सुरू करण्यापूर्वीच विद्यार्थ्यांना बचत, गुंतवणूक आणि आर्थिक नियोजनाची मूलभूत माहिती मिळावी, हा या उपक्रमामागील प्रमुख उद्देश आहे. विद्यार्थ्यांमध्ये लहान वयापासून शिस्तबद्ध गुंतवणुकीची सवय निर्माण करून भविष्यासाठी मजबूत आर्थिक पाया तयार करण्यावर भर दिला जाणार आहे.

बारामतीत गणेश विसर्जन मिरवणूक शांततेत; अनेक मंडळांकडून यंदा साधेपणाने गणेशोत्सव साजरा

शैक्षणिक संस्थांमध्ये होणार कार्यशाळा

‘युवा शक्ती समृद्धी’ अंतर्गत विविध शैक्षणिक संस्थांमध्ये परस्परसंवादी कार्यशाळा आणि तज्ज्ञांची सत्रे आयोजित केली जाणार आहेत. गुंतवणुकीशी संबंधित संकल्पना विद्यार्थ्यांना सहज समजतील अशा भाषेत मांडण्याचा प्रयत्न केला जाणार आहे. विशेषतः म्युच्युअल फंड, बचत आणि गुंतवणूक नियोजनाबाबत असलेले सामान्य गैरसमज दूर करण्यावर या कार्यक्रमात भर असेल. विद्यार्थ्यांना भविष्यात उत्पन्न मिळण्यास सुरुवात झाल्यानंतर आर्थिक उद्दिष्टे निश्चित करणे आणि त्यानुसार शिस्तबद्ध पद्धतीने गुंतवणूक करण्यासाठी आवश्यक प्राथमिक माहिती दिली जाणार आहे.

‘कमाई सुरू होण्यापूर्वी आर्थिक शिक्षण आवश्यक’

कॅनरा रोबेको AMCचे व्यवस्थापकीय संचालक आणि मुख्य कार्यकारी अधिकारी रजनीश नरुला यांच्या म्हणण्यानुसार, आर्थिकदृष्ट्या जागरूक आणि जबाबदार पिढी घडवण्यासाठी तरुणांना गुंतवणुकीचा प्रवास लवकर सुरू करण्यास प्रोत्साहन देणे आवश्यक आहे.
विद्यार्थ्यांनी कमाई सुरू करण्यापूर्वीच गुंतवणूकदार शिक्षण घेतल्यास करिअरच्या सुरुवातीपासून योग्य आर्थिक निर्णय घेण्यास त्यांना मदत होऊ शकते. ‘युवा शक्ती समृद्धी’च्या माध्यमातून विद्यार्थ्यांसाठी गुंतवणुकीच्या संकल्पना सोप्या करून त्यांना भविष्यातील संपत्ती निर्मितीसाठी आवश्यक माहिती देण्याचा कंपनीचा प्रयत्न असल्याचे त्यांनी सांगितले.

SIP, STP आणि SWPवर विशेष भर

या उपक्रमात आर्थिक साक्षरतेसोबतच ‘3S’ अर्थात Systematic Investment Plan (SIP), Systematic Transfer Plan (STP) आणि Systematic Withdrawal Plan (SWP) या तीन महत्त्वाच्या संकल्पनांची माहिती विद्यार्थ्यांना दिली जाणार आहे. कॅनरा रोबेको AMCचे चीफ बिझनेस ऑफिसर गौरव गोयल यांच्या म्हणण्यानुसार, ‘सही सोच, सही सुरुवात, सही इन्व्हेस्टमेंट’ या तीन सवयी तरुणांमध्ये रुजवण्याचा उपक्रमाचा उद्देश आहे. आर्थिक उद्दिष्टांच्या नियोजनामध्ये SIP, STP आणि SWP कशा प्रकारे उपयोगी ठरू शकतात, याबाबतही विद्यार्थ्यांमध्ये जागरूकता निर्माण केली जाणार आहे.

देशभरातील विद्यार्थ्यांपर्यंत पोहोचण्याचा प्रयत्न

कॅनरा रोबेको AMCने हा कार्यक्रम देशभरातील शैक्षणिक संस्थांमध्ये विस्तारण्याचा मानस व्यक्त केला आहे. रोजगार किंवा व्यवसायात पदार्पण करण्यापूर्वी विद्यार्थ्यांना आर्थिक नियोजनाची ओळख करून देत त्यांना भविष्यात माहितीच्या आधारे गुंतवणुकीचे निर्णय घेण्यासाठी तयार करणे हा त्यामागील उद्देश आहे.

कंपनीने यापूर्वीही गुंतवणूकदार शिक्षणासाठी ‘निवेश बस यात्रा’, ‘3S रॅप साँग’ आणि महिलांसाठी ‘स्त्री शक्ती समृद्धी’ यांसारखे उपक्रम राबवल्याचे म्हटले आहे. या उपक्रमांच्या माध्यमातून आर्थिक साक्षरता आणि माहितीवर आधारित गुंतवणुकीला प्रोत्साहन देण्याचा प्रयत्न केला जात आहे.

Mumbai News: ‘श्रीगणेशा आरोग्याचा’ उपक्रमाला राज्यभर उत्स्फूर्त प्रतिसाद; ५३ हजार शिबिरांचे आयोजन