Gadchiroli Crime: डोळ्यात मिरची, छातीत ‘वाकसा’ने सपासपवार करून हत्या; 5 वर्षांचा वाद जीवावर बेतला!

गडचिरोलीत फर्निचरच्या 5 वर्षांपासून प्रलंबित वादातून तरुणाची निर्घृण हत्या झाली. आरोपीने आधी डोळ्यात मिरची पूड फेकून ‘वाकसा’ने छातीत वार केले. सचिन कोलूरवारचा जागीच मृत्यू झाला असून आरोपी फरार आहे.

• फर्निचरच्या पैशांच्या वादातून गडचिरोलीत तरुणाची हत्या.
• आरोपीने डोळ्यात मिरची पूड टाकून ‘वाकसा’ने छातीत वार केले.
• सचिन कोलूरवारचा जागीच मृत्यू; आरोपी महेश बुरांडे फरार.

गडचिरोली: गडचिरोली येथून एक धक्कादायक घटना समोर आली आहे. आरोपीने आधी तरुणाच्या डोळ्यात मिरचीची पूड फेकली त्यांनतर फर्निचर बनविण्याच्या धारदार शस्त्राने (वाकस) छातीवर सपासप वार करून त्याची हत्या केल्याचे समोर आले आहे. पाच वर्ष जुन्या वादावरून ही हत्या करण्यात आल्याचे समोर आले आहे. सचिन रामचंद्र कोलूरवार (35, रा. विवेकानंद नगर) असे मृतकाचे नाव आहे. आरोपी सध्या फरार आहे.

काय घडलं नेमकं?

आरोपीचे नाव महेश महादेव बुरांडे (34, रा. लांझेडा वॉर्ड) असे आहे. पुण्यात कार्यरत असलेल्या एका पोलीस अधिकाऱ्याने कोरोना काळात गडचिरोलीत असताना आरोपी महेश बुरांडे याला सागवानी फर्निचर बनवण्यासाठी 2 लाख रुपये दिले होते. मात्र, ५ वर्ष उलटूनही महेशने फर्निचर दिले नव्हते. या व्यवहारात मध्यस्थी करण्यासाठी सचिन सचिन कोलूरवार व त्याचा मित्र सोमवारी दुपारी ४ वाजताच्या सुमारास महेशच्या घरी गेले होते.फर्निचर अद्याप तयार नसल्याचे पाहून सचिन आणि महेश यांच्यात जोरदार बाचाबाची झाली.

Pune crime: जामखेड गोळीबार प्रकरणात मोठी अपडेट; पैलवान सागर मोहोळकरचा उपचारादरम्यान मृत्यू

यात महेश संतापला आणि त्याने घरातील मिरचीचे तिखट आणले आणि सचिनच्या डोळ्यात फेकले. अचानक फेकल्याने सचिनच्या डोळ्यांची जळजळ झाल्याने सचिन असहाय्य होताच, महेशने फर्निचर कामासाठी वापरल्या जाणाऱ्या ‘वाकसा’ने सचिनच्या छातीवर सपासप वार केले. याने सचिन रक्ताच्या थारोळ्यात कोसळला आणि काही क्षणात त्याचा मृत्यू झाला.

घटनेची माहिती मिळताच पोलीस निरीक्षक विनोद चव्हाण आपल्या ताफ्यासह घटनास्थळी दाखल झाले. पोलिसांनी पंचनामा करून मृतदेह शवविच्छेदनासाठी पाठवण्यात आला आहे. आरोपी महेश बुरांडे हा घटनेनंतर फरार झाला असून, स्थानिक गुन्हे शाखेसह पोलिसांची पथके त्याच्या शोधासाठी रवाना झाली आहेत. पोलिसांनी आरोपीविरुद्ध गुन्हा दाखल केला आहे.

मृतक सचिन हा चामोर्शी मार्गावर पानठेला चालवून कुटुंबाचा उदरनिर्वाह करायचा. ६ वर्षांपूर्वी त्याचा लग्न झाला होता. त्याला एक साडेतीन वर्षांची चिमुकली आहे. या घटनेने रुग्णालयात नातेवाईकांनी केलेल्या आक्रोशामुळे संपूर्ण परिसर सुन्न झाला होता.

इन्स्टाग्रामवर ओळख झाली अन् नंतर वारंवार अत्याचार केले; घरात कोणी नसताना आला अन्…