भारतीय वंशाची आर्या वाळवेकर ठरली यावर्षीची ‘मिस इंडिया यूएसए’

भारतासाठी एक आनंदाची बातमी आहे. अमेरिकेत पार पडलेल्या ‘मिस इंडिया यूएसए’ (Miss India USA 2022)  या स्पर्धेत भारतीय वंशाच्या आर्या वाळवेकरनं (Arya Walvekar) मिस इंडिया युएसए हा किताब पटकावला. ‘मिस इंडिया यूएसए’, ‘मिसेस इंडिया यूएसए’ आणि ‘मिस टीन इंडिया यूएसए’ या तीन वेगवेगळ्या स्पर्धेचं नुकतचं आयोजन करण्यात आलं होतं. यामध्ये 74 स्पर्धकांनी तीस राज्यांचं प्रतिनिधित्व केलं होतं.

‘मिस इंडिया यूएसए व्यतिरिक्त मिसेस इंडिया यूएसए आणि मिस टीन इंडिया यूएसए या स्पर्धाही आयोजित करण्यात आल्या होत्या. व्हर्जिनिया (Virginia) येथे राहणाऱ्या आर्या वाळवेकर हिने यावर्षी ‘मिस इंडिया यूएसए 2022’चा (Miss India USA 2022) किताब पटकावला आहे. तर, वॉशिंग्टन येथील अक्षी जैन मिसेस इंडिया यूएसए झाली तसेच न्यूयॉर्कमधील तन्वी ग्रोवरची मिस टीन इंडिया यूएसए म्हणून निवड करण्यात आली आहेतिन्ही श्रेणीतील विजेत्यांना पुढील वर्षाच्या सुरुवातीला मुंबईला जाण्याची संधी दिली जाईल.

आर्याला अभिनयाची आवड

18 वर्षीय आर्याला न्यू जर्सी इथं पार पडलेल्या वार्षिक स्पर्धेत ‘मिस इंडिया यूएसए 2022’चा मुकुट परिधान करण्यात आला. सौंदर्यस्पर्धेचं विजेतेपद पटकावल्यानंतर अभिनेत्री बनण्याची आकांक्षा बाळगणारी आर्या म्हणाली, “स्वत:ला मोठ्या पडद्यावर पाहणं, चित्रपट किंवा टेलिव्हिजनमध्ये काम करणं हे माझं लहानपणापासूनचं स्वप्न होतं.”

मिस इंडिया यूएसए स्पर्धा म्हणजे काय?

भारताबाहेर आयोजित करण्यात येणारी ही भारतीय विजेतेपदासाठीची स्पर्धा आहे. वर्ल्डवाईड पिजंट्सच्या बॅनरखाली न्यूयॉर्कस्थित भारतीय-अमेरिकन नीलम सरन यांनी ही स्पर्धा प्रथम आयोजीत केली होती. वर्ल्डवाईड पेजंट्सचे संस्थापक आणि अध्यक्ष धर्मात्मा सरन यावेळी म्हणाले की, , ‘गेल्या काही वर्षांपासून जगभरातील भारतीयांकडून मला या स्पर्धेसाठी मिळालेल्या पाठिंब्याबद्दल मी त्यांचा आभारी आहे’.