नवीन संसद तयार!  जाणून घ्या उद्घाटनासाठी 28 मे ही तारीख का निवडली

28 मे रोजी पंतप्रधान नरेंद्र मोदी संसदेच्या नव्याने बांधलेल्या इमारतीचे उद्घाटन करणार आहेत. बांधकाम पूर्ण झाल्यानंतर लोकसभा अध्यक्ष ओम बिर्ला यांनी पंतप्रधान मोदींची भेट घेतली आणि त्यांना या इमारतीचे उद्घाटन करण्याची विनंती केली.

5 ऑगस्ट 2019 रोजी, लोकसभा आणि राज्यसभेने सरकारला नवीन संसद भवन बांधण्याची विनंती केली. यानंतर 10 डिसेंबर 2020 रोजी पंतप्रधान नरेंद्र मोदी यांनी नवीन संसद भवनाची पायाभरणी केली. संसदेची नवनिर्मित इमारत विक्रमी वेळेत दर्जेदारपणे तयार करण्यात आली आहे. इमारत तयार करण्याची जबाबदारी टाटा यांच्याकडे देण्यात आली आहे.

लोकसभेचे अध्यक्ष ओम बिर्ला यांनी म्हटले आहे की नवीन संसद भवनाचे बांधकाम आता पूर्ण झाले आहे आणि नवीन इमारत स्वावलंबनाचे प्रतीक आहे.

एकीकडे संसदेची नवनिर्मित इमारत भारताच्या वैभवशाली लोकशाही परंपरा, संविधानिक मूल्यांना अधिक समृद्ध करण्याचे काम करेल, असा दावा केला जात आहे, तर दुसरीकडे अत्याधुनिक सुविधांनी सुसज्ज असलेल्या या इमारतीत खासदार त्यांचे काम अधिक चांगल्या पद्धतीने करू शकतील, असा विश्वास व्यक्त केला जात आहे.

नवीन इमारतीच्या बांधकामाबाबत काँग्रेस सुरुवातीपासूनच प्रश्न उपस्थित करत आहे. बांधकाम सुरू असतानाही सरकार करदात्यांच्या पैशाची उधळपट्टी करत असल्याचे काँग्रेसने म्हटले होते. गुरुवारीही पंतप्रधान मोदी नवीन इमारतीचा आढावा घेत असल्याचे चित्र ट्विट करताना काँग्रेसने टोमणा मारला. काँग्रेसचे सरचिटणीस जयराम रमेश यांनी मोदींचे छायाचित्र ट्विट करत लिहिले, “28 मे रोजी उद्घाटन होणाऱ्या नवीन संसद भवनाचे एकमेव वास्तुविशारद, डिझायनर आणि मजूर… चित्र हे सर्व सांगते. वैयक्तिक महत्त्वाकांक्षेचा प्रकल्प.”

पंतप्रधान नरेंद्र मोदी यांच्या कार्यकाळाला 30 मे रोजी नऊ वर्षे पूर्ण होत आहेत. पहिल्यांदा मोदींनी 26 मे 2014 रोजी आणि दुसऱ्यांदा 30 मे 2019 रोजी पंतप्रधानपदाची शपथ घेतली. 28 मे हा विनायक दामोदर सावरकर यांची जयंतीदिन आहे.  इंग्रजांच्या राजवटीत सावरकरांना अंदमानात कैद करण्यात आले होते. यंदा त्यांची १४० वी जयंती साजरी होणार आहे. पण उद्घाटनाची तारीख निवडण्यामागे हेच कारण आहे का, याची पुष्टी झालेली नाही.

आणखी एक वस्तुस्थिती अशी आहे की अटलबिहारी वाजपेयी यांच्या नेतृत्वाखालील भाजप सत्तेत असताना 26 फेब्रुवारी 2003 रोजी संसदेच्या सेंट्रल हॉलमध्ये सावरकरांच्या चित्राचे अनावरण करण्यात आले होते. त्यावेळी विरोधी पक्षांनी विरोध केला. काँग्रेस आणि डाव्या पक्षांनी या सोहळ्यावर बहिष्कार टाकला होता.

ब्रिटिश राजवटीत 1927 मध्ये जुन्या संसदेची इमारत बांधण्यात आली आणि कालांतराने ती खासदारांना बसण्यासाठी खूपच लहान होऊ लागली. लोकसभा सचिवालयाचे म्हणणे आहे की, नवीन गरजा लक्षात घेता जुनी इमारत यापुढे योग्य राहिली नाही कारण खासदारांना जागेअभावी बसण्यास त्रास होत होताच, शिवाय जुन्या इमारतीत आधुनिक सुविधा आणि तंत्रज्ञानाचाही अभाव होता.

जुलैच्या तिसऱ्या आठवड्यात सुरू होणाऱ्या संसदेच्या पावसाळी अधिवेशनाचे कामकाज नव्या इमारतीतच सुरू होईल, अशी अपेक्षा आहे. मात्र, याबाबत अद्याप कोणतीही अधिकृत माहिती समोर आलेली नाही.

संसदेच्या सध्याच्या इमारतीत लोकसभेत 550 तर राज्यसभेत 250 सदस्यांची आसनव्यवस्था आहे. भविष्यातील गरजा लक्षात घेऊन संसदेच्या नव्याने बांधलेल्या इमारतीत लोकसभेचे 888 आणि राज्यसभेचे 384 सदस्य बसू शकतील. इमारत बांधण्यासाठी सुमारे 1200 कोटी रुपये खर्च आला आहे.

Web Title: New parliament ready know why may 28 was chosen as the date for inauguration nrab

Get Latest  Marathi News ,  Maharashtra News and  Marathi News from Politics,  Election News ,  Sports News ,  Entertainment News,  Business News and   Religion News  only on Navarashtra.com