Dharau Marathi Movie: पाकिस्तानातही मराठी चित्रपट ‘धाराऊ’चा डंका! अधिकृत टीझर प्रदर्शित, २६ पुरस्कारांचा मान

Dharau Marathi Movie: मराठी चित्रपट ‘धाराऊ’चा अधिकृत टीझर प्रदर्शित झाला आहे. दिग्दर्शक मनिष सुरेश शिंदे यांच्या दाव्यानुसार चित्रपटाला २६ पुरस्कार मिळाले असून, २३ ऑक्टोबर २०२६ रोजी चित्रपटगृहांत प्रदर्शित होणार आहे.

Dharau Marathi Movie: ‘धाराऊ… ती गाय नाय… माय हाय!’ या लक्षवेधी टॅगलाइनमुळे चर्चेत आलेल्या आगामी मराठी चित्रपट ‘धाराऊ’चा अधिकृत टीझर नुकताच प्रदर्शित झाला आहे. ग्रामीण महाराष्ट्रातील जीवनशैली, भारतीय संस्कृती आणि गोमातेप्रती असलेली श्रद्धा यांची झलक या टीझरमधून पाहायला मिळते. एका लहान मुलाचे आणि गायीचे भावनिक नाते अधोरेखित करणाऱ्या या टीझरमुळे चित्रपटाविषयीची उत्सुकता वाढली आहे. विशेष म्हणजे, या चित्रपटाला आतापर्यंत २६ राष्ट्रीय आणि आंतरराष्ट्रीय पुरस्कार मिळाल्याचा दावा दिग्दर्शक मनिष सुरेश शिंदे यांनी केला आहे. पाकिस्तानातील पेशावर इंटरनॅशनल फिल्म फेस्टिव्हलमध्ये ‘बेस्ट डेब्यू फीचर फिल्म’ पुरस्कार मिळाल्याची माहितीही त्यांनी दिली.

पाकिस्तानातील चित्रपट महोत्सवात ‘धाराऊ’चा गौरव

दिग्दर्शक मनिष सुरेश शिंदे यांचा हा पहिलाच मराठी चित्रपट आहे. ‘धाराऊ’ला विविध राष्ट्रीय आणि आंतरराष्ट्रीय पुरस्कार मिळाल्याने चित्रपटाच्या प्रवासाला महत्त्व प्राप्त झाले आहे. पाकिस्तानातील पेशावर इंटरनॅशनल फिल्म फेस्टिव्हलमध्ये ‘बेस्ट डेब्यू फीचर फिल्म’ पुरस्कार मिळाल्याचे शिंदे यांनी सांगितले. या सन्मानामुळे चित्रपटाच्या विषयाची आंतरराष्ट्रीय स्तरावर दखल घेतली गेल्याची भावना त्यांनी व्यक्त केली.

चित्रपटामागील भूमिका स्पष्ट करताना दिग्दर्शक मनिष सुरेश शिंदे म्हणाले की, प्रत्येक जण आपल्या परीने गोमातेच्या संरक्षणासाठी आणि संवर्धनासाठी काम करत असतो. कुणी गोशाळा उभारून गोपालन करतो, तर कुणी विविध माध्यमांतून जनजागृती करतो. चित्रपटाच्या माध्यमातून या विषयावर भाष्य करण्याचा आपला प्रयत्न असल्याचे त्यांनी सांगितले.

हिंदू धर्मात गायीला मातेचे स्थान का दिले जाते आणि ती पूजनीय का मानली जाते, यामागील भावना व विचार ‘धाराऊ’मधून मांडण्याचा प्रयत्न केल्याचेही त्यांनी नमूद केले. चित्रपटाला मिळालेल्या पुरस्कारांबद्दल आनंद व्यक्त करताना, चित्रपटामागचा विचार प्रेक्षकांपर्यंत पोहोचेल, अशी आशा त्यांनी व्यक्त केली.

लहान मुलगा आणि गायीच्या नात्याची भावनिक कथा

‘धाराऊ’च्या टीझरमध्ये ग्रामीण महाराष्ट्रातील वातावरण, धार्मिक स्थळांची पार्श्वभूमी आणि गायीच्या सहवासातील बालपणाची झलक पाहायला मिळते. गोमातेप्रती श्रद्धा, माणुसकी, ग्रामीण संस्कृती आणि भावनिक नात्यांचा वेध या चित्रपटातून घेण्यात आला आहे. ‘धाराऊ… ती गाय नाय… माय हाय!’ ही टॅगलाइन या नात्याची भावनिक खोली अधोरेखित करते.

टीझरमधील दृश्यांमुळे चित्रपटाच्या कथेविषयी कुतूहल निर्माण झाले असून, ग्रामीण जीवनातील श्रद्धा आणि माणुसकीचे पैलू मोठ्या पडद्यावर कशा प्रकारे मांडले जाणार, याची प्रेक्षकांना उत्सुकता आहे.

Gondhal Marathi Movie: ऑस्कर २०२७ मध्ये ऐतिहासिक झेप! होम्बळे फिल्म्सच्या माध्यमातून ‘गोंधळ’ चित्रपट जगभरात प्रदर्शित होणार

२३ ऑक्टोबरला चित्रपटगृहांत होणार प्रदर्शित

बुलढाणा अर्बन मीडिया हाऊस आणि हिंदचित्र फिल्म्स प्रस्तुत ‘धाराऊ’ या चित्रपटाची निर्मिती श्री. राधेश्यामजी चांडक (भाईजी), डॉ. श्री. सुकेशजी झंवर आणि सौ. कोमलजी झंवर यांनी केली आहे. चित्रपटाची कथा, पटकथा, संवाद आणि दिग्दर्शनाची जबाबदारी मनिष सुरेश शिंदे यांनी सांभाळली आहे.

‘धाराऊ’ हा मराठी चित्रपट २३ ऑक्टोबर २०२६ पासून महाराष्ट्रातील चित्रपटगृहांमध्ये प्रदर्शित होणार आहे. अधिकृत टीझरच्या प्रदर्शनासह चित्रपटाला मिळालेल्या पुरस्कारांची चर्चा सुरू झाली असून, आता प्रेक्षक या चित्रपटाच्या प्रदर्शनाची प्रतीक्षा करत आहेत.

Tanushree Dutta: ‘त्यांच्या नावावर फुटेज..’, तनुश्री दत्ताच्या नाना पाटेकरांवरील वक्तव्याने नवा वाद; रोजलीन खानचा संताप, म्हणाली..