( फोटो सौजन्य- सोशल मीडिया)
Rani Mukerji Mother Death : बॉलिवूडमधून एक दु:खद बातमी समोर आली आहे. अभिनेत्री राणी मुखर्जी हिच्या आई कृष्णा मुखर्जी यांचं वयाच्या ७५व्या वर्षी निधन झालं आहे. मुखर्जी कुटुंबीयांनी मंगळवारी निवेदन जारी करत त्यांच्या निधनाची माहिती दिली. कृष्णा मुखर्जी यांच्या निधनाचं वृत्त समोर आल्यानंतर चित्रपटसृष्टीत शोककळा पसरली आहे.
कुटुंबीयांनी त्यांच्या निधनाला दुजोरा देत हा आपल्यासाठी अत्यंत कठीण आणि दु:खाचा काळ असल्याचं म्हटलं आहे. तसेच या कठीण प्रसंगी कुटुंबाच्या गोपनीयतेचा आदर करण्याचं आवाहन त्यांनी केलं आहे. कृष्णा मुखर्जी यांच्यासाठी मिळालेलं प्रेम, प्रार्थना आणि पाठिंबा याबद्दल कुटुंबीयांनी सर्वांचे आभार मानले आहेत.
राणी मुखर्जी तिच्या आईच्या खूप जवळ होती. अनेक प्रसंगी तिने आपल्या आईसोबतच्या नात्याबद्दल मनमोकळेपणाने सांगितलं आहे. कृष्णा मुखर्जी या राणीसाठी केवळ आई नव्हत्या, तर तिच्या आयुष्यातील आणि अभिनयाच्या प्रवासातील महत्त्वाची प्रेरणा होत्या.
राणीच्या अभिनय कारकिर्दीत आईचा प्रभाव अनेकदा पाहायला मिळाला आहे. विशेषतः ‘मिसेस चॅटर्जी व्हर्सेस नॉर्वे’ या चित्रपटातील भूमिका साकारताना तिला आईकडून मोठी प्रेरणा मिळाली होती.
‘मिसेस चॅटर्जी व्हर्सेस नॉर्वे’मध्ये राणीने आपल्या मुलांना परत मिळवण्यासाठी संघर्ष करणाऱ्या बंगाली आईची भूमिका साकारली होती. या भूमिकेसाठी तिने मूळ कथेशी संबंधित माहिती आणि संदर्भांचा अभ्यास केला होता. मात्र, पात्राला स्वतःची बाजू देताना तिच्या आईचा वैयक्तिक प्रभावही महत्त्वाचा ठरला.
२०२३ मध्ये चित्रपटाच्या प्रमोशनदरम्यान राणीने आपल्या आईकडून मिळालेल्या प्रेरणेबद्दल सांगितलं होतं. तिच्या मते, कृष्णा मुखर्जी या बंगाली संस्कृतीचं अतिशय मजबूत प्रतिनिधित्व करणाऱ्या व्यक्ती होत्या.
मुलांना स्वतःच्या हाताने खाऊ घालणं, कपाळावर टिळक लावणं आणि घरातील छोट्या-छोट्या गोष्टींकडे लक्ष देणं अशा आईच्या सवयी राणीने या भूमिकेसाठी जवळून पाहिल्या होत्या. आपल्या आईकडून या पात्रासाठी ताकद आणि प्रेरणा मिळाल्याचं तिने सांगितलं होतं.
कृष्णा मुखर्जी यांचं चित्रपटसृष्टीशीही होतं खास नातं
कृष्णा मुखर्जी यांचं चित्रपटसृष्टीशी असलेलं नातं केवळ राणी मुखर्जीच्या आईपुरतं मर्यादित नव्हतं. त्या माजी पार्श्वगायिका होत्या आणि त्यांनी संगीत क्षेत्रात काम केलं होतं. त्यामुळे राणीचं बालपणही सिनेमा आणि संगीताच्या वातावरणात गेलं.
कृष्णा मुखर्जी यांचा विवाह चित्रपट निर्माते राम मुखर्जी यांच्याशी झाला होता. राम मुखर्जी यांचा हिंदी चित्रपटसृष्टीशी दीर्घ संबंध होता. ते फिल्मालय स्टुडिओच्या सह-संस्थापकांपैकी एक होते. २०१७ मध्ये राम मुखर्जी यांचं निधन झालं.
राणी मुखर्जीने आपल्या कारकिर्दीत अनेक वेगवेगळ्या भूमिका साकारल्या. मात्र, तिच्या वैयक्तिक आयुष्यात आई कृष्णा मुखर्जी यांचं स्थान नेहमीच खास राहिलं. राणीच्या अभिनय प्रवासात कृष्णा यांनी तिच्या कामाचा जवळून पाठपुरावा केला आणि आपल्या अनुभवातून तिला सतत प्रेरणा दिली.
आईकडून मिळालेली मूल्यं आणि कुटुंबातील संस्कार हे आपल्या व्यक्तिमत्त्वाचा महत्त्वाचा भाग असल्याचं राणीच्या याआधीच्या वक्तव्यांमधून स्पष्ट झालं आहे. आता कृष्णा मुखर्जी यांच्या निधनानंतर मुखर्जी कुटुंबावर दु:खाचा डोंगर कोसळला आहे. या कठीण काळात कुटुंबीयांनी चाहत्यांना आणि जनतेला त्यांच्या गोपनीयतेचा आदर करण्याचं आवाहन केलं आहे.
.png "Videos"){kind=small}
