Student Suicide Case: बुधवारच्या त्या दुपारी नेमके काय घडले? शिक्षकाच्या त्रासाला कंटाळून ७ व्या वर्गातील विद्यार्थ्याने…

Student Suicide Case: मनात भीती अन् डोळ्यात अश्रू; शिक्षणासाठी वसतिगृहात राहिलेल्या १३ वर्षीय समर्थने उचलले टोकाचे पाऊल! "शिक्षकाकडून सतत त्रास होतोय..." मृत्यूपूर्वी वडिलांना सांगितलेली ती हाक ठरली शेवटची. शिक्षकाच्या त्या त्रासामागे नक्की कोणते रहस्य दडले होते?

•  ७ व्या वर्गातील १३ वर्षीय खरात या विद्यार्थ्याने गळफास घेऊन  संपवले जीवन.
• वसतिगृहातील शिक्षक याच्याकडून विनाकारण त्रास दिला जात असल्याचा आरोप.
• नातेवाईक व वडिलांच्या तक्रारीवरून संबंधित शिक्षकाविरुद्ध गुन्हा नोंद.

 

Student Suicide Case : शिक्षणासाठी घरापासून दूर पाथर्डी येथील वसतिगृहात राहणाऱ्या एका अवघ्या १३ वर्षीय विद्यार्थ्याने टोकाचे पाऊल उचलत आत्महत्या केल्याची अत्यंत मन हेलावून टाकणारी घटना उघडकीस आली आहे. वसतिगृहातील शिक्षकाकडून वारंवार आणि विनाकारण त्रास दिला जात असल्याची तक्रार या मुलाने मृत्यूपूर्वी आपल्या वडिलांना केली होती. या धक्कादायक प्रकारामुळे शैक्षणिक वर्तुळात प्रचंड संताप आणि खळबळ उडाली असून, पालकांमध्ये सुरक्षेबाबत मोठी भीती निर्माण झाली आहे.

हेही वाचा: Facebook King Murder:’फेसबुक किंग’चा रक्तरंजित अंत! जिमवरून परतताना रील्स पार्टनरनेच भररस्त्यात कारने उडवून केला खून

कवडगावचा समर्थ पाथर्डीत घेत होता शिक्षण

मूळचा बीड जिल्ह्यातील गेवराई तालुक्यातील कवडगाव येथील रहिवासी असलेला समर्थ आबासाहेब खरात (वय १३) हा तरुण पाथर्डी येथील प्रतापकाका ढाकणे यांच्या ‘हिंद वसतिगृहात’ राहून इयत्ता ७ वीचे शिक्षण घेत होता. विशेष म्हणजे, त्याचा लहान भाऊ साई हा देखील याच वसतिगृहात ५ व्या वर्गात शिकत आहे. बुधवारी २१ ऑक्टोबर रोजी दुपारी समर्थने वसतिगृहाच्या खोलीत गळफास घेऊन आपली जीवनयात्रा संपवली. ही दुर्दैवी घटना उघडकीस आल्यानंतर परिसरात शोककळा पसरली असून कुटुंबावर दुःखाचा डोंगर कोसळला आहे.

शिक्षकाचा होता सतत त्रास; नातेवाईकांचा पोलीस ठाण्यात ठिय्या

कुटुंबाने दिलेल्या तक्रारीनुसार, वसतिगृहातील शिक्षक सुभाष घुगे हा गेल्या काही दिवसांपासून समर्थला विनाकारण आणि वारंवार मानसिक त्रास देत होता, असे विद्यार्थ्याने वडिलांना फोन करून सांगितले होते. या घटनेची माहिती मिळताच संतप्त नातेवाईकांनी व गावकऱ्यांनी पाथर्डी पोलीस ठाण्यात धाव घेत आरोपी शिक्षकावर तात्काळ कठोर गुन्हा दाखल करण्याची मागणी करत ठिय्या मांडला. नातेवाइकांच्या तीव्र आक्रमक भूमिका आणि वडिलांच्या फिर्यादीवरून पाथर्डी पोलिसांनी अंततः संबंधित शिक्षक सुभाष घुगे याच्याविरुद्ध गुन्हा नोंदवला आहे. दरम्यान, नातेवाईकांनी पाथर्डीत शवविच्छेदन करण्यास नकार दिल्यामुळे, मृतदेहाची पोस्ट मॉर्टम प्रक्रिया छत्रपती संभाजीनगर येथे पार पाडण्याचा निर्णय घेण्यात आला.

हेही वाचा: Beed: अडीच लाख रुपये उकळले अन् दोनच दिवसांत मोडला संसार; बनावट कागदपत्रांच्या आधारे अल्पवयीन मुलीचा विवाह

वसतिगृहातील विद्यार्थ्यांच्या सुरक्षिततेचा प्रश्न ऐरणीवर

एका अल्पवयीन विद्यार्थ्याच्या अशा दुर्दैवी मृत्यूमुळे वसतिगृहात राहणाऱ्या मुलांची सुरक्षा आणि त्यांच्या छोट्या-मोठ्या तक्रारींकडे दुर्लक्ष करणाऱ्या व्यवस्थापनाचा मुद्दा पुन्हा एकदा गंभीरपणे समोर आला आहे. शिक्षकाकडून नेमक्या कोणत्या स्वरूपाचा त्रास दिला जात होता आणि त्याचा या आत्महत्येशी थेट संबंध काय आहे, याचा सखोल तपास पोलीस आता करत आहेत.