मुंबई-पुणे मार्गावर ‘बर्निंग बस’चा थरार; पुण्याच्या दिशेने जाणाऱ्या बसला अचानक आग

बसमधील सर्व प्रवासी पूर्णपणे सुरक्षित आहेत. ही घटना रसायनी पोलिस ठाण्याच्या हद्दीत घडली आहे. चालत्या बसला अचानक एवढी भीषण आग लागण्यामागचे नेमके कारण अद्याप स्पष्ट झालेले नाही.

मुंबई : मुंबई-पुणे एक्स्प्रेसवेवर ‘बर्निंग बस’चा थरार पाहायला मिळाला. पनवेलजवळ किलोमीटर १६ च्या आसपास पुण्याच्या दिशेने जाणाऱ्या एका भरधाव प्रवासी बसला अचानक भीषण आग लागली. आगीने काही क्षणांतच रौद्ररूप धारण केल्याने एक्स्प्रेसवेवर काही काळ घबराटीचे वातावरण निर्माण झाले होते. मात्र, सुदैवाने सर्व प्रवाशांना वेळेतच बसमधून सुखरूप बाहेर काढण्यात आल्याने एक मोठा अनर्थ टळला आहे.

मुंबई-पुणे एक्स्प्रेसवेवर धावत्या बसमधून अचानक धूर आणि आगीचे लोळ येऊ लागल्याने गाडी थांबवण्यात आली. घटनेची माहिती मिळताच पनवेल आणि खोपोली नगर परिषदेचे अग्निशमन दल तसेच आयआरबीची ‘देवदूत’ रेस्क्यू टीम तत्काळ घटनास्थळी दाखल झाली. आगीची भीषणता पाहता अतिरिक्त गाड्याही मागवण्यात आल्या होत्या. अग्निशमन दलाच्या जवानांनी शर्थीचे प्रयत्न करत काही वेळातच या भीषण आगीवर पूर्णपणे नियंत्रण मिळवले. दरम्यान, काहीकाळ मार्गावर वाहतूक थांबवली होती. दुर्घटनेत बस जळून खाक झाली असली तरी, यात कोणतीही जीवितहानी झालेली नाही, ही सर्वात मोठी दिलासादायक बाब आहे.

Mumbai-Pune Highway : जुना मुंबई-पुणे महामार्ग अंधारात! देहूरोड ते वडगाव फाट्यावरील बंद पथदिव्यांमुळे अपघाताचा धोका 

दरम्यान, बसमधील सर्व प्रवासी पूर्णपणे सुरक्षित आहेत. ही घटना रसायनी पोलिस ठाण्याच्या हद्दीत घडली आहे. चालत्या बसला अचानक एवढी भीषण आग लागण्यामागचे नेमके कारण अद्याप स्पष्ट झालेले नाही. सध्या पोलिसांकडून आगीच्या खऱ्या कारणांचा सविस्तर तपास केला जात आहे.

वाहतूक होती संथगतीने

या घटनेमुळे एक्स्प्रेसवेवरील वाहतूक काही काळासाठी संथगतीने सुरू होती. मात्र, आगीवर नियंत्रण मिळवल्यानंतर ती पूर्ववत करण्यात आली.

यापूर्वी पुण्यात घडली होती दुर्घटना

यापूर्वी, महाराष्ट्रातील पुणे जिल्ह्यातील दौंड तालुक्यात चौफुला-सुपा घाट मार्गावर बसचा अपघात झाला होता. ही महाराष्ट्र राज्य परिवहन महामंडळाची (एसटी) बस होती आणि ती शालेय विद्यार्थ्यांना घेऊन जात होती. १६ सप्टेंबर रोजी ही बस अचानक दरीत कोसळली, ज्यामध्ये १५ हून अधिक विद्यार्थी जखमी झाले होते. याबाबत यवत पोलीस ठाण्यात गुन्हा दाखल करण्यात आला.

बसचालकाविरोधात गुन्हा दाखल

आर्या इंद्रभान शितोळे यांनी दिलेल्या तक्रारीवरून, बसचालक राहुल त्र्यंबक मडावी याच्याविरुद्ध भारतीय न्याय संहितेच्या कलम २८१, १२५ (अ), १२५ (ब) आणि ३२४ (४) तसेच मोटार वाहन कायद्याच्या कलम १३४ आणि १७७ अन्वये गुन्हा दाखल करण्यात आला होता.