Navi Mumbai Crime News: मुंबई-पुणे एक्सप्रेसवेवर पोलिसांचा थरारक पाठलाग; दुचाकीस्वाराला पकडताच उघडकीस आला चोरीचा खेळ

मुंबई-पुणे एक्सप्रेसवेवर पोलिसांनी थांबण्याचा इशारा केला, मात्र दुचाकीस्वाराने वेग वाढवत पळ काढला... पोलिसांनी पाठलाग करून त्याला अखेर गाठले. दुचाकीची माहिती ई-चालान मशिनवर तपासताच पोलिसांना धक्कादायक सत्य समोर आले; ज्या गाडीवर तो भरधाव धावत होता, ती सायनमधून चोरीला गेलेली निघाली.

• भरधाव दुचाकीने पळ काढला, पण पोलिसांनी गाठलेच
• ई-चालान मशिनने उघड केला चोरीच्या दुचाकीचा भांडाफोड
• आरोपी सायन पोलिसांच्या ताब्यात

नवी मुंबई: मुंबई-पुणे द्रुतगती महामार्गावर वाहतुकीचे नियम मोडून भरधाव वेगाने दुचाकी चालवत पोलिसांच्या इशाऱ्याकडे दुर्लक्ष करून पळून जाण्याचा प्रयत्न करणाऱ्या सराईत चोरट्याला पळस्पे महामार्ग पोलिसांनी पाठलाग करून पकडले. या कारवाईत सायन परिसरातून चोरीला गेलेली हिरो होंडा स्प्लेंडर दुचाकी जप्त करण्यात आली. ई-चालान मशिनच्या माध्यमातून दुचाकीची माहिती तपासल्यानंतर तिचा चोरीचा प्रकार उघडकीस आला.

पोलिसांना पाहताच पळण्याचा प्रयत्न

बुधवारी सकाळी सुमारे ११.४१ वाजता मुंबई-पुणे एक्सप्रेसवेवर पुण्याकडून मुंबईच्या दिशेने एक दुचाकीस्वार भरधाव वेगाने जात होता. त्याच्याकडून वाहतुकीच्या नियमांचे उल्लंघन होत असल्याचे लक्षात आल्यानंतर पळस्पे महामार्ग पोलिसांच्या पथकाने त्याला थांबण्याचा इशारा केला. मात्र, पोलिसांना पाहताच त्याने दुचाकीचा वेग वाढवून तेथून पळून जाण्याचा प्रयत्न केला. पोलिसांनी परिस्थितीचे गांभीर्य ओळखून तातडीने त्याचा पाठलाग सुरू केला. काही अंतर पाठलाग केल्यानंतर आदई ब्रिजजवळ शोल्डर लेनमध्ये पोलिसांनी दुचाकीस्वाराला घेरले आणि त्याला अडवण्यात यश मिळविले.

हेही वाचा: वाईतील मद्यपींची वरात थेट पोलीस ठाण्यात; सार्वजनिक ठिकाणी दारू पिऊन गोंधळ घालणाऱ्यांना दणका, पोलिसांची धडक कारवाई

कागदपत्रांबाबत उडवाउडवीची उत्तरे

ताब्यात घेतलेल्या दुचाकीस्वाराची चौकशी केली असता त्याने आपले नाव अरविंद हिरासिंग अडे (वय २७, रा. सांताक्रुज, मुंबई; मूळ रा. यवतमाळ) असल्याचे सांगितले. पोलिसांनी दुचाकीच्या कागदपत्रांबाबत विचारणा केली असता तो समाधानकारक माहिती देऊ शकला नाही. त्याच्या संशयास्पद हालचाली आणि उडवाउडवीच्या उत्तरांमुळे पोलिसांचा संशय अधिक बळावला.

ई-चालानवर दुचाकीचा तपशील तपासला

पोलिस अंमलदारांनी ई-चालान मशिनच्या माध्यमातून दुचाकीच्या क्रमांकाची माहिती तपासली. या तपासात दुचाकी धारावी येथील राधेश्याम विश्वकर्मा यांच्या मालकीची असल्याचे स्पष्ट झाले. तसेच ही दुचाकी सायन पोलीस ठाण्याच्या हद्दीतून चोरीला गेली असून, याप्रकरणी सायन पोलीस ठाण्यात गुन्हा दाखल असल्याचे समोर आले.

हेही वाचा: Crime News: नवी मुंबईतील कामोठे परिसरात संतापजनक घटना; सर्व विद्यार्थी उतरल्यावर चिमुकली बसमध्ये एकटी राहिल्याचा घेतला गैरफायदा

आरोपी सायन पोलिसांच्या ताब्यात

चोरीची दुचाकी जप्त करून आरोपी अरविंद अडे याला पुढील तपासासाठी सायन पोलीस ठाण्याच्या गुन्हे प्रकटीकरण पथकाच्या ताब्यात देण्यात आले. या प्रकरणाचा पुढील तपास सायन पोलीस करत आहेत. महामार्ग सुरक्षा पथक, रायगड परिक्षेत्राचे पोलीस अधीक्षक त्रिरुपती काकडे यांच्या मार्गदर्शनाखाली पळस्पे केंद्राचे प्रभारी अधिकारी देवीदास नाईक, ड्युटी अधिकारी केदार कुंभार, पोलीस अंमलदार निलेश चव्हाण, संजयसिंग ठाकूर, प्रकाश म्हात्रे आणि ठाणे अंमलदार मच्छिंद्र जाधव यांच्या पथकाने ही कारवाई केली. ई-चालान मशिनच्या माध्यमातून वाहनाची माहिती तपासल्याने चोरीचा प्रकार उघडकीस आला.