(फोटो सौजन्य-सोशल मीडिया)
Pallavi Joshi-Vivek Agnihotri: दिवाळी म्हटलं की दिवे, रोषणाई आणि फटाक्यांची आतषबाजी आलीच. मात्र, फटाक्यांमुळे अनेकदा अपघाताच्या घटनाही घडतात. अशीच एक घटना मराठी अभिनेत्री पल्लवी जोशी आणि त्यांचे पती, प्रसिद्ध बॉलिवूड दिग्दर्शक विवेक अग्निहोत्री यांच्या घरी घडली. दिवाळीदरम्यान रॉकेट थेट त्यांच्या घराच्या बाल्कनीत पडल्याने सोफ्याला आग लागली. या घटनेनंतर विवेक अग्निहोत्री यांनी सोशल मीडियावर पोस्ट शेअर करत फटाक्यांच्या आतषबाजीवर प्रश्न उपस्थित केले होते. मात्र, काही वेळानंतर त्यांनी ही पोस्ट डिलीट केली. आता पोस्ट हटवण्यामागचे कारणही त्यांनी स्पष्ट केले आहे.
विवेक अग्निहोत्री यांनी सोशल मीडिया प्लॅटफॉर्म X वर पोस्ट शेअर करत या घटनेची माहिती दिली होती. त्यांनी मुंबईच्या महापौरांना उद्देशून लिहिले होते, “प्रिय महापौर मॅडम, काल रात्री आमच्या बाल्कनीतील सोफ्याला आग लागली.” रॉकेट सोफ्यावर पडल्याने ही आग लागल्याचे त्यांनी सांगितले. या घटनेच्या निमित्ताने त्यांनी फटाक्यांमुळे होणाऱ्या धोक्यांकडे प्रशासनाचे लक्ष वेधण्याचा प्रयत्न केला.
फटाके फोडण्यावर विवेक अग्निहोत्रींनी उपस्थित केले प्रश्न
विवेक अग्निहोत्री यांनी आपल्या पोस्टमध्ये दिवाळी साजरी करण्याबाबत कोणाचाही विरोध नसल्याचे स्पष्ट केले. मात्र, फटाके फोडणे हा आपल्या संस्कृतीचा भाग कधीच नव्हता, असे मत त्यांनी मांडले. आपली संस्कृती कोणाचाही जीव किंवा घर धोक्यात घालण्याची शिकवण देत नाही, असेही त्यांनी म्हटले.
याशिवाय, त्यांनी प्रशासनाच्या जबाबदारीवरही प्रश्न उपस्थित केले. अग्निसुरक्षेची खात्री करणे, न्यायालयाच्या आदेशांची अंमलबजावणी करणे आणि नागरिकांमध्ये जनजागृती करणे ही संबंधित अधिकाऱ्यांची जबाबदारी असल्याचे त्यांनी नमूद केले. मुंबईतील आगीच्या घटनांची चौकशी करून जिथे निष्काळजीपणा आढळेल, तिथे जबाबदारी निश्चित करण्याची मागणीही त्यांनी केली.
I am deleting my previous tweet. Neither do I want to be the reason for anyone’s outrage nor do I want to enable or weaken anyone’s cultural or environmental narrative. Happy Diwali to everyone, once again.
🇮🇳 🪔 — Vivek Ranjan Agnihotri (@vivekagnihotri) November 9, 2026
या घटनेबाबत केलेली पोस्ट सोशल मीडियावर चर्चेत आल्यानंतर विवेक अग्निहोत्री यांनी ती डिलीट केली. त्यानंतर त्यांनी आणखी एक पोस्ट शेअर करत यामागचे कारण स्पष्ट केले. त्यांनी लिहिले, “मी माझे जुने ट्विट हटवत आहे. मला कोणाचाही रोष ओढवून घ्यायचा नाही. मला कोणाच्याही सांस्कृतिक किंवा पर्यावरणीय कथनाला मोठेपणा द्यायचा नाही किंवा त्यात फेरफार करायचा नाही.”
दरम्यान, विवेक अग्निहोत्री यांच्या पहिल्या पोस्टवर सोशल मीडियावर संमिश्र प्रतिक्रिया उमटल्या. काहींनी त्यांच्या भूमिकेला पाठिंबा दिला, तर काहींनी त्यांच्यावर टीका केली. त्यामुळे सोफ्याला आग लागण्याच्या घटनेसोबतच त्यांनी पोस्ट डिलीट करण्याचा घेतलेला निर्णयही चर्चेचा विषय ठरला आहे.
.png "Videos"){kind=small}
