पडद्यावर दमदार, आता सोशल मीडियावरही एन्ट्री! अभिनेता गणेश यादव यांचे Instagram वर पदार्पण
आजच्या काळात कलाकार आणि प्रेक्षक यांच्यातील संवादासाठी सोशल मीडिया महत्त्वाचे माध्यम बनले आहे. याच पार्श्वभूमीवर गणेश यादव यांनी अधिकृतपणे इन्स्टाग्रामवर पदार्पण केले आहे. ganeshyadav_official हे त्यांचे अधिकृत इन्स्टाग्राम हँडल असल्याचे सांगण्यात आले आहे.
आतापर्यंत सोशल मीडियापासून दूर राहिलेल्या गणेश यादव यांनी आता या प्लॅटफॉर्मचा वापर आपल्या चाहत्यांशी संवाद साधण्यासाठी करण्याचा निर्णय घेतला आहे. कलाकार म्हणून आपल्या दीर्घ प्रवासातील विविध पैलू, आगामी चित्रपट आणि प्रोजेक्ट्सची माहिती तसेच पडद्यामागील अनेक गोष्टी या माध्यमातून प्रेक्षकांपर्यंत पोहोचवण्याचा त्यांचा प्रयत्न असणार आहे.
एकीकडे गणेश यादव यांची सोशल मीडियावरील नवी इनिंग सुरू झाली असतानाच त्यांच्या आगामी चित्रपटाचीही चर्चा आहे. ते लवकरच ‘संडे 1996’ या मराठी चित्रपटातून प्रेक्षकांच्या भेटीला येणार आहेत.
या चित्रपटात गणेश यादव पोलीस अधिकाऱ्याची भूमिका साकारणार आहेत. आपल्या व्यक्तिरेखांना प्रभावी अभिनयातून वेगळी ओळख देण्यासाठी परिचित असलेल्या गणेश यादव यांना या नव्या भूमिकेत पाहण्याची उत्सुकता चाहत्यांमध्ये असणार आहे.
हिंदी आणि मराठी अशा दोन्ही चित्रपटसृष्टीत काम केलेल्या गणेश यादव यांनी आपल्या कारकिर्दीत विविध प्रकारच्या व्यक्तिरेखा साकारल्या आहेत. आता इन्स्टाग्राममुळे त्यांच्या व्यावसायिक प्रवासातील घडामोडी आणि पडद्यामागील क्षण चाहत्यांना अधिक जवळून पाहता येणार आहेत.
त्यामुळे सोशल मीडियावर नवी इनिंग आणि ‘संडे 1996’मधून पडद्यावर नवी भूमिका, अशा दुहेरी कारणांमुळे गणेश यादव पुन्हा एकदा चर्चेत आले आहेत.
.png "Videos"){kind=small}
