जुगार अड्ड्यावर पोलिसांची मोठी कारवाई; तब्बल 'इतक्या' लाखांचा मुद्देमाल जप्त
सांगली : कर्नाटक आणि महाराष्ट्राच्या सीमावर्ती भागात असलेल्या जत तालुक्यातील कोंतेबोबलाद येथील सर्वात मोठ्या जुगार अड्ड्यावर पोलिसांनी रविवारी मोठी कारवाई केली. या कारवाईत तब्बल ५० लाख रुपयांचा मुद्देमाल जप्त करण्यात आला आहे. विधानसभा निवडणुकीच्या पार्श्वभूमीवर ही राज्यातील सर्वात मोठी कारवाई मानली जात आहे.
कोल्हापूर परिक्षेत्राचे विशेष पोलीस महानिरीक्षक सुनिल फुलारी यांना मिळालेल्या गोपनीय माहितीच्या आधारे सांगलीचे पोलिस अधीक्षक संदीप घुगे यांच्या नेतृत्वाखालील पथकाने या जुगार अड्ड्यावर छापा टाकला. अफरोज पठाण यांना मिळालेल्या खात्रीशीर माहितीच्या आधारे गुलगुंजनाळ फाट्याजवळ असलेल्या एका हॉटेलमध्ये तीन पत्ती जुगार चालवला जात असल्याचे उघड झाले. या छाप्यात २० लाखांची रोकड, ४२ मोबाईल फोन, तीन कार आणि दोन दुचाकींसह इतर जुगाराचे साहित्य जप्त करण्यात आले. याप्रकरणी जुगार अड्ड्याचे मालक व चालक यांच्यासह एकूण ४१ जणांवर गुन्हा दाखल झाला आहे.
कोंतेबोबलाद येथील या आंतरराष्ट्रीय जुगार अड्ड्यावर महाराष्ट्र आणि कर्नाटकातील अनेक जुगारी येत असत. दररोज लाखो रुपयांची उलाढाल होत असल्याची माहिती खबऱ्यांमार्फत फुलारी यांना मिळाली होती. त्यानंतर ही कारवाई करण्याचे आदेश त्यांनी अधीक्षक घुगे यांना दिले. जत उपअधीक्षक सुनील साळुंखे आणि इतर अधिकाऱ्यांच्या पथकाने या कारवाईत सहभाग घेतला.
२० ऑक्टोबर रोजी पोलीस पथकाने हॉटेलच्या मागील बंद खोलीत छापा टाकला. तेथे सुमारे ४१ जण तीन पत्ती जुगार खेळत असल्याचे आढळले. पोलीसांनी या सर्वांना ताब्यात घेतले. संतोष बजंत्री (रा. बेडगी, ता. जत) हा मुख्य आरोपी असून त्याच्यावर जुगार अड्डा चालवण्याचा आरोप आहे. याप्रकरणी ४५ जणांवर गुन्हा दाखल करण्यात आला आहे, ज्यात कर्नाटकातील विजयपूर येथील २१, सोलापूर जिल्ह्यातील ३, जत तालुक्यातील बेळुंडगी येथील २, उमदी येथील १, आणि कर्नाटकातील अन्य गावांतील १४ व्यक्तींचा समावेश आहे. या छाप्यामुळे सीमाभागातील अवैध व्यवसायांवर मोठा धक्का बसला आहे.
.png "Videos"){kind=small}
