(फोटो सौजन्य-सोशल मीडिया)
Actor Giri Babu:दाक्षिणात्य चित्रपटसृष्टीतून एक दुःखद बातमी समोर आली आहे. तेलुगू चित्रपटसृष्टीतील ज्येष्ठ अभिनेते आणि दिग्दर्शक गिरी बाबू यांचं निधन झालं आहे. वयाच्या ८३ व्या वर्षी त्यांनी अखेरचा श्वास घेतला. १४ नोव्हेंबर रोजी हैदराबादमधील एका खासगी रुग्णालयात त्यांची प्राणज्योत मालवली. त्यांच्या निधनामुळे संपूर्ण दक्षिण भारतीय चित्रपटसृष्टीवर शोककळा पसरली आहे. अनेक कलाकारांनी सोशल मीडियाच्या माध्यमातून त्यांना श्रद्धांजली वाहत दुःख व्यक्त केलं आहे.
गिरी बाबू हे तेलुगू चित्रपटसृष्टीतील लोकप्रिय नाव होतं. त्यांनी जवळपास पाच दशके मनोरंजनविश्वात काम केलं. आपल्या प्रदीर्घ कारकिर्दीत त्यांनी ६०० हून अधिक चित्रपटांमध्ये विविध भूमिका साकारल्या. आपल्या अभिनयशैलीने त्यांनी प्रेक्षकांच्या मनावर वेगळी छाप उमटवली होती.
गिरी बाबू यांनी ‘जगमे माया’ या चित्रपटातून आपल्या अभिनय कारकिर्दीला सुरुवात केली. अभिनयासोबतच त्यांनी दिग्दर्शन आणि चित्रपट निर्मिती क्षेत्रातही आपली ओळख निर्माण केली. ‘सिंहा गर्जना’, ‘मेरुपुदादी’ आणि ‘इंद्रजित’ यांसारख्या चित्रपटांच्या निर्मितीमध्ये त्यांनी महत्त्वाची भूमिका बजावली.
अभिनेता, निर्माता आणि दिग्दर्शक म्हणून उमटवली छाप
केवळ अभिनयापुरते मर्यादित न राहता गिरी बाबू यांनी दिग्दर्शक म्हणूनही काम केलं. ‘रणरंगम’, ‘इंद्रजित’ आणि ‘नी सुखामे’ यांसारख्या चित्रपटांचं त्यांनी दिग्दर्शन केलं होतं. अभिनेता, निर्माता आणि दिग्दर्शक अशा विविध भूमिका त्यांनी यशस्वीपणे पार पाडल्या. त्यांच्या या योगदानामुळे तेलुगू चित्रपटसृष्टीत त्यांचं नाव आदराने घेतलं जातं.
गिरी बाबू यांच्या निधनाची बातमी समोर आल्यानंतर मनोरंजनविश्वातील अनेक कलाकारांनी शोक व्यक्त केला. अभिनेते चिरंजीवी आणि आंध्र प्रदेशचे मुख्यमंत्री एन. चंद्राबाबू नायडू यांच्यासह अनेकांनी सोशल मीडियावर पोस्ट शेअर करत त्यांना श्रद्धांजली वाहिली.
चिरंजीवी यांनी ‘एक्स’वरील पोस्टमध्ये लिहिलं, “प्रसिद्ध अभिनेते गिरी बाबू यांच्या निधनाची बातमी ऐकून मला धक्का बसला आहे. त्यांच्या वैशिष्ट्यपूर्ण अभिनयाने आणि अनोख्या शैलीने अभिनेते, निर्माते आणि दिग्दर्शक म्हणून तेलुगू चित्रपटसृष्टीतील त्यांचे योगदान नेहमीच स्मरणात राहील. त्यांचं निधन ही तेलुगू चित्रपटसृष्टीसाठी कधीही भरून न येणारी हानी आहे. त्यांच्या आत्म्यास शांती लाभो, अशी मी प्रार्थना करतो. त्यांच्या कुटुंबीयांना आणि चाहत्यांना माझ्या मनःपूर्वक संवेदना.”
गिरी बाबू यांच्या निधनामुळे तेलुगू चित्रपटसृष्टीने एक अनुभवी कलाकार गमावला आहे. त्यांच्या पाच दशकांच्या कारकिर्दीतील कामगिरी आणि चित्रपटसृष्टीतील योगदान कायम स्मरणात राहील.
.png "Videos"){kind=small}
