Accident News: ‘अंतर ठेवा’ म्हणताच संतापला; पाठलाग, वाद अन् अचानक धडक,महिला बाईकरसोबत धक्कादायक प्रकार

आधी फक्त अंतर ठेवण्यास सांगितले, पण काही क्षणांतच परिस्थिती इतकी बिघडली की महिला बाईकर थेट रस्त्यावर फेकली गेली. कारने धडक दिल्यानंतर चालक थांबला नाही; या घटनेचा VIDEO आता सोशल मीडियावर संतापाची लाट निर्माण करत आहे.

• महिला बाईकरला कारची जोरदार धडक
• धडकेनंतर कारचालक घटनास्थळावरून फरार
• गुरुग्राम पोलिसांकडे कठोर कारवाईची मागणी

गुरुग्राम : गुरुग्रामच्या गोल्फ कोर्स रोडवर महिला स्पोर्ट्स बाईकरला कारने जोरदार धडक दिल्याचा धक्कादायक प्रकार समोर आला आहे. या घटनेचा व्हिडिओ बाईकरच्या कॅमेऱ्यात कैद झाला असून, तो सोशल मीडियावर मोठ्या प्रमाणात व्हायरल होत आहे. धडक दिल्यानंतर कारचालक घटनास्थळी न थांबता फरार झाल्याचा आरोप आहे. ‘rebelwheels_sia_’ या नावाने सोशल मीडिया पेज चालवणारी सिया ही महिला रायडर तिच्या रायडिंग ग्रुपसोबत जात होती. तिच्याकडे Aprilia RS 457 ही स्पोर्ट्स बाईक होती. सियाच्या माहितीनुसार, एका कारमधील काही तरुण सुरुवातीपासूनच तिचा पाठलाग करत होते. कार अतिशय आक्रमक पद्धतीने चालवली जात असल्याने तिने कारचालकाला आपल्या बाईकपासून अंतर ठेवण्यास सांगितले.

हेही वाचा:स्टॉक रजिस्टर प्रकरणाने सावंतवाडी पालिकेत खळबळ; ‘मोठे मासे लपले आहेत’ नगरसेविकांचा आरोप

वादानंतर बाईकला धडक

सियाने दिलेल्या माहितीनुसार, कारमधील तरुणांनी तिला बाईक थांबवण्यास सांगून धमकी दिली. कारमधील तरुण नशेत असल्याचा संशयही तिने व्यक्त केला आहे. परिस्थिती वाढत असल्याचे लक्षात आल्यानंतर सिया आणि तिच्यासोबत असलेल्या मित्राने कारला पुढे जाण्यापासून रोखण्याचा आणि तिचे संरक्षण करण्याचा प्रयत्न केला. याचदरम्यान कारचालकाने अचानक बाईकला कट मारला आणि सियाच्या Aprilia RS 457 ला जोरदार धडक दिली. धडक इतकी जोरदार होती की सिया रस्त्यावर फेकली गेली, तर तिची बाईक काही मीटरपर्यंत फरफटत गेली. हा संपूर्ण प्रकार तिच्या बाईकवर बसवलेल्या कॅमेऱ्यात रेकॉर्ड झाला.

अपघातानंतर चालकाचा पळ

अपघातानंतर कारचालकाने घटनास्थळी थांबून मदत करण्याऐवजी तेथून पळ काढल्याचा आरोप आहे. सियाच्या एका मित्राने पुढे ट्रॅफिक सिग्नलवर कारचालकाला गाठून जाब विचारण्याचा प्रयत्न केला. मात्र, चालकाने आपली चूक नाकारली आणि तेथून निघून गेल्याचे सियाने सांगितले. घटनेनंतर सियाने सोशल मीडियावर अपघाताचा व्हिडिओ शेअर केला. तसेच कारचा क्रमांक आणि मालकाचे नावही सार्वजनिक करत गुरुग्राम पोलिसांकडे संबंधितांवर कठोर कारवाई करण्याची मागणी केली आहे.

हेही वाचा:Crime News: मोबाइलवरून ओळख; भेटण्यास नकार दिला, रात्री मागच्या दाराने घरात घुसून धक्कादायक कृत्य

सोशल मीडियावर संताप

व्हिडिओ व्हायरल झाल्यानंतर सोशल मीडिया युजर्सनी संताप व्यक्त केला आहे. दिल्ली-हरियाणा पोलिसांसह ट्रॅफिक पोलिसांना टॅग करत संबंधित कारचालकाविरुद्ध एफआयआर दाखल करून कठोर कारवाई करण्याची मागणी केली जात आहे. दरम्यान, या घटनेतील आरोपांची अधिकृत पोलिस कारवाई आणि तपासाबाबतची माहिती समोर येणे बाकी आहे.