Mumbai University : अपार आयडीशिवाय हॉलतिकीट नाही; १९-२० ऑगस्टला मुंबई विद्यापीठाचे विशेष शिबिर

Mumbai University : मुंबई विद्यापीठाने परीक्षेच्या हॉलतिकिटासाठी APAAR ID अनिवार्य केला आहे. APAAR ID, ABC ID लिंकिंग आणि आधारशी संबंधित अडचणी दूर करण्यासाठी विद्यापीठातर्फे १९ आणि २० ऑगस्ट रोजी विशेष सुविधा शिबिर आयोजित करण्यात आले आहे.

• अपार आयडी शिवाय हॉलतिकीट नाही
• अपार आयडी, एबीसी आयडी लिंकिंग,आधारविषयक अडचणी दूर करण्यासाठी १९ व २० ऑगस्टला शिबिर

नीता परब Mumbai University : आगामी परीक्षांचे हॉलतिकीट तयार करण्यासाठी अपार आयडी अनिवार्य करण्यात आले असून, अपार आयडीशिवाय विद्यार्थ्यांचे हॉलतिकीट तयार होणार नाही, असा महत्वपूर्ण निर्णय मुंबई विद्यापीठाने घेतला आहे. त्यामुळे ज्या विद्यार्थ्यांनी अद्याप अपार आयडी तयार केलेला नाही किंवा अपार आयडी, एबीसी आयडी लिंकिंग अथवा आधार प्रमाणीकरणासंदर्भात अडचणी येत आहेत, त्यांनी या समस्यांचे तातडीने निराकरण करून घ्यावे, असे आवाहन विद्यापीठ प्रशासनाने केले आहे.

मादाम कामा महिला वसतिगृहातील पाणीप्रश्नावर अभाविप आक्रमक; ‘आश्वासन नको, कृती हवी’, विद्यार्थिनींच्या तक्रारींकडे दुर्लक्षाचा आरोप

अपार आयडी, एबीसी आयडी लिंकिंग,आधारविषयक अडचणी दूर करण्यासाठी १९ व २० ऑगस्टला शिबिर

विद्यार्थ्यांच्या या अडचणींचे निराकरण करण्यासाठी परीक्षा व मूल्यमापन मंडळाच्या संचालकांच्या समन्वयाने मुंबई विद्यापीठाच्या कलिना कॅम्पस येथील अल्केश दिनेश मोदी इन्स्टिट्यूट फॉर फायनान्शियल अँड मॅनेजमेंट स्टडीज येथे विशेष आधार सुविधा शिबिराचे आयोजन करण्यात आले आहे. हे शिबिर १९ व २० ऑगस्ट २०२६ रोजी सकाळी १० ते सायंकाळी ४ वाजेपर्यंत आयोजित करण्यात आले आहे.

अपार आयडी तयार करणे, अपार आयडी आणि शैक्षणिक बँक ऑफ क्रेडिट्स (एबीसी) आयडी लिंक करणे, आधार प्रमाणीकरण, आधारशी जोडलेल्या मोबाईल क्रमांकातील तफावत, नाव अथवा जन्मतारखेतील तफावत तसेच आधारशी संबंधित इतर समस्यांचे निराकरण या शिबिरामध्ये करण्यात येणार आहे.

मुंबई हायकोर्ट लिपिक टायपिंग टेस्टमध्ये कल्याण केंद्रावर गोंधळ; विद्यार्थ्यांचे आंदोलन, पुनर्परीक्षेची मागणी

अपार आयडी शिवाय हॉलतिकीट नाही

अपार आयडी हा विद्यार्थ्यांच्या शैक्षणिक नोंदी, शैक्षणिक क्रेडिट्स आणि परीक्षा प्रक्रियेच्या दृष्टीने अत्यंत महत्त्वाचा आहे. त्यामुळे ज्या विद्यार्थ्यांना अपार आयडी तयार करण्यास किंवा त्यासंबंधी अन्य प्रक्रिया पूर्ण करण्यास अडचणी येत आहेत, त्यांनी या विशेष सुविधा शिबिराचा लाभ घ्यावा असे विद्यापीठाने आवाहन केले आहे.

विद्यार्थ्यांनी शिबिरास येताना आधार कार्ड तसेच समस्येच्या निराकरणासाठी आवश्यक संबंधित कागदपत्रे व तपशील सोबत आणावेत. संलग्न महाविद्यालये व संस्थांनी अपार आयडीसंदर्भात अडचणी असलेल्या विद्यार्थ्यांना या शिबिराची माहिती देऊन त्यांचा जास्तीत जास्त सहभाग नोंदवावा असे आवाहन करण्यात आले आहे.