नवी दिल्ली : केंद्रीय वाणिज्य मंत्रालयाच्या अंतर्गत परराष्ट्र व्यापार महासंचालकांनी (डीजीएफटी) गेल्या आठवड्यात कांद्याच्या निर्यातीसंदर्भात आदेश जारी केला होता. 31 मार्च 2024 पर्यंत लागू असलेला कांदा निर्यात बंदीचा आदेश पुढील सूचनेपर्यंत वाढवण्यात आल्याचे सांगण्यात आले. त्यानंतर नाशिकच्या घाऊक बाजारात कांद्याच्या दरात घसरण सुरू झाली आहे. त्याचा परिणाम म्हणून देशभरातील महत्त्वाच्या बाजारात कांद्याचे भाव गडगडले आहेत.
गेल्या आठवड्यात नाशिकच्या लासलगाव मंडईत कांद्याचा सरासरी भाव 1440 ते 1500 रुपये प्रतिक्विंटल होता. तो 1300 ते 1360 रुपये प्रतिक्विंटलपर्यंत खाली आला आहे. पुढच्या महिन्यापासून निर्यात सुरू झाल्यास भाव वाढतील, असे पूर्वी शेतकऱ्यांना वाटले होते, असे व्यापाऱ्यांचे म्हणणे आहे. आता बंदीची मुदत आणखी वाढवण्यात आल्याने बाजारातील भाव ढासळले आहे. त्यामुळे कांद्याचे घाऊक भाव कमी झाले आहेत.
सरकारी खरेदी सुरू
दरम्यान, सरकारने कांदा खरेदी सुरू करण्याची घोषणा केली असून, या हंगामात सरकारी संस्था पाच लाख टन कांदा खरेदी करणार असल्याची बातमी केंद्रीय ग्राहक व्यवहार मंत्रालयाकडून आली आहे. केंद्र सरकारने नॅशनल अॅग्रिकल्चरल को-ऑपरेटिव्ह मार्केटिंग फेडरेशन ऑफ इंडिया (नाफेड) आणि नॅशनल को-ऑपरेटिव्ह कंझ्युमर फेडरेशन ऑफ इंडिया (एनसीसीएफ) यांना बफरच्या गरजेसाठी थेट शेतकऱ्यांकडून कांदा खरेदी सुरू करण्याचे निर्देश दिले आहेत. नाशिक मंडईत कांद्याचे भाव फारसे पडू नयेत म्हणून हे पाऊल उचलण्यात आले आहे.
.png "Videos"){kind=small}
