Crime News: पाच हजारांची लाच घेणाऱ्या पोलिसावर गुन्हा दाखल; नेमके प्रकरण काय?

याबाबत अधिक माहिती अशी की , तक्रारदार यांचेवर दौंड पोलीस स्टेशन येथे दाखल असलेल्या गु.र.नं. ८८२/२०२५ या. गुन्ह्यात त्यांची महिंद्रा जीप क्र. MH 42 / AS 6658 ही गाडी जप्त होती. तक्रारदार यांनी गुन्ह्यातील जप्त गाडी परत मिळण्यासाठी न्यायालयात अर्ज दाखल केला होता. त्या अर्जावर तपासी अधिकारी यांचे म्हणणे दाखल करण्यासाठी गुन्ह्याचे तपास अधिकारी लोकसेवक सहायक पोलीस निरीक्षक पाटील व लेखनिक पोलिस शिपाई रमेश करचे यांनी तक्रारदाराकडे १०,००० रुपयाची मागणी करुन, तडजोडीनंतर ५,००० रुपयाची लाच मागणी केल्याची तक्रार दि. ७  एप्रिल  रोजी तक्रारदार यांनी लाच लुचपत प्रतिबंधक विभाग पुणे  येथे दिली होती.

या प्राप्त तक्रारीच्या अनुषंगाने दि. ७ एप्रिल रोजी लोकसेवक पोलीस शिपाई रमेश करचे यांचेकडे पंचासमक्ष पडताळणी केली असता, त्यांनी तक्रारदाराविरुद्ध दाखल असलेल्या गुन्ह्यात जप्त करण्यात आलेली त्यांची महिंद्रा बोलेरो जीप ही न्यायालयातून परत मिळण्यासाठी तक्रारदाराने दाखल केलेल्या अर्जावर म्हणणे सादर केल्याचा मोबदला म्हणून लोकसेवक पोलिस शिपाई रमेश करचे यांनी तक्रारदाराकडे स्वतःसाठी व तपास अधिकारी सहा. पोलीस निरीक्षक पाटील यांचेसाठी सुरवातीस १०,००० रुपयाची लाचेची मागणी करुन, तडजोडीअंती ५,००० रुपयाची लाचेची मागणी केल्याचे निष्पन्न झाल्याने, लोकसेवक रमेश शिवाजी करचे याचेविरुद्ध आज दि. २९ मे रोजी दौंड पोलीस ठाण्यात  भ्रष्टाचार प्रतिबंध अधिनियम, सन १९८८ चे कलम ७, ७ अ अन्वये गुन्हा नोंद करण्यात आलेला आहे.

ही कारवाई पोलीस उप आयुक्त/पोलीस अधीक्षक शिरीष सरदेशपांडे, ला.प्र.वि. पुणे परिक्षेत्र, पुणे व अपर पोलीस अधीक्षक डॉ. शितल जानवे, ला.प्र.वि. पुणे यांचे मार्गदर्शनाखाली पुणे लाचलुचपत प्रतिबंधक विभागाने केली. लोकसेवक शासकीय अधिकारी / कर्मचारी किंवा त्यांच्यावतीने खाजगी इसम (एजंट) हे कोणतेही शासकीय काम करून देण्यासाठी कायदेशीर फी व्यतिरिक्त अन्य लाचेची मागणी करीत असल्यास त्याबाबत तात्काळ लाचलुचपत प्रतिबंधक विभाग पुणे कार्यालयास संपर्क साधण्याचे आवाहन ला.प्र.वि. वि. पुण्याचे पोलिस अधीक्षक शिरीष सरदेशपांडे यांनी केले आहे.याप्रकरणी पुढील तपास लाच लुचपत प्रतिबंधक विभागाचे पोलीस निरीक्षक  विजय पवार हे करीत आहेत.