
(फोटो सौजन्य- सोशल मीडिया)
Delhi 2021 Trailer: २०२१ साली कोरोना महामारीने संपूर्ण जगभरात हाहाकार माजवला होता. भारतानेही आपल्या इतिहासातील सर्वात आव्हानात्मक काळ अनुभवला. या काळात अनेकांना आपले प्राण गमवावे लागले, तर अनेकांनी लाखो रुपये खर्च करूनही आपल्या जवळच्या व्यक्तींना वाचवण्याचा प्रयत्न केला. रुग्णालयांमध्ये बेड मिळवण्यापासून ते ऑक्सिजन सिलिंडरची व्यवस्था करण्यापर्यंत सर्वसामान्यांची मोठी धावपळ सुरू होती. अशा कठीण परिस्थितीत काही जणांनी संधी साधत ऑक्सिजन सिलिंडर तब्बल २ लाख रुपयांना विकल्याचेही समोर आले होते. याच काळातील काळीज पिळवटून टाकणारी कहाणी आता ‘दिल्ली २०२१’ या चित्रपटातून प्रेक्षकांसमोर येणार आहे. रिचा चड्ढा, सुमीत व्यास, गुलशन ग्रोव्हर, सुष्मिता मुखर्जी आणि सोनाली कुलकर्णी यांच्या प्रमुख भूमिका असलेल्या या चित्रपटाचा ट्रेलर प्रदर्शित झाला आहे.
‘दिल्ली २०२१’चा ट्रेलर कोविड-१९ महामारीच्या काळातील दिल्लीतील भयावह परिस्थिती दाखवतो. रुग्णालयांमध्ये बेड आणि ऑक्सिजन सिलिंडरचा प्रचंड तुटवडा निर्माण झाला होता. डॉक्टर रुग्णांचे प्राण वाचवण्यासाठी धडपडत होते, तर रुग्णांचे कुटुंबीय मदतीसाठी हतबल झाले होते.
अभिषेक आचार्य यांनी या चित्रपटाचे दिग्दर्शन केले आहे. चित्रपटाची कथा एसएल क्रिटिकल केअर हॉस्पिटलच्या पार्श्वभूमीवर आधारित आहे. ट्रेलरच्या सुरुवातीलाच रुग्णालयात बेड उपलब्ध आहे का, अशी विचारणा करणारा फोन येतो. त्यावर बेड उपलब्ध असल्याचे सांगितले जाते; मात्र रुग्णाला आणण्यासाठी रुग्णवाहिकेची व्यवस्था करण्यास सांगितले जाते.
यानंतर सुमीत व्यास यांचे पात्र संताप व्यक्त करताना दिसते. “एक जण लस बनवतोय, दुसरा विषाणू बनवतोय, आणि ते दोघे मिळून आमची वाट लावत आहेत,” असा संवाद ट्रेलरमध्ये ऐकायला मिळतो.
DPIFF Awards 2026: ‘धुरंधर’चा दादासाहेब फाळके पुरस्कार सोहळ्यात डंका! रणवीर सिंह, अक्षय खन्नासह अनेक कलाकारांचा गौरव
ऑक्सिजनचा तुटवडा आणि औषधांसाठीची धडपड
ट्रेलरमध्ये रिचा चड्ढा, सोनाली कुलकर्णी आणि इतर डॉक्टर महामारीमुळे निर्माण झालेल्या गोंधळाचा सामना करताना दिसतात. डॉक्टर रुग्णांचे प्राण वाचवण्यासाठी प्रयत्नांची पराकाष्ठा करत असताना रुग्णालयाबाहेरील गोंधळ, ऑक्सिजनचा काळाबाजार आणि रुग्णांच्या कुटुंबीयांची असहायता यावरही प्रकाश टाकण्यात आला आहे.
ऑक्सिजनच्या तुटवड्यामुळे अनेक रुग्णालयांमध्ये कोविड रुग्णांच्या मृत्यूचे प्रमाण वाढत असल्याचेही ट्रेलरमध्ये दाखवण्यात आले आहे. याशिवाय टोसिलोमॅक्स नावाच्या औषधाचीही चर्चा होते. प्रभावी मानले जाणारे हे औषध उपलब्ध नसल्यामुळे डॉक्टरांसमोर आणखी मोठे आव्हान उभे राहते. “कोविड कोणालाच कळत नाही, डॉक्टरसुद्धा झगडत आहेत,” असे पात्र म्हणताना दिसतात.
ट्रेलरमधील शेवटचा प्रसंग विशेष लक्ष वेधून घेतो. एसएल क्रिटिकल केअर हॉस्पिटलच्या सीईओ डॉ. कनिका सक्सेना मदतीसाठी आर्त विनंती करताना दिसतात. “जर आम्हाला पुढच्या दोन तासांत ऑक्सिजन आणि मदत मिळाली नाही, तर अनेक रुग्णांना वाचवणे कठीण होईल. कृपया आम्हाला मदत करा आणि आतापर्यंत ऑक्सिजन मिळवून द्या,” असे त्या म्हणतात. हा प्रसंग पाहून प्रेक्षकांना कोरोनाकाळातील कठीण दिवसांची आठवण होऊ शकते.
‘दिल्ली २०२१’ कधी आणि कुठे पाहता येणार?
ट्रेलरसोबतच निर्मात्यांनी चित्रपटाच्या प्रदर्शनाची तारीखही जाहीर केली आहे. अभिषेक आचार्य दिग्दर्शित ‘दिल्ली २०२१’ हा चित्रपट २५ नोव्हेंबर २०२६ रोजी झी५ (ZEE5) या ओटीटी प्लॅटफॉर्मवर प्रदर्शित होणार आहे. कोरोना महामारीच्या काळातील संघर्ष, डॉक्टरांची धडपड आणि माणुसकीची परीक्षा मांडणारा हा चित्रपट प्रेक्षकांच्या मनाला भिडणार का, हे पाहणे महत्त्वाचे ठरेल.