Drowning Case: पोलिसांची गाडी पाहून तलावात मारल्या उड्या? ३ तरुणांचा बुडून दुर्दैवी मृत्यू; एकाची झुंज सुरू, चौकशीचे आदेश!

 Drowning Case: पोलीस गाडी दिसली अन् ४ मित्रांनी तलावात ठोकली उडी! ३ तरुणांचा बुडून जागीच दुर्दैवी मृत्यू, एक रक्ताच्या थारोळ्यात... मध्य प्रदेशातील शहडोलमध्ये मध्यरात्री तुफान राडा, पोलिसांच्या भूमिकेवर गंभीर प्रश्न!

• शहडोलमध्ये तलावात बुडून ३ तरुणांचा मृत्यू, १ बचावला
• पोलीस गाडी पाहून उडी मारल्याचा दावा; नातेवाइकांचा संताप
• ३ सदस्यीय समितीकडून चौकशी; २५ हजारांची मदत

Drowning Case: मध्य प्रदेशातील शहडोल जिल्ह्यातून एक अत्यंत हृदयद्रावक आणि खळबळजनक घटना समोर आली आहे. शहरातील मुख्य बाजारपेठेजवळ असलेल्या प्रसिद्ध ‘चौपाटी’ परिसरामागील तलावात बुडून तीन तरुण मित्रांचा दुर्दैवी मृत्यू झाला आहे, तर एका तरुणाला वाचवण्यात यश आले आहे. सोमवारी रात्री घडलेल्या या थरारक घटनेमुळे संपूर्ण परिसरात मोठी खळबळ उडाली आहे. दरम्यान, पोलिसांचे वाहन पाहून तरुणांनी तलावात उड्या मारल्याचा दावा स्थानिक नागरिकांनी केल्याने या प्रकरणात पोलिसांच्या भूमिकेवर गंभीर प्रश्न उपस्थित केले जात आहेत.

हेही वाचा: Doctor Assault News: “उपचारात निष्काळजीपणाचा आरोप करत रुग्णालयाची तोडफोड!” डॉक्टर अन् सुरक्षा रक्षक रक्तबंबाळ

पोलीस गाडी पाहिली अन् तलावात मारल्या उड्या? 

पोलिसांनी दिलेल्या माहितीनुसार, समीर वंशकार, गौरव वंशकार आणि दुर्गेश वंशकार अशी दुर्दैवी मृत तरुणांची नावे आहेत. तर पुष्पेंद्र वंशकार हा तरुण या घटनेतून सुदैवाने बचावला असून त्याच्यावर जिल्हा रुग्णालयात उपचार सुरू आहेत.

स्थानिक रहिवाशांच्या दाव्यानुसार, सोमवारी रात्री सुमारे ८ वाजण्याच्या सुमारास हे चारही मित्र चौपाटीजवळील तलावाच्या काठावर बसले होते. त्याच वेळी त्या ठिकाणी पोलिसांची गस्तीची गाडी आली. पोलिसांचे वाहन पाहताच तरुण घाबरले आणि पळण्याच्या घाईत त्यांनी थेट तलावात उडी मारली. मात्र, तलावाच्या पाण्याचा अंदाज न आल्याने तिघे जण पाण्यात बुडाले.

रुग्णालयात नातेवािकांचा आक्रोश अन् पोलिसांविरोधात संताप

घटनेनंतर तातडीने चारही जणांना तलावातून बाहेर काढून जिल्हा रुग्णालयात नेण्यात आले, मात्र डॉक्टरांनी तपासणीअंती तिघांना मृत घोषित केले. ही बातमी समजताच मृतांच्या नातेवािकांनी आणि स्थानिकांनी जिल्हा रुग्णालयात मोठी गर्दी केली. उपस्थितांनी पोलिसांविरोधात तीव्र घोषणाबाजी करत या घटनेची निष्पक्ष आणि सखोल चौकशी करण्याची मागणी लावून धरली. शहडोलचे पोलीस अधीक्षक राजेंद्र मोहन दुबे यांनी तीन तरुणांचा बुडून मृत्यू झाल्याच्या घटनेला दुजोरा दिला असून तरुण नेमक्या कोणत्या परिस्थितीत पाण्यात पडले, याचा तपास सुरू असल्याचे सांगितले.

हेही वाचा: Viral Video Cab Driver:”माझी चूक काय? मला का मारताय?” ओला चालकाचा काळजाचा ठोका चुकवणारा आक्रोश! पुण्यात रक्तबंबाळ होईपर्यंत मारहाण

प्रशासनाकडून ३ सदस्यीय समितीची स्थापना; मदतीची घोषणा

या प्रकरणाचे गांभीर्य लक्षात घेऊन जिल्हाधिकाऱ्यांनी तात्काळ तीन सदस्यीय चौकशी समितीची स्थापना केली आहे. या समितीमध्ये अतिरिक्त पोलीस अधीक्षक, अतिरिक्त जिल्हाधिकारी आणि सिव्हिल सर्जन यांचा समावेश करण्यात आला आहे. ही समिती घटनेच्या सर्व पैलूंची सखोल चौकशी करून आपला अहवाल सादर करेल. याशिवाय, प्रशासनाकडून मृतांच्या शोकाकुल कुटुंबीयांना प्रत्येकी २५ हजार रुपयांची तातडीची आर्थिक मदत जाहीर करण्यात आली आहे. चौकशी अहवाल आल्यानंतरच या दुर्देवी घटनेमागील नेमके सत्य समोर येणार आहे.