बुधवार, 23 सप्टेंबर 2026
फोटो सौजन्य- सोशल मीडिया
How To Become Bullet Train Driver In India: देशातील पहिल्या बुलेट ट्रेन प्रकल्पाबाबत म्हणजेच मुंबई-अहमदाबाद हाय स्पीड रेल कॉरिडोअरबाबत नागरिकांमध्ये प्रचंड उत्सुकता आहे. याच पार्श्वभूमीवर बुलेट ट्रेनचा ड्रायव्हर होण्यासाठी नेमकी कोणती प्रक्रिया असते, असा प्रश्न अनेक तरुणांच्या मनात निर्माण होत आहे. ‘नॅशनल हाय स्पीड रेल कॉर्पोरेशन लिमिटेड’ या संपूर्ण प्रकल्पाचे संचालन करत असून, याच संस्थेकडून बुलेट ट्रेन चालकांची म्हणजेच HSR पायलटची भरती केली जाते. या पदासाठी आवश्यक पात्रता, अर्ज प्रक्रिया आणि मिळणारा पगार याबाबतची सविस्तर माहिती आज आपण जाणून घेणार आहोत.
बुलेट ट्रेन चालवणाऱ्या व्यक्तीला सामान्य भाषेत ड्रायव्हर म्हटले जात असले, तरी अधिकृतपणे या पदाला HSR पायलट असे संबोधले जाते. हे पद थेट फ्रेशर्ससाठी (नवीन उमेदवारांसाठी) उपलब्ध नसते. यासाठी भारतीय रेल्वे आणि मेट्रो प्रणालीमध्ये आधीपासून कार्यरत असलेल्या अनुभवी कर्मचाऱ्यांना संधी दिली जाते. NHSRCL कडून थेट भरतीद्वारे रेल्वे आणि मेट्रोमधील योग्य व अनुभवी उमेदवारांची या पदासाठी निवड केली जाते.
अर्ज सादर केल्यानंतर उमेदवारांच्या कागदपत्रांची पडताळणी केली जाते. या टप्प्यात पात्र ठरलेल्या उमेदवारांना मुलाखतीसाठी बोलावले जाते. काही वेळेस भरती प्रक्रियेत लेखी परीक्षा किंवा इतर मूल्यमापन फेऱ्यांचाही समावेश केला जातो; त्यामुळे प्रत्येक भरतीची अधिकृत अधिसूचना काळजीपूर्वक वाचणे आवश्यक आहे. निवड झालेल्या उमेदवारांना हाय-स्पीड ट्रेनच्या संचालनातील तांत्रिक बारकावे समजण्यासाठी विशेष प्रशिक्षण दिले जाते.
बुलेट ट्रेन प्रकल्पाशी संबंधित सर्व भरती प्रक्रियांसाठी NHSRCL च्या अधिकृत संकेतस्थळावरून (nhsrcl.in) अर्ज करावा लागतो. जेव्हा जेव्हा HSR पायलट किंवा इतर पदांची भरती निघते, तेव्हा त्याची सविस्तर माहिती आणि बातमी या संकेतस्थळाच्या ‘Career’ विभागात प्रसिद्ध केली जाते. इच्छुक उमेदवारांनी वेळोवेळी या वेबसाईटला भेट देणे गरजेचे आहे.
बुलेट ट्रेन चालकाचा पगार हा त्यांचा अनुभव आणि सेवा ज्येष्ठतेनुसार ठरवला जातो. नुकत्याच झालेल्या भरती प्रक्रियेनुसार, या पदासाठी दरमहा ₹४०,००० ते ₹१,१०,००० किंवा त्याहून अधिक वेतन दिले जाते, ज्यामध्ये इतर विविध भत्त्यांचाही समावेश असतो.
भारतीय रेल्वेतील सामान्य लोको पायलटला मिळणाऱ्या सरासरी पगाराच्या (सुमारे ₹५९,८०० प्रति महिना) तुलनेत हे वेतन अत्यंत आकर्षक मानले जाते. त्यामुळेच रेल्वे आणि मेट्रोमधील अनेक अनुभवी लोको पायलट व ट्रेन ऑपरेटर या पदासाठी अर्ज करण्यास उत्सुक आहेत.
