(फोटो सौजन्य- सोशल मीडिया)
Arjun Bijlani: टीव्ही अभिनेता अर्जुन बिजलानी आणि त्याची पत्नी नेहा स्वामी सध्या एका टी-शर्टमुळे चर्चेत आले आहेत. नेहाने परिधान केलेल्या टी-शर्टवरील उर्दू शब्दांमुळे सोशल मीडियावर वाद निर्माण झाला. या टी-शर्टवर एका कार्टून पात्रासोबत उर्दूमध्ये ‘अल्लाह’ हा शब्द लिहिलेला असल्याचे दिसले. यामुळे नेहा स्वामीवर धार्मिक भावना दुखावल्याचा आरोप करण्यात आला. वाढत्या टीकेनंतर अर्जुन आणि नेहा यांनी सोशल मीडियावर स्पष्टीकरण देत माफी मागितली आहे.
अलीकडेच अर्जुन बिजलानी आणि नेहा स्वामी त्यांचा मुलगा अयानसोबत दिसले होते. यावेळी नेहाने टी-शर्ट आणि पॅन्ट परिधान केली होती. तिच्या टी-शर्टवरील कार्टून पात्र आणि उर्दूतील मजकूर सोशल मीडियावरील चर्चेचा विषय ठरला. या मजकुरातील धार्मिक संदर्भामुळे काही नेटकऱ्यांनी नाराजी व्यक्त केली, तर नेहाला ट्रोलिंगचाही सामना करावा लागला.
चाहत्याने भेट दिला होता टी-शर्ट
या वादावर स्पष्टीकरण देताना अर्जुन बिजलानीने आपल्या इन्स्टाग्राम स्टोरीवर सांगितले की, बँकॉकच्या सहलीदरम्यान एका चाहत्याने त्यांना हा टी-शर्ट भेट दिला होता. त्यावरील मजकूर उर्दूमध्ये असल्यामुळे त्याचा अर्थ समजला नसल्याचे त्यांनी स्पष्ट केले. टी-शर्ट घालताना त्यावरील शब्दांचे धार्मिक महत्त्व माहीत नव्हते, अशी भूमिका या जोडप्याने मांडली.
‘धार्मिक भावना दुखावण्याचा हेतू नव्हता’
अर्जुन बिजलानी आणि नेहा स्वामी यांनी सोशल मीडियावर एक निवेदन प्रसिद्ध करून या प्रकरणी माफी मागितली. टी-शर्टवरील शब्दांचा अर्थ किंवा महत्त्व नेहाला माहीत नव्हते आणि कोणत्याही व्यक्तीच्या किंवा समुदायाच्या धार्मिक भावना दुखावण्याचा त्यांचा हेतू नव्हता, असे त्यांनी स्पष्ट केले.
या निवेदनात त्यांनी सर्व धर्मांचा आणि पंथांचा आदर करत असल्याचे सांगितले. कोणाच्याही भावना दुखावतील असे कृत्य जाणूनबुजून करणार नसल्याचेही त्यांनी नमूद केले.
नेहाविरोधातील ट्रोलिंग आणि धमक्यांवरही व्यक्त केली नाराजी
टी-शर्टबाबत स्पष्टीकरण देतानाच या जोडप्याने नेहा स्वामीविरोधात करण्यात येणाऱ्या अपमानास्पद टिप्पण्या, शिवीगाळ आणि धमक्यांबद्दल नाराजी व्यक्त केली. धार्मिक विषयांबाबत लोकांच्या भावना तीव्र असू शकतात, हे मान्य करतानाच माहितीचा अभाव हा कोणालाही ऑनलाइन त्रास देण्याचा किंवा धमकावण्याचा आधार ठरू शकत नाही, असे त्यांनी म्हटले.
अर्जुन आणि नेहा यांनी सर्वांना हे प्रकरण संवेदनशीलतेने, सहानुभूतीने आणि परस्पर आदराने हाताळण्याचे आवाहन केले. द्वेष पसरवणे किंवा नेहा आणि तिच्या कुटुंबाला लक्ष्य करण्याऐवजी संवादातून परिस्थिती सोडवावी, अशी भूमिका त्यांनी मांडली.
या स्पष्टीकरणानंतर टी-शर्टवरून सुरू झालेल्या वादात नेहा स्वामी आणि अर्जुन बिजलानी यांनी आपली बाजू स्पष्ट केली आहे. धार्मिक भावना आणि सोशल मीडियावरील ट्रोलिंग या दोन्ही मुद्द्यांमुळे हे प्रकरण चर्चेत आले आहे.
.png "Videos"){kind=small}
