Bus Accident: “पिशवीत सापडलेल्या टाचण्या, लिंबू अन् सिमकार्ड…” नाशिकच्या द्वारका चौकातील काळजाचा ठोका चुकवणारा अपघात…

Bus Accident: नाशिकच्या द्वारका चौकात काळीज पिळवटून टाकणारा अपघात! येवल्याहून काम आटोपून घरी परतणाऱ्या सुरेखा जाधव एसटी बसच्या चाकाखाली चिरडल्या; ३ तासांच्या शर्थीनंतर सिमकार्डवरून पटली ओळख, सणाच्या तोंडावर कुटुंबावर दुःखाचा डोंगर!

• नाशिकमध्ये एसटी बसच्या चाकाखाली चिरडून महिला ठार
• मृतदेह बाहेर काढण्यास रिक्षाचालकांची मदत; ओळख पटण्यास ३ तास
• सिमकार्डवरून सुनेशी संपर्क साधून पटवली ओळख

Bus Accident: नाशिकच्या अत्यंत गजबजलेल्या द्वारका चौकात एका भीषण आणि काळीज पिळवटून टाकणाऱ्या अपघाताने संपूर्ण शहरावर शोककळा पसरवली आहे. न्यायालयाच्या कायदेशीर कामासाठी येवला येथे गेलेल्या आणि तिथून संध्याकाळी नाशिकला परतणाऱ्या ५४ वर्षीय सुरेखा जाधव यांना काळाने गाठले. रस्ता ओलांडत असताना भरधाव एसटी बसच्या पुढच्या चाकाखाली आल्यामुळे त्यांचा जागीच दुर्दैवी मृत्यू झाला.

हेही वाचा: Mumbai Fire: “आगीचे लोळ अन् लोकांमध्ये प्रचंड दहशत!” प्रभादेवी परिसरात भीषण दुर्घटनेने उडाली खळबळ; अग्निशमन पथक घटनास्थळी दाखल!

घर गाठण्याआधीच काळाचा घाला

सुरेखा जाधव या नाशिकच्या उपनगर भागात वास्तव्यास होत्या. त्या शनिवारी (दि. ७) न्यायालयाच्या कामानिमित्त येवला येथे गेल्या होत्या. दिवसभराचे काम आटोपून ‘आता लवकर घरी जाऊन कुटुंबासोबत सणाचा आनंद घेऊया,’ या अपेक्षेने त्या नाशिकला परतल्या. मात्र, द्वारका चौकात रस्ता ओलांडत असताना मालेगावहून नाशिकच्या दिशेने येणाऱ्या एसटी बसने (एमएच १४, एनई ४७२४) त्यांना जोरदार धडक दिली आणि पुढच्या चाकाखाली चिरडले. हा अपघात इतका भीषण होता की बघणाऱ्यांच्या अंगावर काटा आला.

हेही वाचा: Highway Accident: “मदतीचा हात ठरला काळ!” रस्त्यात रडणाऱ्या महिलेला धीर देण्यासाठी थांबलेल्या तरुणाचा भरधाव टेम्पोच्या धडकेत…

ओळख पटवण्यासाठी पोलिसांची ३ तास धडपड

अपघातानंतर घटनास्थळी नागरिकांची प्रचंड गर्दी जमली. बसखाली अडकलेला छिन्नभिन्न मृतदेह बाहेर काढण्यासाठी भद्रकाली पोलिसांना स्थानिक रिक्षाचालकांची मदत घ्यावी लागली. मृतदेह तातडीने जिल्हा रुग्णालयात पाठवण्यात आला, परंतु अवस्था अत्यंत वाईट असल्याने ओळख पटवण्यात मोठा अडथळा निर्माण झाला. पोलिसांनी महिलेच्या पिशवीची पाहणी केली असता त्यात काही रक्कम, डायरी, लिंबू आणि टाचण्या आढळून आल्या. महिलेचा मोबाईल फुटलेला असल्याने पोलिसांनी त्यातील सिमकार्ड काढून दुसऱ्या मोबाईलमध्ये टाकले आणि डायरीतील क्रमांकांवर संपर्क साधला. अखेर सुनेशी संपर्क झाल्यानंतर मिळालेल्या वर्णनावरून मृत महिला सुरेखा जाधव असल्याचे निष्पन्न झाले. ऐन सणाच्या तोंडावर कुटुंबातील कर्त्या महिलेचा असा करुण अंत झाल्याने हळहळ व्यक्त होत आहे.