(फोटो सौजन्य- इन्स्टाग्राम)
कलर्स मराठीवरील ‘जय जय स्वामी समर्थ’ या मालिका ही घराघरांत पोहोचली आहे. जय जय स्वामी समर्थ ही मालिका डिसेंबर 2020 मध्ये प्रेक्षकांच्या भेटीला आली. या मालिकेने आजवर सतराशेहून अधिक भाग पूर्ण केले आहेत. ही मालिका घराघरांत प्रचंड लोकप्रिय आहे. आता या मालिकेबद्दल एक मोठी अपडेट समोर येत आहे. या लोकप्रिय मालिकेत खूप मोठा बदल करण्यात येणार आहे.
या मालिकेत अभिनेता अक्षय मुदावडकर गेली पाच वर्ष श्री स्वामी समर्थांची भूमिका साकारत आहे. मात्र, आता या अभिनेत्याने स्वामींच्या भूमिकेतून निरोप घेतला आहे. सध्या मालिकेत महानिर्वाणाचा अध्याय सुरू आहे. त्यामुळे स्वामी समर्थांच्या भूमिकेसाठी आता ज्येष्ठ कलाकराची निवड करण्यात आली आहे. इथून पुढे जय जय स्वामी समर्थ मालिकेत सुनील गोडसे हे स्वामींची भूमिका साकारणार आहेत. गेली पाच वर्ष स्वामींची भूमिका साकरण्याची संधी दिल्याबद्दल अक्षय मुदावडकरने व्हिडिओ पोस्ट करत कलर्स मराठीचे आभार मानले आहेत.
मालिकेला निरोप देताना अक्षय मुदावडकरची भावनिक पोस्ट
अभिनेता अक्षय मुदावडकरने सांगितलं की,नमस्कार! गेली पाच वर्षे आणि जवळपास १७५० हून अधिक भाग मला स्वामींची भूमिका साकारायला मिळाली यासाठी मी स्वत:ला भाग्यवान समजतो आणि हा स्वामींचा आशीर्वाद मानतो. त्याचबरोबर गेली पाच वर्षे तुम्ही रसिक प्रेक्षकांनी माझ्यावर जे प्रेम केलंत…त्याकरता मी तुमचा कायम ऋणी असेन. पण, जेव्हा एखादा प्रवास सुरू होतो, तेव्हा हा प्रवास कुठेतरी थांबणार हे निश्चित असतं. त्याचप्रमाणे माझा सुद्धा स्वामींच्या भूमिकेतील प्रवास हा इथवरच होता. पण, हा प्रवास आज तरी थांबत असला तरी ही भूमिका आणि हा संपूर्ण प्रवास माझ्यासाठी कायम स्पेशल असेल. भविष्यात मी विविध भूमिका केल्या तरी स्वामींची भूमिका माझ्यासाठी कायम अग्रस्थानी असेल. तेव्हा पुन्हा एकदा मी तुम्हा रसिक प्रेक्षकांचे मनापासून आभार मानतो. कलर्स मराठी वाहिनीचे आभार मानतो, निर्मात्यांनी मला संधी दिली त्यामुळे त्यांचेही आभार…म्हणून मला ही भूमिका साकारता आली.”
मालिकेत पुढे दिसणार नसल्याचं सांगत अक्षय मुदावडकर यांनी चाहत्यांना दिलासा दिला आहे. ते म्हणाले की, मालिकेत भेट होणार नसली तरी ते सोशल मीडियावर सक्रिय राहणार आहेत आणि आपल्या आयुष्यातील अपडेट्स तिथे शेअर करत राहतील.शेवटी त्याने पुन्हा एकदा प्रेक्षकांचे मनापासून आभार मानत “श्री स्वामी समर्थ!” असा भावनिक निरोप दिला.
.png "Videos"){kind=small}
