Accident News: वाघाच्या पिंजऱ्यात शिरला, अन् पुढच्याच क्षणी वाघाचा हल्ला; घटनास्थळी व्यक्तीचा मृत्यू

वाघाच्या पिंजऱ्यात शिरल्यानंतर पुढच्या काही क्षणांतच थरारक घटना घडली. यॉर्कशायर वाइल्डलाइफ पार्कमध्ये वाघाने एका व्यक्तीवर हल्ला केला. गंभीर जखमी झालेल्या व्यक्तीला वैद्यकीय पथकाने घटनास्थळीच मृत घोषित केले. दरम्यान, हल्ल्यानंतर वाघ सुरक्षित असल्याचे पोलिसांनी स्पष्ट केले.

• यॉर्कशायर वाइल्डलाइफ पार्कमध्ये वाघाच्या पिंजऱ्यात व्यक्तीने केला प्रवेश
• वाघाच्या हल्ल्यात गंभीर जखमी झालेल्या व्यक्तीचा घटनास्थळीच मृत्यू
• वाघ सुरक्षित; घटनेचे व्हिडिओ शेअर न करण्याचे प्रशासनाचे आवाहन

 

यॉर्कशायर : इंग्लंडमधील यॉर्कशायर वाइल्डलाइफ पार्कमध्ये एक धक्कादायक घटना घडली आहे. वाघाच्या पिंजऱ्यात प्रवेश केलेल्या एका व्यक्तीवर वाघाने हल्ला केला. या हल्ल्यात गंभीर जखमी झालेल्या व्यक्तीचा घटनास्थळीच मृत्यू झाला. शनिवारी दुपारी सुमारे 1.30 वाजता डोनकास्टरजवळील यॉर्कशायर वाइल्डलाइफ पार्कमध्ये ही घटना घडली. साउथ यॉर्कशायर पोलिसांनी दिलेल्या माहितीनुसार, संबंधित व्यक्तीने वाघाच्या एन्क्लोजरमध्ये प्रवेश केला होता. त्यानंतर वाघाने त्याच्यावर हल्ला केला. आपत्कालीन पथके तातडीने घटनास्थळी दाखल झाली. मात्र, वैद्यकीय कर्मचाऱ्यांनी प्रयत्न करूनही त्या व्यक्तीला घटनास्थळीच मृत घोषित करण्यात आले. मृताच्या कुटुंबीयांना घटनेची माहिती देण्यात आली आहे.

वाघाने केला हल्ला

घटनेनंतर सोशल मीडियावर काही व्हिडिओ व्हायरल झाले आहेत. या व्हिडिओमध्ये वाघ संबंधित व्यक्तीवर पंजाने हल्ला करताना आणि त्याच्याशी झटापट करताना दिसत असल्याचे सांगितले जात आहे. मात्र, प्रशासनाने हे अस्वस्थ करणारे व्हिडिओ सोशल मीडियावर शेअर न करण्याचे आवाहन केले आहे. दरम्यान, वाघाच्या प्रकृतीबाबत सोशल मीडियावर विविध अफवा पसरत होत्या. पोलिसांनी या अफवांना पूर्णविराम देत वाघ सुरक्षित असल्याचे स्पष्ट केले. हल्ल्यानंतरही वाघ आपल्या एन्क्लोजरमध्येच असून त्याला कोणतीही दुखापत झालेली नाही. त्यामुळे पार्कमधील इतर नागरिकांना कोणताही धोका नसल्याचे पोलिसांनी सांगितले.

हेही वाचा: रुग्णवाहिका हॉस्पिटलमध्ये पोहोचली, पण पुढच्याच क्षणी घडलं धक्कादायक; नागरिकांनी चालकाला धरलं धारेवर

नेमके काय घडले? प्रशासनाचा तपास सुरू

यॉर्कशायर वाइल्डलाइफ पार्कनेही या घटनेला ‘गंभीर घटना’ असल्याचे म्हटले आहे. घटनेची माहिती मिळताच पार्कची आपत्कालीन प्रतिसाद यंत्रणा तातडीने सक्रिय करण्यात आली. आपत्कालीन सेवा घटनास्थळी दाखल झाल्या असून, नेमके काय घडले याचा तपास प्रशासनासोबत मिळून केला जात असल्याचे पार्ककडून सांगण्यात आले. अभ्यागत, कर्मचारी आणि प्राण्यांची सुरक्षा व कल्याण ही पार्कची सर्वोच्च प्राथमिकता असल्याचे प्रशासनाने स्पष्ट केले आहे. या घटनेचा पुढील तपास सुरू असून, व्यक्तीने वाघाच्या एन्क्लोजरमध्ये प्रवेश कसा केला, याबाबतही चौकशी केली जात आहे.