स्टॉक रजिस्टर प्रकरणाने सावंतवाडी पालिकेत खळबळ; ‘मोठे मासे लपले आहेत’ नगरसेविकांचा आरोप

स्टॉक रजिस्टर गायब झाल्याप्रकरणी एका कर्मचाऱ्यावर गुन्हा दाखल झाला; मात्र, याच कारवाईवरून आता नगरपालिकेच्या कारभारावरच प्रश्न उपस्थित झाले आहेत. तक्रारदार अधिकाऱ्यावरच गंभीर आरोप असल्याने ‘मोठे मासे कोण?’ असा सवाल नगरसेविकांनी केला आहे.

• स्टॉक रजिस्टर गायब करण्याचा प्रकार उघड
• तक्रारदार अधिकाऱ्याच्या भूमिकेवर नगरसेविकांनी उपस्थित केले प्रश्न
• वरिष्ठ अधिकाऱ्यांचीही चौकशी करण्याची मागणी

सावंतवाडी: सावंतवाडी नगरपरिषदेच्या पाणीपुरवठा विभागातील वस्तू नोंद व वापर रजिस्टर (स्टॉक रजिस्टर) गायब करून त्याची विल्हेवाट लावल्याप्रकरणी जोडारी भारत लाखे यांच्यावर गुन्हा दाखल करण्यात आला आहे. मात्र, या कारवाईवरून नगरपालिकेच्या भूमिकेवर प्रश्नचिन्ह उपस्थित झाले असून, शिवसेना नगरसेविका ॲड. सायली दुभाषी आणि शर्वरी धारगळकर यांनी या प्रकरणाची उच्चस्तरीय चौकशी करण्याची मागणी केली आहे. ‘चोरी करणाऱ्यांनीच फिर्याद देण्याचा हा अजब प्रकार असून, या प्रकरणात मोठे मासे लपले असण्याची शक्यता आहे,’ असा आरोप दोन्ही नगरसेविकांनी केला आहे. या संपूर्ण प्रकरणाची सिंधुदुर्ग जिल्हाधिकाऱ्यांमार्फत चौकशी करून विशेष तपास पथक (SIT) स्थापन करण्याची मागणी करण्यात येणार असल्याचे त्यांनी स्पष्ट केले.

हेही वाचा: Crime News: मोबाइलवरून ओळख; भेटण्यास नकार दिला, रात्री मागच्या दाराने घरात घुसून धक्कादायक कृत्य 

अधिकारीच संशयाच्या भोवऱ्यात

नगरपालिकेच्या नियमानुसार स्टॉक रजिस्टर लिहिण्याचे काम जोडारी यांच्याकडे असले, तरी रजिस्टर सुरक्षित ठेवण्याची मुख्य जबाबदारी संबंधित विभागप्रमुखांची असल्याचा दावा नगरसेविकांनी केला आहे. त्यामुळे रजिस्टर गहाळ झाल्याची फिर्याद पाणीपुरवठा विभागप्रमुखांनीच दाखल करणे अपेक्षित असल्याचे त्यांनी म्हटले आहे. तक्रारदार अधिकारी संजय पोईपकर यांनी समितीच्या सभेत ऑडिटसाठी पुरवठादाराकडून दीड लाख रुपये घेतल्याची कबुली दिल्याचा दावा करण्यात आला आहे. संबंधित पुरवठादारानेही पैसे दिल्याचे मान्य केल्याचे नगरसेविकांचे म्हणणे आहे. त्यामुळे स्वतःवर भ्रष्टाचाराचे आरोप असलेल्या व्यक्तीनेच आरोपीविरोधात पोलिसांत फिर्याद कशी दाखल केली, असा सवाल त्यांनी उपस्थित केला आहे.

हेही वाचा:ऑनलाइन ओळख पडली महागात; डेटिंग ॲपवरून विश्वास जिंकला, दोन बहिणींना बिअर पाजून हॉटेलमध्ये नेलं अन्…

‘मोठे मासे लपले असण्याची शक्यता’

या प्रकरणात केवळ जोडारी यांच्यावर कारवाई करून प्रकरण संपवू नये. मुख्याधिकारी आणि इतर वरिष्ठ अधिकारी यांचीही भूमिका तपासणे आवश्यक असल्याचे ॲड. सायली दुभाषी आणि शर्वरी धारगळकर यांनी म्हटले आहे. रजिस्टर गहाळ होण्यामागे नेमकी कोणाची जबाबदारी आहे, तसेच या प्रकरणात आणखी कोणाचा सहभाग आहे, याची चौकशी करण्याची मागणी त्यांनी केली आहे. या प्रकारामुळे सावंतवाडी नगरपालिकेच्या कारभारावर प्रश्नचिन्ह निर्माण झाले असून, प्रकरणाची निष्पक्ष चौकशी होणे गरजेचे असल्याचे नगरसेविकांनी म्हटले आहे. सिंधुदुर्ग जिल्हाधिकाऱ्यांनी तातडीने विशेष तपास पथक स्थापन करून मुख्याधिकारी, तक्रारदार अधिकारी तसेच या प्रकरणाशी प्रत्यक्ष किंवा अप्रत्यक्षरीत्या संबंधित असलेल्या व्यक्तींची सखोल चौकशी करावी, अशी मागणी करण्यात येणार आहे.