राज्य कौशल्य विद्यापीठामुळे रोजगाराच्या अधिक संधी उपलब्ध: कौशल्य विकास मंत्री मंगल प्रभात लोढा

वर्ल्ड ट्रेड सेंटर येथे कौशल्य रोजगार,उद्योजकता व नाविन्यता विभागामार्फत महाराष्ट्र राज्य कौशल्य विद्यापीठामार्फत शिक्षकदिनानिमित्त गुरूवंदना कार्यक्रमाचे आयोजन करण्यात आले होते. त्यावेळी राज्याचे कौशल्य विकास मंत्री मंगल प्रभात लोढा यांनी कौशल्य विद्यापिठामुळे रोजगाराच्या अधिक संधी उपलब्ध होत आहे असे मत व्यक्त करत विद्यापिठाचे कौतुक केले.

महाराष्ट्र राज्य कौशल्य विद्यापीठाच्या माध्यमातून विद्यार्थ्यांना विविध नाविन्यपूर्ण कौशल्य विकसीत केले जात आहे आणि त्यामुळे रोजगाराच्या संधी अधिक प्रमाणात उपलब्ध होत आहेत हे या विद्यापीठाचे यश आहे असे मत कौशल्य विकास मंत्री मंगल प्रभात लोढा यांनी व्यक्त केले.

वर्ल्ड ट्रेड सेंटर येथे कौशल्य रोजगार,उद्योजकता व नाविन्यता विभागामार्फत महाराष्ट्र राज्य कौशल्य विद्यापीठामार्फत शिक्षकदिनानिमित्त गुरूवंदना कार्यक्रमाचे आयोजन करण्यात आले होते.या कार्यक्रमात कौशल्य विकास मंत्री मंगल प्रभात लोढा बोलत होते.यावेळी महाराष्ट्र कौशल्य विद्यापीठाच्या कुलगूर प्रा.डॉ.अपूर्वा पालकर,महाराष्ट्र राज्य नाविन्यता सोसायटीचे उपमुख्य कार्यकारी अधिकारी विकास नाईक,अतिरिक्त आयुक्त अनिल सोनावणे, वर्ल्ड ट्रेड सेंटर चे चेअरमन विजय कलंत्री,रजिस्टार राजेंद्र तलवारे,अमृत योजनेचे व्यवस्थापकीय संचालक विजय जोशी यावेळी उपस्थित होते.

विद्यापीठ आणि खासगी संस्थामध्ये समन्वय उत्तम त्यामुळे रोजगाराच्या विविध संधी उपलब्ध

मंत्री श्री.लोढा म्हणाले की, महाराष्ट्र राज्य कौशल्य विद्यापीठाच्या कुलगुरू या आदर्श गुरू आहेत नुकत्याच झालेल्या जळगाव येथील कार्यक्रमात प्रधानमंत्री नरेंद्र मोदी यांनी डॉ.अपूर्वा पालकर यांच्या कार्याचा उल्लेख केला आहे.आजच्या काळात रोजगाराच्या संधी उपलब्ध होण्यासाठी कुशल मनुष्यबळाची आवश्यकता आहे.सरकारी क्षेत्रांत रोजगाराच्या मर्यादित संधी उपलब्ध आहेत.तर खासगी क्षेत्रांमध्ये विकसित कौशल्याची आवश्यकता असते. विद्यापीठ आणि खासगी संस्थामध्ये समन्वय उत्तमरीत्या साधला जात आहे त्यामुळे रोजगाराच्या विविध संधी उपलब्ध होत आहेत. कौशल्य विद्यापीठाचे काम उत्तमरीत्या होत आहे. जे विद्यार्थी कौशल्य विद्यापीठामधून शिकून पुढे जाणार आहेत त्या सर्वांना मी हेच सांगेन, आतापासूनच स्टार्ट अप साठी पुढील संधीचा विचार आणि आखणी करायला लागा. काळानुरूप कौशल्य विकसित करा असेही मंत्री श्री.लोढा म्हणाले.

नावीन्यपूर्ण दिशेने वाटचाल करण्यासाठी प्रशिक्षण खूप महत्वाचे

इन्स्टिट्यूट ऑफ केमिकल टेक्नॉलॉजी (आय सी टी) तसेच मराठी विज्ञान परिषदेचे शास्त्रज्ञ डॉ.जे. बी. जोशी म्हणाले की, देशाचे उत्पादन वाढण्यामध्ये सेवा क्षेत्राचा मोलाचा वाटा आहे.जगात एकूण दीड कोटीहून अधिक उद्योग आहेत.आपल्या देशाला दहा कोटी नोकऱ्यांची आवश्यकता आहे. भारताने नवनिर्मिती करण्याकडे लक्ष दिले पाहिजे, त्यामुळे तरुणांना काम मिळेल आणि देश विकासाकडे वाटचाल करेल. शेतीमध्ये कमी धारण क्षेत्रामध्ये अधिकाधिक उत्पन्न कसे घेता येईल यावर नावीन्यपूर्ण विचार केला तर शेतकऱ्यांना मदत होईल.आपल्यासमोर असणाऱ्या प्रश्नांवरती नाविन्यपूर्ण उत्तर काढण्याने अनेक स्टार्टअप सुरू होतील तसेच रोजगाराच्या संधी उपलब्ध होतील.नावीन्यपूर्ण दिशेने वाटचाल करण्यासाठी प्रशिक्षण खूप महत्वाचे आहे.

आदर्श शिक्षक,फेलोशिप प्राप्त विद्यार्थ्यी व विविध संस्थाचा सत्कार

कौशल्य विद्यापीठ विविध संस्थांसोबत जोडले गेलेले असून विद्यापीठाने मुलांच्या उज्ज्वल भविष्यासाठी अनेक नाविन्यपूर्ण उपक्रम राबविले आहेत. महाराष्ट्र राज्य कौशल्य विद्यापीठाच्या संबंधित कौशल मित्रा,संचीती हेल्थकेअर अकॅडमी, झुडियो, मॅकडोनाल्ड, वर्ल्ड ट्रेड सेंटर यांच्या प्रतिनिधींचा या समारंभ सत्कार करण्यात आला. तसेच विदयार्थ्यांच्या कौशल्य वृध्दीसाठी कार्यरत असलेल्या अमर सक्सेना, आदिती काळे, भूपेंद्र कौर, सुनील जोशी, प्रतीक नार्वेकर व वसुधा जाधव शिक्षकांचा या कार्यक्रमात सत्कार करण्यात आला. अमृत उद्योगिकता विकास योजनेअंतर्गत निवडक १५ स्टार्टअपला प्रति तीन लाख रुपये विद्यावेतन पत्र यावेळी वितरित केले गेले.नरवाडे कट्यालिस्ट ,कॅश फ्री मेट्रो, माय बोर्ड यांच्या सोबत महाराष्ट्र राज्य कौशल्य विद्यापीठ यांनी सामंजस्य करार केले.