सातबारा आणि फेरफार नोंदीसाठी लाचेची मागणी; महिला मंडल अधिकारी एसीबीच्या जाळ्यात

जमिनीच्या सातबारा उताऱ्यावर आणि फेरफार नोंदीवर नावाची नोंद करण्यासाठी तक्रारदाराकडे २० हजार रुपयांच्या लाचेची मागणी केल्याप्रकरणी घोटावडे येथील महिला मंडल अधिकाऱ्यावर गुन्हा दाखल करण्यात आला आहे.

• सातबारा नोंदीसाठी २० हजारांची लाच मागितली
• महिला मंडल अधिकारी रोहिणी गुप्ते यांच्यावर गुन्हा दाखल
• पौड पोलीस ठाण्यात केली कारवाई

पुणे : जमिनीच्या सातबारा उताऱ्यावर आणि फेरफार नोंदीवर नावाची नोंद करण्यासाठी तक्रारदाराकडे २० हजार रुपयांच्या लाचेची मागणी केल्याप्रकरणी घोटावडे येथील महिला मंडल अधिकाऱ्यावर गुन्हा दाखल करण्यात आला आहे. रोहिणी शशांक गुप्ते (वय ५७, मंडल अधिकारी, घोटावडे, रा. सदाशिव पेठ) असे त्यांचे नाव आहे. तक्रारीच्या पडताळणीदरम्यान त्यांनी स्वतःसाठी ५ हजार रुपयांची लाच मागितल्याचे निष्पन्न झाले आहे. २४ जुलै २०२६ रोजी लाचलुचपत प्रतिबंधक विभागाकडे यासंदर्भात ४० वर्षीय नागरिकाने तक्रार केली होती.

 

तक्रारदार यांनी मोजे केमसेवाडी येथे १२ आर क्षेत्र खरेदी केले होते. या जमिनीच्या सातबारा उताऱ्यावर आणि फेरफार नोंदीवर नोंद केल्याच्या मोबदल्यात मंडल अधिकारी गुप्ते यांनी तक्रारदाराला मोबाइलवरून संपर्क केला होता. या कामासाठी स्वतःसाठी आणि तलाठ्यासाठी प्रत्येकी दोन नोंदींचे पाच-पाच हजार रुपये, असे एकूण २० हजार रुपये देण्याची मागणी त्यांनी केली होती.

हे सुद्धा वाचा : सोसायटीत पोलिसांची गाडी येईल, तुम्हाला हातकड्या घालून तुरुंगात नेले जाईल; महिलेला सायबर चोरट्यांनी घातला गंडा

रक्कम स्वीकारण्याची तयारी दर्शविल्याचे निष्पन्न

एसीबीकडे तक्रार प्राप्त झाल्यानंतर पंचांसमक्ष गुप्ते यांनी स्वतः साठी पाच हजार रुपयांची लाच मागितल्याचे आणि लाचेची रक्कम स्वीकारण्याची तयारी दर्शविल्याचे निष्पन्न झाले. नंतर १२ नोव्हेंबर रोजी पौड पोलिस ठाण्यात भ्रष्टाचार प्रतिबंधक कायद्याच्या कलम सातनुसार गुन्हा दाखल करण्यात आला. गुप्ते यांना तपासासाठी ताब्यात घेण्यात आले असून, न्यायालयाच्या परवानगीने अटकेची प्रक्रिया सुरू करण्यात आली आहे. पोलिस निरीक्षक प्रवीण निंबाळकर यांनी सापळा अधिकारी म्हणून, तर पोलिस निरीक्षक अशोक गवारी यांनी पर्यवेक्षण अधिकारी म्हणून काम पाहिले.

हे सुद्धा वाचा : दिवसाढवळ्या रक्तरंजित थरार, पाठलाग करत तरुणावर कोयत्याने वार; आळंदीतील घटनेनं खळबळ