The Traitors Season 2: आजपासून सुरू होणार ‘द ट्रेटर्स २’; कुठे आणि कधी पाहता येणार? जाणून घ्या स्पर्धकांची संपूर्ण यादी

The Traitors Season 2: करण जोहर पुन्हा होस्टच्या भूमिकेत दिसणार आहे. ‘द ट्रेटर्स २’चा प्रीमियर १३ ऑगस्टला या ओटीटीवर होणार असून जाणून घ्या स्पर्धकांची संपूर्ण यादी.

The Traitors Season 2: प्रेक्षकांमध्ये उत्सुकता निर्माण करणारा ‘द ट्रेटर्स’ या रिअॅलिटी शोचा दुसरा सीझन आज, गुरुवारपासून पुन्हा एकदा प्रेक्षकांच्या भेटीला येत आहे. या सीझनमध्ये अभिनेते, विनोदी कलाकार, उद्योजक, शेफ, संगीतकार, रिअॅलिटी स्टार्स आणि डिजिटल क्रिएटर्स अशा विविध क्षेत्रांतील स्पर्धकांचा सहभाग आहे. त्यामुळे यंदाचा सीझन आणखी मनोरंजक होण्याची शक्यता आहे.

‘द ट्रेटर्स २’ कधी आणि कुठे पाहता येणार?

‘द ट्रेटर्स सीझन २’चा प्रीमियर १३ ऑगस्ट रोजी होणार आहे. हा शो प्राइम व्हिडिओवर स्ट्रीम केला जाणार आहे. पहिल्या सीझनप्रमाणेच यंदाही करण जोहर शोचं सूत्रसंचालन करणार आहे. शोचे नवीन भाग दर गुरुवारी प्रेक्षकांना पाहता येणार आहेत.

कोण-कोणते स्पर्धक सहभागी?

‘द ट्रेटर्स २’मध्ये यंदा अनेक लोकप्रिय चेहरे सहभागी झाले आहेत. मल्लिका शेरावत, रिया चक्रवर्ती, मुनव्वर फारुकी, श्वेता तिवारी, क्रिस्टल डिसूझा, अभिषेक मल्हान, शालिनी पासी, पारुल गुलाटी, दलीप ताहिल, रणवीर ब्रार, शहनिल गिल, हरमन सिंघा, आदित्य कुलश्रेष्ठ, तनिष्ठा मेहरा, कर्ण चोप्रा आणि प्रिशा यांच्यासह अनेक स्पर्धक शोमध्ये दिसणार आहेत.

विविध क्षेत्रांतील या सेलिब्रिटींना एकाच घरात एकत्र आणून त्यांच्या रणनीती, मैत्री आणि विश्वासाची परीक्षा घेतली जाणार आहे.

कुठे झालं ‘द ट्रेटर्स २’चं शूटिंग?

मिळालेल्या रिपोर्ट्सनुसार, पहिल्या सीझनप्रमाणेच ‘द ट्रेटर्स सीझन २’चं शूटिंग राजस्थानमधील जैसलमेर येथील सूर्यगढ पॅलेसमध्ये करण्यात आलं आहे. आलिशान राजेशाही पार्श्वभूमीवर खेळला जाणारा हा खेळ शोला आणखी खास बनवणार आहे.

‘द ट्रेटर्स’मध्ये नेमकं काय होतं?

‘द ट्रेटर्स’मध्ये सहभागी स्पर्धकांची मुख्यतः दोन गटांमध्ये विभागणी केली जाते—‘ट्रेटर्स’ आणि ‘इनॉसंट्स’. ट्रेटर्सना आपली खरी ओळख इतर स्पर्धकांपासून लपवून ठेवायची असते आणि इनॉसंट्सना एकेक करून गेममधून बाहेर काढायचं असतं.

दुसरीकडे, इनॉसंट्सचं काम ट्रेटर्सना ओळखून त्यांना गेममधून बाहेर काढण्याचं असतं. यासाठी शोमध्ये विविध टास्क आणि रणनीतीचे टप्पे पाहायला मिळतात. त्यामुळे कोणावर विश्वास ठेवायचा आणि कोण आपली फसवणूक करतंय, याचा अंदाज लावणं स्पर्धकांसाठी आव्हानात्मक ठरणार आहे.

‘द ट्रेटर्स १’चे विजेते कोण?

‘द ट्रेटर्स’च्या पहिल्या सीझनमध्ये उर्फी जावेद आणि निकिता लुथरा यांनी बाजी मारली होती. आता दुसऱ्या सीझनमध्ये कोण विजेता ठरणार, याकडे प्रेक्षकांचं लक्ष लागलं आहे.

Aai Tuljabhavani: ‘इंद्रायणी’ फेम सांची भोयर साकारणार ‘लहान तुळजाई’; ‘आई तुळजाभवानी’मध्ये होणार मोठा दैवी खुलासा

मल्लिका शेरावतचा टॉम क्रूझबद्दल मोठा दावा

शोच्या प्रीमियरआधी प्रदर्शित झालेल्या प्रोमोजपैकी मल्लिका शेरावतचा एक प्रोमो सोशल मीडियावर चांगलाच व्हायरल झाला आहे. या प्रोमोमध्ये मल्लिकाने टॉम क्रूझला तिच्यावर क्रश असल्याचा दावा केला आहे.

प्रोमोमध्ये मल्लिकाला तिचा कोणावर क्रश आहे का, असं विचारण्यात येतं. सुरुवातीला ती याला नकार देते. मात्र, त्यानंतर ती म्हणते की प्रत्येकाचा कोणावर ना कोणावर तरी क्रश असतो आणि सध्या टॉम क्रूझचा तिच्यावर क्रश असल्याचं ती सांगते.

टॉम क्रूझ तिला सोशल मीडियावर व्हिडिओ पाठवत असल्याचाही दावा मल्लिकाने केला. हे व्हिडिओ कोणत्या प्रकारचे असतात, असं विचारल्यावर ती दोघे एकत्र पार्टी करत असल्याचं सांगते. तिच्या या दाव्यामुळे प्रोमोची सोशल मीडियावर चांगलीच चर्चा रंगली आहे.

आता करण जोहरच्या सूत्रसंचालनाखाली ‘द ट्रेटर्स २’मध्ये कोण ट्रेटर ठरतं आणि कोण इनॉसंट राहून अंतिम विजय मिळवतं, हे पाहणं उत्सुकतेचं ठरणार आहे.

Kangana Ranaut: ‘Gen-Z’ला ‘Generation Gutter’ म्हणणं कंगना रणौतला पडलं महागात; FIR दाखल, कोर्टात सुनावणी होणार