रविवार, 16 ऑगस्ट 2026
(फोटो सौजन्य- सोशल मिडिया)
Antara Banerjee Arrest: टीव्ही, चित्रपट आणि ओटीटी क्षेत्रात काम करणारी अभिनेत्री अंतरा बॅनर्जी सध्या एका वादामुळे चर्चेत आली आहे. १२ ऑगस्ट रोजी अरवली एक्सप्रेसमध्ये आरपीएफ कर्मचाऱ्यांसोबत झालेल्या वादानंतर ३१ वर्षीय अभिनेत्रीला पोलिसांनी ताब्यात घेतलं. अभिनेत्रीने ट्रेनच्या एसी डब्यात गोंधळ घातल्याचा आरोप असून, वादादरम्यान तिने कपडे काढले आणि आरपीएफ अधिकाऱ्यावर रेझरने हल्ला करण्याचा प्रयत्न केल्याचं वृत्त आहे.
‘फ्री प्रेस जर्नल’च्या वृत्तानुसार, अंतरा बॅनर्जी एका शूटिंगसाठी सुरतला जात होती. तिच्याकडे स्लीपर क्लासचं तिकीट होतं, मात्र ती आरक्षित एसी डब्यातून प्रवास करत असल्याचा आरोप आहे. एका प्रवाशाने याबाबत तक्रार केल्यानंतर वादाला सुरुवात झाली.
ही घटना बोरिवली आणि डहाणू दरम्यान रात्री सुमारे ९:३० ते १०:५० वाजण्याच्या सुमारास घडल्याचं सांगितलं जात आहे. प्रवाशाच्या तक्रारीनंतर तिकीट कलेक्टर हरिकेश त्रिपाठी यांनी आरपीएफला माहिती दिली.
यानंतर आरपीएफचे सहाय्यक उपनिरीक्षक यामिनीकांत मिश्रा आणि कॉन्स्टेबल राजेश कुमार यांनी घटनास्थळी हस्तक्षेप केला.
वाद सुरू असताना अंतरा बॅनर्जीने पोलिसांशी गैरवर्तन आणि शिवीगाळ केल्याचा आरोप आहे. परिस्थिती चिघळल्यानंतर ती हिंसक झाली आणि तिने आपले कपडे काढल्याचं वृत्त आहे.
याचदरम्यान तिने रेझर ब्लेड दाखवून आरपीएफ अधिकाऱ्यावर हल्ला करण्याचा प्रयत्न केल्याचा आरोप करण्यात आला आहे. या झटापटीत अभिनेत्रीही जखमी झाल्याचं सांगितलं जात आहे.
माध्यमांच्या वृत्तानुसार, वादादरम्यान अंतरा बॅनर्जीने ट्रेनच्या एसी डब्याची खिडकी फोडून पळून जाण्याचा प्रयत्न केल्याचाही आरोप आहे. परिस्थिती नियंत्रणाबाहेर गेल्यानंतर आरपीएफ कर्मचाऱ्यांनी तिला डहाणू रेल्वे स्थानकावर उतरवलं आणि सरकारी रेल्वे पोलिसांच्या ताब्यात दिलं.
अभिनेत्रीने पोलिसांचा गणवेश आणि त्यांचा फोन खराब केल्याचाही आरोप करण्यात आला आहे.
दुसऱ्या दिवशी सकाळी अंतरा बॅनर्जीला बोरिवली रेल्वे पोलिसांनी ताब्यात घेतलं. पोलिसांनी तिला कुटुंबीयांशी किंवा कायदेशीर सल्लागाराशी संपर्क साधण्याची संधी दिली होती. मात्र, तिने त्यास नकार देत स्वतःला अटक करण्याची मागणी केल्याचं पोलिसांनी सांगितल्याचं वृत्त आहे.
या प्रकरणी पोलिसांनी गुन्हा दाखल केला असून अभिनेत्रीविरोधात नोटीस बजावण्यात आली आहे. सध्या तिची जामिनावर सुटका करण्यात आली आहे. या संपूर्ण प्रकरणामुळे टीव्ही आणि ओटीटी अभिनेत्री अंतरा बॅनर्जी चर्चेच्या केंद्रस्थानी आली आहे.
