(फोटो सौजन्य- सोशल मीडिया)
Drishyam 3 Review: अभिनेता अजय देवगणच्या बहुचर्चित ‘दृश्यम ३’ची सर्वत्र जोरदार चर्चा सुरू आहे. हा बहुप्रतीक्षित चित्रपट आज, २ ऑक्टोबरला चित्रपटगृहात प्रदर्शित होत आहे. ‘दृश्यम’ आणि ‘दृश्यम २’ या दोन्ही चित्रपटांच्या सस्पेन्सने प्रेक्षकांना खिळवून ठेवलं होतं. त्यामुळे आता तिसऱ्या भागाची कथा कोणतं वळण घेणार, याची उत्सुकता प्रेक्षकांमध्ये आहे.
चित्रपट प्रदर्शित होण्यापूर्वीच ट्रेड अ‍ॅनालिस्ट तरण आदर्श यांनी ‘दृश्यम ३’ पाहून आपली प्रतिक्रिया दिली आहे. त्यांनी चित्रपटाला ४.५ स्टार रेटिंग दिलं असून, हा चित्रपट मागील दोन्ही भागांपेक्षा सरस असल्याचं म्हटलं आहे.
तरण आदर्श यांनी सोशल मीडियावर ‘दृश्यम: द कन्क्लुजन’चं कौतुक केलं आहे. त्यांच्या मते, चित्रपट प्रेक्षकांच्या अपेक्षांवर खरा उतरतो.
“दृश्यम: द कन्क्लुजन विलक्षण आहे. हा चित्रपट प्रेक्षकांच्या उच्च अपेक्षांवर खरा उतरतो. निःसंशयपणे, हा ‘दृश्यम’ फ्रँचायझीमधील सर्वोत्तम चित्रपट आहे, ज्यामुळे तो २०२६ मधील सर्वोत्कृष्ट चित्रपटांपैकी एक ठरतो,” असं त्यांनी म्हटलं आहे.
चित्रपटाची कथा आणि कलाकारांचा अभिनय प्रभावी असल्याचंही त्यांनी नमूद केलं. अजय देवगणने विजय साळगावकरची भूमिका पुन्हा एकदा ताकदीने साकारल्याचं त्यांनी म्हटलं आहे. विशेषतः अजय देवगण आणि जयदीप अहलावत यांच्यातील संघर्ष प्रेक्षकांचं लक्ष वेधून घेणारा असल्याचं तरण आदर्श यांनी सांगितलं.
अभिषेक पाठक यांच्या दिग्दर्शनाचं कौतुक
‘दृश्यम ३’चं दिग्दर्शन अभिषेक पाठक यांनी केलं आहे. त्यांच्या दिग्दर्शनाचं आणि लेखनाचं तरण आदर्श यांनी विशेष कौतुक केलं.
“अभिषेक पाठक यांनी पुन्हा एकदा सिद्ध केलं आहे की ते आजच्या काळातील सर्वोत्तम कथाकारांपैकी एक का आहेत. त्यांना या फ्रँचायझीची नस अचूक समजली आहे आणि जुनेच फॉर्म्युले पुन्हा न वापरता ते कथेला पुढे नेतात,” अशी प्रतिक्रिया त्यांनी दिली.
दिग्दर्शन आणि लेखन हे चित्रपटाचे दोन मजबूत आधारस्तंभ असल्याचंही त्यांनी म्हटलं आहे. पूर्वार्धातील अजय देवगण आणि जयदीप अहलावत यांच्यातील संघर्ष हा चित्रपटातील प्रमुख आकर्षण असल्याचं त्यांनी नमूद केलं.
चित्रपटातील कोर्टरूममधील दृश्यांचंही तरण आदर्श यांनी कौतुक केलं आहे. प्रकाश राज यांचं अजय देवगण आणि त्याच्या कुटुंबासोबतचं पहिलं दृश्य विशेष प्रभावी असल्याचं त्यांनी म्हटलं.
‘दृश्यम’ फ्रँचायझीमध्ये क्लायमॅक्सला विशेष महत्त्व आहे. त्यामुळे तिसऱ्या भागाचा शेवट प्रेक्षकांच्या अपेक्षांवर खरा उतरतो का, याबाबतही त्यांनी प्रतिक्रिया दिली.
“आता सर्वात महत्त्वाच्या क्लायमॅक्सबद्दल बोलूया—तो अपेक्षांवर खरा उतरतो का? त्याचा शेवट पटण्यासारखा आहे का? तो तुम्हाला समाधानी करतो का? हो, नक्कीच… क्लायमॅक्स दमदार, खिळवून ठेवणारा आणि पूर्णपणे समाधानकारक आहे,” असं त्यांनी म्हटलं.
अजय देवगण, जयदीप अहलावत आणि तब्बूच्या अभिनयाचं कौतुक
तरण आदर्श यांनी चित्रपटातील कलाकारांच्या अभिनयाचंही कौतुक केलं आहे. अजय देवगणने विजय साळगावकरची आव्हानात्मक भूमिका प्रभावीपणे साकारल्याचं त्यांनी म्हटलं.
विशेषतः मध्यांतरापूर्वी अजय देवगण आणि जयदीप अहलावत यांच्यातील दृश्य दमदार असल्याचं त्यांनी नमूद केलं. जयदीप अहलावतची ‘दृश्यम ३’मधील एन्ट्री प्रभावी असून त्याचा संयमित अभिनय चित्रपटाच्या आकर्षणांपैकी एक असल्याचं तरण आदर्श यांनी म्हटलं आहे.
तब्बूच्या अभिनयाचंही त्यांनी कौतुक केलं. राग, दुःख, सूड आणि दृढनिश्चय अशा विविध भावना तिने प्रभावीपणे साकारल्याचं त्यांनी सांगितलं.
प्रकाश राज, श्रिया सरन आणि रजत कपूर यांचंही कौतुक
प्रकाश राज यांच्या पडद्यावरील प्रभावी उपस्थितीमुळे कथेला वजन मिळत असल्याचं तरण आदर्श यांनी म्हटलं आहे. श्रिया सरन जबरदस्त फॉर्ममध्ये असल्याचं, तर रजत कपूर यांनी आपल्या भूमिकेत प्रतिष्ठा आणि सत्यता आणल्याचं त्यांनी नमूद केलं.
याशिवाय कमलेश सावंत यांच्या अभिनयाचंही त्यांनी कौतुक केलं आहे. इशिता दत्ता आणि मृणाल जाधव आपापल्या भूमिकांमध्ये ठीक असल्याचं त्यांनी म्हटलं.
.png "Videos"){kind=small}
