student visa
UK student visa maintenance fund 2026 : युकेत जाऊन शिक्षण घेण्याची तयारी करणाऱ्या भारतीय विद्यार्थ्यांसाठी एक महत्त्वाची अपडेट समोर आली आहे. ३० नोव्हेंबर २०२६ पासून युकेच्या स्टुडंट व्हिसासाठी अर्ज करणाऱ्या आंतरराष्ट्रीय विद्यार्थ्यांना पूर्वीपेक्षा अधिक रकमेचा निधी (फंड) दाखवावा लागणार आहे. युके होम ऑफिसने ३ सप्टेंबर २०२६ रोजी इमिग्रेशन नियमांमध्ये बदल केले असून, त्याअंतर्गत विद्यार्थ्यांसाठी आवश्यक मेंटेनेंस फंड वाढवण्यात आला आहे.
या बदलाचा परिणाम युकेमध्ये शिक्षणासाठी स्टुडंट व्हिसा अर्ज करणाऱ्या विद्यार्थ्यांवर होईल. ही रक्कम विद्यार्थ्यांना युके सरकारकडे जमा करावी लागत नाही, तर अभ्यासादरम्यान राहण्याचा व दैनंदिन खर्च भागवण्यासाठी आपल्याकडे पुरेसा पैसा उपलब्ध आहे, हे त्यांना सिद्ध करावे लागते. हा खर्च ट्यूशन फीपेक्षा पूर्णपणे वेगळा असेल.
नवीन नियम लागू झाल्यानंतर लंडनमध्ये शिकणाऱ्या विद्यार्थ्यांना दरमहा १,५७० ब्रिटिश पाउंड (अंदाजे २.०१ लाख रुपये) मेंटेनेंस फंड दाखवावा लागेल. सध्या ही रक्कम १,५२९ ब्रिटिश पाउंड (अंदाजे १.९५ लाख रुपये) आहे. विद्यार्थ्यांना कमाल ९ महिन्यांच्या राहण्याचा खर्च दाखवावा लागतो. त्यानुसार लंडनसाठी कमाल रक्कम १४,१३० ब्रिटिश पाउंड होईल, जी भारतीय चलनात सुमारे १८.०६ लाख रुपयांच्या घरात जाईल. सध्या ९ महिन्यांसाठी ही रक्कम १३,७६१ ब्रिटिश पाउंड आहे.
युकेमध्ये लंडनच्या बाहेर शिक्षण घेणाऱ्या विद्यार्थ्यांसाठीही मेंटेनेंस रिक्वायरमेंट वाढवण्यात आली आहे. सध्या दरमहा १,१७१ ब्रिटिश पाउंड रक्कम दाखवावी लागते, जी ३० नोव्हेंबरपासून वाढून १,२०३ ब्रिटिश पाउंड होईल. ९ महिन्यांनुसार कमाल रक्कम १०,८२७ ब्रिटिश पाउंड असेल. सध्याच्या नियमांत ही रक्कम १०,५३९ ब्रिटिश पाउंड आहे. म्हणजेच ९ महिन्यांसाठी २८८ ब्रिटिश पाउंडची वाढ झाली आहे.
स्टुडंट व्हिसा अंतर्गत मेंटेनेंस फंडचा उद्देश युकेमध्ये राहताना विद्यार्थी स्वतःचा खर्च उचलू शकतो हे दाखवणे हा आहे. ही रक्कम ट्यूशन फी, व्हिसा फी आणि इमिग्रेशन हेल्थ सरचार्जपेक्षा वेगळी असेल. विद्यार्थ्यांना सहसा त्यांच्या अभ्यासक्रमाच्या कालावधीनुसार राहण्याचा खर्च दाखवावा लागतो, मात्र याची कमाल मर्यादा ९ महिने आहे. अभ्यासक्रम ९ महिन्यांपेक्षा कमी असल्यास, संबंधित कालावधीसाठीच रक्कम दाखवावी लागेल.
नवीन आणि जुन्या नियमांमधला तारखेचा फरक महत्त्वाचा आहे. ३० नोव्हेंबर २०२६ पूर्वी दाखल केलेले अर्ज २९ नोव्हेंबर रोजी लागू असलेल्या इमिग्रेशन नियमांनुसार तपासले जातील. तर ३० नोव्हेंबर किंवा त्यानंतर केलेल्या अर्जांवर नवीन मेंटेनेंस रिक्वायरमेंट लागू होईल. युके होम ऑफिसच्या मते, ही वाढ २०२६-२७ साठी युकेच्या देशांतर्गत विद्यार्थ्यांना उपलब्ध असलेल्या मेंटेनेंस लोनच्या पातळीनुसार करण्यात आली आहे. होम ऑफिसने स्पष्ट केले आहे की, स्टुडंट रूटचा गैरवापर रोखण्याच्या उपायांचाच हा एक भाग आहे.
.png "Videos"){kind=small}
