Smriti Irani Gas Protest : LPG चा तुटवडा अन् स्मृती इराणींविरुद्ध Viral झाले मीम्स; लापता लेडीज अन्…

गॅसच्या किंमती वाढल्यामुळे स्मृती इराणी यांनी काँग्रेस सरकारच्या काळामध्ये जोरदार आंदोलन केले होते. यावरुन आता गॅस तुटवड्यावरुन त्यांच्यावर टीका केली जात आहे.

Smriti Irani Gas Protest : नवी दिल्ली : आखाती देशांमध्ये सुरु असलेल्या युद्धाचा परिणाम भारतावर जाणवू लागला आहे. महाराष्ट्रसह विविध राज्यांमध्ये एलपीजी गॅसचा तुटवडा (LPG Gas) भासत असून यामुळे विरोधकांनी आक्रमक भूमिका घेतली आहे. व्यावसायिक सिलेंडर मिळणे बंद झाले असून घरगुती गॅसची टंचाई निर्माण झाली आहे. याच पार्श्वभूमीवर काळाबाजार वाढला असून सामान्य जनतेचे हाल होत आहेत. यामुळे केंद्र आणि राज्यातील विरोधकांनी मोदी सरकारला धारेवर धरले. तसेच मोदी सरकारमधील माजी मंत्री स्मृती इराणी (Smriti Irani) यांना देखील या वादामध्ये पुन्हा घेरण्यात आले आहे.

 

 

गॅसच्या किंमती वाढल्यामुळे स्मृती इराणी यांनी काँग्रेस सरकारच्या काळामध्ये जोरदार आंदोलन केले होते. जेव्हा गॅसचे दर ₹४००-५०० च्या आसपास होते, तेव्हा स्मृती इराणी आणि भाजप नेत्यांनी रस्त्यावर उतरून आंदोलन केले होते. सिलेंडरच्या किंमती 50 रुपयांनी वाढल्याने त्यांनी जोरदार आंदोलन केले होते. भाजपच्या या आंदोलनाचे नेतृत्व स्मृती इराणी यांनी केले होते. तसेच त्या रस्त्यावर गॅस सिलेंडर घेऊन ठिय्या आंदोलन केले. यानंतर आता युद्धाच्या परिस्थितीमुळे देशात एलपीजी गॅस सिलेंडरचा तुटवडा निर्माण झाला आहे. यावरुन टीका करताना विरोधकांनी पुन्हा स्मृती इराणींना लक्ष्य केले.

हे देखील वाचा : अजित पवार अपघात की घातपात? ‘ब्लॅक बॉक्स’मध्ये छेडछाड होत असल्याचा रोहित पवारांचा खळबळजनक दावा

शिवसेना ठाकरे गटाचे खासदार संजय राऊत यांनी गॅसच्या तुटवड्यावर सोशल मीडिया पोस्ट केली. यामध्ये त्यांनी माजी मंत्री स्मृती इराणी यांचा AI (कृत्रीम बुद्धीमत्ता) वापरुन तयार केलेला फोटो शेअर केला आहे. या पोस्टमध्ये स्मृती इराणी यांना उद्देशून लापता लेडीज असा टोला लगावला आहे. काँग्रेस काळातील आंदोलनाची आठवण करुन देत हा टोला लगावण्यात आला आहे.
याचबरोबर महाराष्ट्र काँग्रेसने देखील व्हिडिओ शेअर करुन स्मृती इराणींवर निशाणा साधला. कुठे हरवल्या स्मृती इराणी? सिलेंडर तुम्हाला बोलावतोय, अशी टीका काँग्रेसकडून करण्यात आली आहे. या व्हिडिओमध्ये पंतप्रधान नरेंद्र मोदी आणि माजी मंत्री स्मृती इराणी डोक्यावर सिलेंडर घेऊन पळत असल्याचे व्यंगात्मक चित्र रेखाटण्यात आले आहे.

See more

pic.twitter.com/WcdjyKB0xD — Sanjay Raut (@rautsanjay61) March 13, 2026

हे देखील वाचा : संसदेच्या पायऱ्यांवर विरोधकांची ‘चायपार्टी’! राहुल गांधींवर भाजपने साधला निशाणा

विरोधकांची संसदेच्या पायऱ्यांवर चहा-पार्टी

देशामध्ये युद्धामुळे एलपीजी गॅसचा तुटवडा निर्माण झाल्याने विरोधकांनी संसदेच्या आवारामध्ये चूल मांडली होती. यावेळी जोरदार घोषणाबाजी करत मोदी सरकरावर टीका करण्यात आली. तसेच हे परराष्ट्र धोरणाचे अपयश असल्याचे देखील विरोधकांनी म्हटले आहे. यामुळे राहुल गांधींच्या नेतृत्वामध्ये विरोधकांनी केलेल्या आंदोलनामध्ये गॅस तुटवड्यावरुन आक्रमक भूमिका घेतली. मात्र यावेळी संसदेच्या आवारात राहुल गांधींसह इतर विरोधी खासदारांनी चहा-बिस्किट खाल्ले. याचे फोटो आणि व्हिडिओ समोर आल्यानंतर वाद निर्माण झाला आहे.