Dharashiv: “पुण्याहून सणाला घरी आली अन्…” फटाक्यांच्या की शॉर्ट सर्किटच्या ठिणगीने घेतला ६ जणांचा बळी; गावकऱ्यांनी JCB ने…

Dharashiv: नव्या घरात जाण्याची तयारी अन् दिवाळीचा आनंद एका क्षणात खाक! धाराशिवच्या येडशीत पहाटे लागलेल्या भीषण आगीत ६ जणांचा धुराने गुदमरून करुण अंत; गावकऱ्यांनी जेसीबीने भिंत फोडूनही वाचवता आले नाही पोटचे गोळे!

• धाराशिवच्या येडशीत आगीत एकाच कुटुंबातील ६ जणांचा मृत्यू
• मुख्य दरवाजा बंद असल्याने सर्वजण घरातच अडकून होरपळले
• ग्रामस्थांचे शर्थीचे प्रयत्न; पोलीस व अग्निशमन दल तपास करत आहेत

Dharashiv: धाराशिव जिल्ह्यातून एक अत्यंत काळीज पिळवटून टाकणारी आणि भीषण दुर्घटना समोर आली आहे. जिल्ह्यातील येडशी गावात सोमवारी पहाटेच्या सुमारास एका घराला अचानक भीषण आग लागली. या दुर्दैवी आगीत एकाच कुटुंबातील तीन पिढ्यांतील ६ जणांचा घरातच गुदमरून आणि होरपळून दुर्दैवी अंत झाला आहे. घराच्या मुख्य दरवाजाजवळच आग लागल्याने आत अडकलेल्या कुटुंबाला बाहेर पडता आले नाही, ज्यामुळे हा मोठा अनर्थ घडला. या घटनेने संपूर्ण येडशी गावावर आणि धाराशिव जिल्ह्यावर शोककळा पसरली आहे.

हेही वाचा: Sindhudurg Accident: “सणासुदीच्या दिवसांत घाला घातला…” दोडामार्गात अज्ञात वाहनाच्या धडकेने दोन तरुण जागीच ठार; ओळखीचे काम सुरू!

तीन पिढ्या संपल्या; दुर्दैवी मृतांची नावे

या दुर्दैवी अपघातात उत्तम त्रिंबक करंडे (वय ७५), चंद्रकला उत्तम करंडे (वय ७०), गोविंद उत्तम करंडे (वय ४७), ज्योती गोविंद करंडे (वय ४२), गायत्री गोविंद करंडे (वय १६) आणि सिद्धी गोविंद करंडे (वय १५) या ६ जणांचा मृत्यू झाला आहे. मृत गायत्री ही पुण्यात शिक्षण घेत होती. दिवाळीचा सण आनंदाने साजरा करण्यासाठी ती अलीकडेच येडशीतील आपल्या घरी आली होती. मात्र, ही दिवाळी तिची अखेरची दिवाळी ठरली.

हेही वाचा: Mumbai News: “मी फक्त दुचाकीजवळ फटाके फोडू नका म्हणालो होतो…” मुंबईत क्षुल्लक वादातून ५ नराधमांनी तरुणाला…

नवीन घरात जाण्यापूर्वीच काळाचा घाला

करंडे कुटुंबाने सध्या राहत असलेल्या जुन्या घराच्या पाठीमागेच एक नवीन सुंदर घर बांधायला घेतले होते. या नव्या घराचे काम अगदी अंतिम टप्प्यात आले असून लवकरच हे कुटुंब तिथे राहायला जाणार होते. मात्र, नव्या घरात प्रवेश करण्यापूर्वीच काळाने त्यांच्यावर झेप घेतली. पहाटे अडीच वाजता आग लागल्याचे समजताच गावकऱ्यांनी तातडीने मदतीसाठी धाव घेतली. बोअरवेल सुरू करून, बादल्यांनी पाणी मारून तसेच थेट जेसीबीच्या साहाय्याने घराची मागची भिंत फोडून आत प्रवेश करण्याचा प्रयत्न करण्यात आला. मात्र, आगीचा भडका आणि धूर इतका तीव्र होता की आतून कोणताही प्रतिसाद मिळाला नाही आणि तोपर्यंत सर्वांचा प्राण गेला होता.

आगीची भयंकर तीव्रता

ही आग इतकी भीषण होती की घरासमोर असलेले उंच पिंपळाचे झाड खोडापासून शेंड्यापर्यंत पूर्णपणे करपून गेले, तर नारळाचे झाडही जळून खाक झाले. “आम्ही कुटुंबाला वाचवण्यासाठी सर्वतोपरी प्रयत्न केले, भिंती फोडल्या पण आग प्रचंड होती. माणसं देवासारखी चांगली होती, त्यांना वाचवता आले नाही याचे मोठे दुःख आहे,” अशा भावना प्रत्यक्षदर्शी गावकऱ्यांनी व्यक्त केल्या. घटनेची माहिती मिळताच पोलिसांनी घटनास्थळी पोहोचून मृतदेह ताब्यात घेतले असून, आगीचे नेमके कारण काय होते याचा अधिक तपास सुरू आहे.