फलटणमध्ये शोक आणि संताप! मुंबईहून मृतदेह आणताच गर्दी, आरोपींना अटक होत नाही तोपर्यंत अंत्यविधी न करण्याचा निर्णय
ओएसडीच्या भूमिकेवर प्रश्न
डॉ. राजेंद्र रुपनवर यांचा सोमवारी सकाळी मृत्यू झाला. वरिष्ठांच्या कथित जाचाला कंटाळून त्यांनी जीवन संपविल्याचा आरोप कुटुंबीयांकडून करण्यात येत आहे. त्यांच्या मृत्यूप्रकरणी माजी मंत्री तानाजी सावंत यांचे ओएसडी असल्याचे सांगितल्या जाणाऱ्या व्यक्तीचे नाव चर्चेत आल्यानंतर चौकशीची मागणी करण्यात आली आहे. मात्र, पोलिस तपासात संबंधित व्यक्ती कोणत्याही नेत्यांचे पीए नसल्याचे सध्या समोर येत असल्याचे डीवायएसपी धन्यकुमार गोडसे यांनी सांगितले.
दोषींवर कारवाईची मागणी
मृतदेह फलटणला आणल्यानंतर नातेवाईकांनी रुग्णालय प्रशासनावर गंभीर आरोप केले. राजेंद्र यांनी अत्यंत कष्टाने वैद्यकीय शिक्षण पूर्ण केले होते. रुग्णालयातील वरिष्ठ अधिकाऱ्यांकडून त्यांना मानसिक त्रास दिला जात असल्याने ते अस्वस्थ होते, असा दावा नातेवाईकांनी केला. दोषींवर कारवाई होईपर्यंत पार्थिव स्वीकारणार नसल्याची ठाम भूमिका त्यांनी घेतली.
पोलिसांनी परावृत्त केल्याचा दावा
नातेवाईकांच्या भूमिकेबाबत डीवायएसपी धन्यकुमार गोडसे यांनी कायदेशीर प्रक्रिया समजावून सांगण्यात येईल, असे स्पष्ट केले. मुंबईत गुन्हा दाखल झाला तेव्हा काही नावे देण्यात आली नव्हती, असेही त्यांनी सांगितले. तसेच यापूर्वी राजेंद्र यांनी आत्महत्येचा प्रयत्न केला असताना त्यांना परावृत्त करण्याचा प्रयत्न करण्यात आल्याचे पोलिसांनी नमूद केले.
वैद्यकीय अधिकाऱ्यावर आत्महत्येस प्रवृत्त केल्याचा गुन्हा
या प्रकरणात फलटण उपजिल्हा रुग्णालयातील वैद्यकीय अधिकारी लीला मदने यांच्याविरोधात आत्महत्येस प्रवृत्त केल्याचा गुन्हा दाखल करण्यात आला आहे. हा गुन्हा फलटण पोलिसांकडे वर्ग करण्यात आला असून, पुढील तपास फलटण पोलिसांकडून केला जाणार आहे.
व्हिडिओतील आरोपांवर प्रश्नचिन्ह
डॉ. रुपनवर यांनी मृत्यूपूर्वी शेअर केलेल्या व्हिडिओमध्ये काही व्यक्तींची नावे घेतल्याचा दावा करण्यात येत आहे. मात्र, दाखल गुन्ह्यात केवळ लीला मदने यांचे नाव असल्याने पोलिसांच्या तपासाबाबतही प्रश्न उपस्थित केले जात आहेत. या प्रकरणातील आरोपांची सत्यता तपासण्यासाठी पोलिसांकडून संबंधितांचे जबाब आणि उपलब्ध पुराव्यांची पडताळणी सुरू आहे.
.png "Videos"){kind=small}
