“UPSC ला मला अपात्र ठरविण्याचा अधिकार…”; पूजा खेडकरचे दिल्ली हायकोर्टात लेखी उत्तर सादर

पूजा खेडकरने दिल्ली हायकोर्टात दाखल केलेल्या उत्तरात म्हटले आहे की, यूपीएससीने २०१९, २०२१ आणि २०२२ मध्ये पर्सनॅलिटी टेस्टमध्ये सायबर आणि फिंगरप्रिंटच्या माध्यमातून माझी ओळख व्हेरीफाईड केली गेली आहे.

वादग्रस्त प्रशिक्षणार्थी आयएएस अधिकरी पूजा खेडकर यांच्या अडचणी दिवसेंदिवस वाढत चालल्या आहेत. आयएएस अधिकारी बनण्यासाठी त्यांनी केलेले फसवणुकीचे प्रकार समोर आल्यानंतर पूजा खेडकर यांच्याविरोधात आता दिल्लीतही गुन्हा दाखल करण्यात आला आहे. यूपीएससीने दिल्ली पोलिसांकडे पूजा खेडकर यांच्याविरोधात गुन्हा दाखल केला आहे. त्यानंतर पूजा खेडकर यांना दिल्ली हायकोर्टाने अटकेपासून संरक्षण दिले होते. वादग्रस्त अधिकारी पूजा खेडकर यांनी दिल्ली हायकोर्टात आपले उत्तर दाखल केले आहे.

वादग्रस्त प्रशिक्षणार्थी आयएएस अधिकरी पूजा खेडकर यांनी दिल्ली हायकोर्टात आपले उत्तर दाखल करताना युपीएससीकडे आपल्याला अपात्र ठरविण्याचा अधिकार नसल्याचे म्हटले आहे. एकदा अधिकारी म्हणून निवड आणि नियुक्ती झाली की प्रशिक्षणार्थी अधिकाऱ्याला अपात्र ठरवण्याचे अधिकार युपीएससीकडे राहत नाहीत. माझ्यावर केवळ केंद्र सरकारचा DoPT विभागच कारवाई करू शकतो असे पूजा खेडकर म्हणाल्या आहेत.

२०१२ ते २०२२ पर्यंत माझ्या नावात किंवा आडनावामध्ये कोणताही बदल झालेला नाही. तसेच युपीएस्सीला मी कोणतीही चुकीची माहिती दिलेली नाही. यूपीएससीने माझी कागदपत्र बायोमेट्रिक पद्धतीने वेरिफाइड केली आहेत. तसेच यात कोणतेही आक्षेप आयोगाने घेतले नाही. माझे शैक्षणिक प्रमाणपत्र, आधार कार्ड, जन्मतारीख आणि वैयक्तिक माहितीसह इतर सर्व तपशील तपशीलवार अर्जात देण्यात आले आहेत.

पूजा खेडकरने दिल्ली हायकोर्टात दाखल केलेल्या उत्तरात म्हटले आहे की, यूपीएससीने २०१९, २०२१ आणि २०२२ मध्ये पर्सनॅलिटी टेस्टमध्ये सायबर आणि फिंगरप्रिंटच्या माध्यमातून माझी ओळख व्हेरीफाईड केली गेली आहे. मी माझ्या नावातील व प्रमाणपात्रातील बदल प्रतिज्ञापत्र आणि अधिकृत राजपत्र देखील दाखल केले आहे. PWBD (बेंचमार्क अपंगत्व असलेली व्यक्ती), जात आणि वडिलांचे नाव घोषित करण्यासाठी UPSC च्या सूचनेचे पालन केले. त्यामुळे मी माझे नाव चुकीचे दिले हा आयोगाचा आरोप चुकीचा आहे.