Hit and Run चा थरार, पोलीस कॉन्स्टेबलला गाडीखाली चिरडलं, आधी धडक दिली, नंतर 10 मीटर फरपटत नेले; आरोपी फरार

वॅगनआरच्या चालकाने गाडीचा वेग वाढवून पोलीस कॉन्स्टेबलच्या दुचाकीला पाठीमागून धडक दिली नंतर सुमारे 10 मीटरपर्यंत फरफरत नेले. समोर उभ्या असलेल्या दुसऱ्या कारलाही वॅगनआरची धडक बसली. या कार अपघतात पोलीस कॉन्स्टेबलचा मृत्यू झाला.

दिल्लीच्या नांगलोई भागात हिट-अँड-रनची एक दुःखद घटना समोर आली आहे. ज्यामध्ये दिल्ली पोलीस हवालदाराचा मृत्यू झाला आहे. या घटनेचे सीसीटीव्ही फुटेज व्हायरल झाले असून, या व्हिडीओमध्ये हवालदार आपल्या दुचाकीवरून जात असताना मागून भरधाव वेगाने येणाऱ्या कारने दुचाकीला धडक दिली. ही घटना रविवारी पहाटे घडली असून संदीप असे या कॉन्स्टेबलचे नाव असून नांगलोई पोलीस ठाण्यात तैनात होते.

मिळालेल्या माहितीनुसार, परिसरात अचानक चोरीच्या घटना वाढल्याच्या कारणांचा शोध घेण्यासाठी कॉन्स्टेबल संदीप नागलोई हे सिव्हिल ड्रेसमध्ये कर्तव्य बजावत होते. यानंतर ते त्यांच्या दुचाकीवर जात असताना त्यांना एक वॅगनआर कार दिसली जी बेदरकारपणे चालवली जात होती. त्यावेळी संदीप यांनी ड्रायव्हरला गाडीचा वेग कमी करण्याचा इशारा केला. मात्र त्याने गाडी थांबवली नाही. त्यानंतर हवालदार संदीप यांनी आपल्या दुचाकीवर असलेल्या कारला ओव्हरटेक केले आणि समोर पोहोचले.

अचानक वॅगनआरच्या चालकाने गाडीचा वेग वाढवला आणि पाठीमागून संदीप यांच्या दुचाकीला धडक दिली आणि त्यांना सुमारे 10 मीटरपर्यंत ओढत नेले. समोर उभ्या असलेल्या दुसऱ्या कारलाही वॅगनआरची धडक बसली. यात संदीप गंभीर जखमी झाले. त्यांना प्रथम सोनिया रुग्णालयात आणि तेथून पश्चिम विहार येथील बालाजी रुग्णालयात नेण्यात आले. मात्र गंभीर जखमी झाल्याने त्याचा मृत्यू झाला.

या घटनेची माहिती देताना, डीसीपी जिमी चिराम म्हणाले की, वॅगनआरमध्ये दोन लोक प्रवास करत होते, ते घटनास्थळावरून पळून जाण्यात यशस्वी झाले. दोन्ही आरोपींना पकडण्यासाठी पोलिसांनी पथके तयार केली आहेत. दोघांची ओळख पटली असून कॉन्स्टेबल संदीप यांच्या दुचाकीला ज्या कारने धडक दिली ती गाडी जप्त करण्यात आली आहे. प्रथमदर्शनी हे रोड रेजचे प्रकरण असल्याचे दिसते, पुढील तपास सुरू आहे.