( फोटो सौजन्य- सोशल मिडिया)
Kriti Sanon Raksha Bandhan Ad: बॉलिवूड अभिनेत्री कृती सेनन सध्या तिच्या आगामी चित्रपटांपेक्षा एका रक्षाबंधन विशेष जाहिरातीमुळे चर्चेत आहे. या जाहिरातीतील तिच्या कपड्यांवरून सोशल मीडियावर मोठा वाद निर्माण झाला होता. आता या वादाच्या पार्श्वभूमीवर ज्या ज्वेलरी कंपनीसाठी कृतीने ही जाहिरात केली होती, त्या कंपनीने ती सर्व प्लॅटफॉर्मवरून हटवल्याची माहिती समोर आली आहे.
कृती सॅनॉनला एका प्रसिद्ध ज्वेलरी ब्रँडच्या रक्षाबंधन विशेष जाहिरातीत दाखवण्यात आले होते. या जाहिरातीत कृतीने पांढऱ्या रंगाचा ब्रॅलेटसदृश पोशाख परिधान केला होता. जाहिरातीमध्ये ती आपल्या भावाला तसेच एका पाळीव कुत्र्याला राखी बांधताना दिसली. मात्र, तिच्या कपड्यांवरून काही नेटकऱ्यांनी आक्षेप घेत सोशल मीडियावर टीका करण्यास सुरुवात केली.
या जाहिरातीवरून सुरू झालेला वाद पुढे वाढत गेला. अभिनेत्री कंगना रणौतसह काही सेलिब्रिटींनीही कृती सॅनॉनच्या जाहिरातीवर टीका केली. त्यामुळे सोशल मीडियावर या जाहिरातीची चर्चा अधिकच रंगली.
वाद वाढल्यानंतर २६ ऑगस्ट रोजी कंपनीने कृती सेननची ही रक्षाबंधन जाहिरात यूट्यूबसह विविध प्लॅटफॉर्मवरून हटवली. वृत्तसंस्था एएनआयने आपल्या एक्स हँडलवरून याबाबत माहिती दिली.
GIVA removes its Raksha Bandhan ad featuring actress Kriti Sanon. GIVA — “We have the highest regard and deep respect for Indian culture, traditions and festivals. As a brand, we have always believed in celebrating these joyous moments with the entire family and this time we… pic.twitter.com/eTWv4Ax0uR — ANI (@ANI) August 26, 2026
जाहिरात मागे घेतल्यानंतर कंपनीने आपल्या निवेदनातून स्पष्टीकरण दिले. भारतीय संस्कृती, परंपरा आणि सणांबद्दल कंपनीला अत्यंत आदर असल्याचे त्यांनी म्हटले. रक्षाबंधनाचा आनंद संपूर्ण कुटुंबासोबत साजरा करण्यासोबतच हा उत्सव पाळीव प्राण्यांपर्यंत पोहोचवण्याचा प्रयत्न जाहिरातीच्या माध्यमातून करण्यात आला होता.
मात्र, या जाहिरातीमुळे समाजातील काही घटकांच्या भावना नकळत दुखावल्या गेल्या असतील, तर तसा आपला कोणताही हेतू नव्हता, असे कंपनीने स्पष्ट केले. तसेच आदराचे प्रतीक म्हणून सर्व माध्यमांमधून जाहिरात मागे घेत असल्याचेही कंपनीने सांगितले.
दरम्यान, या जाहिरातीवरून होणाऱ्या ट्रोलिंगवर कृती सेनननेही प्रतिक्रिया दिली होती. महिलांनी काय घालावे आणि काय घालू नये, हे सांगणे थांबवले पाहिजे, असे अभिनेत्रीने म्हटले.
“महिलांनी काय घालावे किंवा काय घालू नये हे त्यांना सांगू नका. सण, चालीरीती आणि परंपरा यांचा कपड्यांशी काहीही संबंध नाही,” असे कृतीने आपल्या निवेदनात म्हटले.
आता कंपनीनेच ही जाहिरात मागे घेतल्याने रक्षाबंधनाच्या निमित्ताने सुरू झालेला हा वाद पुन्हा चर्चेत आला आहे. जाहिरात, अभिनेत्रीचे कपडे आणि त्यानंतर कंपनीने घेतलेला निर्णय यावर सोशल मीडियावर विविध प्रतिक्रिया उमटत आहेत.
.png "Videos"){kind=small}
