दुकानातून काढल्याचा बदला! मालकाचे ४० लाख लुटले; कल्याण क्राईम ब्रँचने ३६ लाख केले हस्तगत
ही घटना १५ सप्टेंबर रोजी कल्याण-आग्रा रोडवर घडली. फारूक अत्तार आणि त्यांचा एक साथीदार ४० लाख रुपये घेऊन बँक ऑफ बडोदाच्या शाखेत जमा करण्यासाठी जात होते. याचवेळी दोन दुचाकींवरून आलेल्या चार जणांनी त्यांना रस्त्यात अडवले. आरोपींनी दोघांना खाली पाडून त्यांच्याकडील ४० लाख रुपयांची रक्कम हिसकावून घेतली आणि घटनास्थळावरून पलायन केले. भररस्त्यात घडलेल्या या लुटीमुळे परिसरात खळबळ उडाली.
घटनेनंतर बाजारपेठ पोलीस आणि कल्याण क्राईम ब्रँचने तपास सुरू केला. कल्याण क्राईम ब्रँचचे वरिष्ठ पोलीस निरीक्षक अजित शिंदे यांच्या मार्गदर्शनाखाली तपासाची चक्रे फिरवण्यात आली. तपासादरम्यान पोलिसांनी शोहेब शेख या कर्मचाऱ्याला ताब्यात घेऊन त्याची चौकशी केली. या चौकशीत लुटीच्या कटाबाबत महत्त्वाची माहिती मिळाल्याचे पोलिसांचे म्हणणे आहे. त्यानंतर पोलिसांचा तपास मुख्य संशयित समीर शेख आणि त्याच्या साथीदारांपर्यंत पोहोचला.
पोलिसांनी या प्रकरणात समीर शेख, आफताब खान, शहनवाज अन्सारी, शोहेब शेख, मुजाहिद खान आणि शाहिद शेख या सहा जणांना अटक केली आहे. आरोपींकडून लुटीच्या ४० लाख रुपयांपैकी तब्बल ३६ लाख रुपये हस्तगत करण्यात आल्याची माहिती पोलिसांनी दिली.
पोलिसांच्या तपासानुसार, मुख्य आरोपी समीर शेख हा उल्हासनगर येथील क्रांती फूड या दुकानात काम करत होता. त्याच्यावर चोरीचा संशय घेत त्याला कामावरून काढण्यात आले होते. त्यावेळी त्याचा तीन महिन्यांचा पगारही देण्यात आला नसल्याचा दावा आहे. याचाच राग मनात धरून समीरने दुकानदाराला लुटण्याचा कट आखल्याचे पोलिसांच्या तपासात समोर आले आहे.
समीरने संबंधित दुकानात काम केले असल्यामुळे दुकानातील आर्थिक व्यवहारांची त्याला माहिती होती. दुकानातून किती रक्कम बाहेर नेली जाते, पैसे बँकेत कधी जमा केले जातात आणि ते कुठे नेले जातात, याची माहिती त्याच्याकडे असल्याचे पोलिसांचे म्हणणे आहे. याच माहितीचा वापर करून त्याने साथीदारांच्या मदतीने नियोजन केले आणि पैसे बँकेत जमा करण्यासाठी नेले जात असतानाच लुटीचा कट अंमलात आणल्याचा पोलिसांचा दावा आहे.
घटनेनंतर वेगाने तपास करत पोलिसांनी सहा संशयितांना अटक केली आणि त्यांच्याकडून ३६ लाख रुपये हस्तगत केले. उर्वरित रक्कम आणि या गुन्ह्यात आणखी कोणाचा सहभाग आहे का, याबाबत पुढील तपास केला जात आहे. या प्रकरणाचा पुढील तपास कल्याण क्राईम ब्रँच आणि बाजारपेठ पोलीस करत आहेत. आरोपींवरील आरोप न्यायालयीन प्रक्रियेत सिद्ध होणे बाकी आहे.
सासवडमध्ये कायदा-सुव्यवस्थेचे धिंडवडे, कार आडवी लावून वकिलासह पत्नीला बेदम मारहाण; शहरात संताप
.png "Videos"){kind=small}
