कर्नाटक उच्च न्यायालयाच्या मुख्य न्यायमूर्तीपदी न्या. वराळे यांची नियुक्ती

२९ सप्टेंबर रोजी झालेल्या बैठकीत प्रसन्न वराळे यांच्यासह इतर राज्यातील आणखी दोन न्यायमूर्तींची वेगवेगळ्या ठिकाणी मुख्य न्यायमूर्ती म्हणून नियुक्ती करण्याची शिफारस केली. त्यानुसार त्यांची नियुक्ती करण्यात आली आहे.

मुंबई : मुंबई उच्च न्यायालयातील (Bombay High Court) वरिष्ठ न्यायमूर्ती प्रसन्न वराळे (Sr. Justice Prasanna Varale) यांची कर्नाटक उच्च न्यायालयाच्या (Karnataka High Court) मुख्य न्यायमूर्तीपदी नियुक्ती करण्याची शिफारस सर्वोच्च न्यायालयाच्या कॉलेजियमने समितीने केंद्र सरकारला करण्यात आली होती. २९ सप्टेंबर रोजी झालेल्या बैठकीत प्रसन्न वराळे यांच्यासह इतर राज्यातील आणखी दोन न्यायमूर्तींची वेगवेगळ्या ठिकाणी मुख्य न्यायमूर्ती म्हणून नियुक्ती (Appointment) करण्याची शिफारस केली. त्यानुसार त्यांची नियुक्ती करण्यात आली आहे.

सरन्यायाधीश उदय लळीत (CJI Uday Lalit) यांच्या नेतृत्वात कॉलेजियमची बैठक झाली होती. न्यायमूर्ती वराळे यांनी कायद्याची पदवी मिळविल्यानंतर ऑगस्ट १९८५ पासून ऍड. एस. एन. लोया यांच्या मार्गदर्शनाखाली वकिली व्यवसायाला सुरुवात केली. दरम्यान, त्यांनी औरंगाबाद येथील आंबेडकर विधी महाविद्यालयात १९९० ते १९९२ पर्यंत प्राध्यापक म्हणूनही कार्य केले. तसेच, ते मुंबई उच्च न्यायालयाच्या औरंगाबाद खंडपीठामध्ये सहाय्यक सरकारी वकील म्हणून देखील काही काळ कार्यरत होते. त्यानंतर १८ जुलै २००८ रोजी त्यांची मुंबई उच्च न्यायालयात न्यायमूर्तीपदी नियुक्ती करण्यात आली. तेव्हापासून ते या न्यायालयात कार्यरत आहेत.

मुंबई उच्च न्यायालयाचे मुख्य न्यायमूर्ती दीपांकर दत्ता यांची नुकतेच झालेल्या कॉलेजियमच्या बैठकीमध्ये सर्वोच्च न्यायालयाच्या न्यायमूर्तीपदी नियुक्ती करण्यात यावी याकरिता राष्ट्रपती यांच्याकडे शिफारस केली होती. तर, न्या. वराळे यांची कर्नाटक उच्च न्यायालयाच्या मुख्य न्यायमूर्ती पदी नियुक्ती करण्याची केंद्र सरकारने अधिसूचना जारी केली आहे. न्या. वराळे हे मुंबई उच्च न्यायालयाचे दुसऱ्या क्रमांकावरील न्यायमूर्ती आहेत.