( फोटो सौजन्य- सोशल मिडिया)
Tumbbad 2:‘तुम्बाड’ या कल्ट चित्रपटाच्या चाहत्यांसाठी एक रंजक बातमी समोर आली आहे. ‘तुम्बाड 2’च्या लोकेशन रेकीदरम्यान टीमला पहिल्या भागाशी संबंधित काही मूळ वस्तू सापडल्या आहेत. वाड्याची रेकी करताना टीमच्या हाती ‘आटे की गुडिया’चे मूळ साचे आणि वाड्याचं कुलूप उघडण्यासाठी वापरण्यात आलेलं साधन लागलं. वर्षानुवर्षे याच ठिकाणी जतन करून ठेवलेल्या या वस्तू पाहून टीमच्या जुन्या आठवणींना उजाळा मिळाला.
‘तुम्बाड’च्या पहिल्या भागाच्या चित्रीकरणात वापरण्यात आलेले ‘आटे की गुडिया’चे साचे त्याच ठिकाणी वर्षानुवर्षे तसेच पडून होते. ‘तुम्बाड 2’साठी लोकेशन शोधताना टीमला अचानक हे साचे दिसले. त्यानंतर पहिल्या चित्रपटात वापरण्यात आलेलं मूळ कुलूप उघडण्याचं साधनही टीमच्या हाती लागलं.
या अनपेक्षित शोधामुळे ‘तुम्बाड 2’च्या टीमसाठी हा क्षण भावुक आणि नॉस्टॅल्जिक ठरला. पहिल्या चित्रपटाचं वैशिष्ट्यपूर्ण विश्व उभं करण्यासाठी केलेल्या मेहनतीच्या आठवणी या वस्तूंमुळे पुन्हा ताज्या झाल्या.
एका क्रू मेंबरने या प्रसंगाची आठवण सांगताना म्हटलं की, टीम केवळ रेकीसाठी वाड्यात गेली होती आणि पहिल्या चित्रपटाशी संबंधित काही सापडेल, अशी त्यांना अजिबात अपेक्षा नव्हती. मात्र ‘आटे की गुडिया’चे साचे दिसताच जुन्या आठवणी जाग्या झाल्या. त्यानंतर मूळ कुलूप उघडण्याचं साधन सापडणं हा आणखी एक अविश्वसनीय अनुभव होता.
इतक्या वर्षांनंतरही या वस्तू त्याच ठिकाणी पाहणं टीमसाठी विशेष होतं. जणू काही त्या लोकेशनने ‘तुम्बाड’च्या निर्मितीशी संबंधित छोट्या-छोट्या आठवणी जपून ठेवल्या होत्या आणि टीम परत येण्याची वाट पाहत होत्या.
दरम्यान, ‘तुम्बाड’च्या दुसऱ्या भागाबद्दल प्रेक्षकांमध्ये मोठी उत्सुकता आहे. सोहम शाह, आलिया भट्ट आणि नवाजुद्दीन सिद्दीकी हे कलाकार या नव्या अध्यायात एकत्र दिसणार आहेत. सोहम शाह यांनी जुलैमध्ये या कास्टिंगची घोषणा केली होती.
2018 मध्ये प्रदर्शित झालेल्या ‘तुम्बाड’मध्ये सोहम शाह प्रमुख भूमिकेत होते. लोककथा, भय आणि रहस्य यांचं अनोखं मिश्रण असलेल्या या चित्रपटाने आपल्या दृश्यात्मक शैलीमुळे प्रेक्षकांच्या मनात वेगळं स्थान निर्माण केलं. 2024 मध्ये चित्रपटाचं थिएटरमध्ये पुनर्प्रदर्शन झाल्यानंतर त्याला पुन्हा मोठा प्रतिसाद मिळाला.
‘तुम्बाड 2’ची निर्मिती Sohum Shah Films या बॅनरअंतर्गत सोहम शाह करत आहेत. निर्माते डॉ. जयंतीलाल गडा यांच्या नेतृत्वाखालील Pen Studiosसोबत त्यांनी या चित्रपटासाठी हातमिळवणी केली आहे. चित्रपटाचं दिग्दर्शन आदेश प्रसाद करत आहेत.
विशेष म्हणजे ‘तुम्बाड 2’ हा चित्रपट 3 डिसेंबर 2027 रोजी चित्रपटगृहात प्रदर्शित होणार आहे. त्यामुळे पहिल्या भागाच्या आठवणी जपणाऱ्या या अनपेक्षित शोधामुळे सिक्वेलबद्दलची चाहत्यांची उत्सुकता आणखी वाढली आहे.
.png "Videos"){kind=small}
