महाराष्ट्रातील १२ वर्षीय आदित्य ब्राह्मणेला मरणोत्तर प्रधानमंत्री राष्ट्रीय बाल पुरस्कार!, वाचा त्याची शौर्यगाथा

प्रधानमंत्री राष्ट्रीय बाल पुरस्कारासाठी महाराष्ट्रातील आदित्य विजय ब्राह्मणे याची निवड करण्यात आली आहे. या पुरस्कारासाठी देशभरातून 19 मुलांची निवड करण्यात येते. यामध्ये आदित्यचा देखील समावेश असून त्याच्या शौर्यासाठी मरणोत्तर पुरस्कार देऊन गौरवण्यात आले आहे.

दिल्ली : अमृतमहोत्सवी प्रजासत्ताक दिनाची (75th Republic Day) सर्वत्र जोरदार तयारी सुरु आहे. दरम्यान, प्रधानमंत्री राष्ट्रीय बाल पुरस्कारासाठी (PM National Child Awards) महाराष्ट्रातील आदित्य विजय ब्राह्मणे (Aditya Vijaya Brahmane) याची निवड करण्यात आली आहे. या पुरस्कारासाठी देशभरातून 19 मुलांची निवड करण्यात येते. यामध्ये आदित्यचा देखील समावेश असून त्याच्या शौर्यासाठी मरणोत्तर पुरस्कार देऊन गौरवण्यात आले आहे.

केंद्रीय महिला आणि बालविकास मंत्रालयाने दिलेल्या माहितीनुसार, नावीन्यपूर्ण कार्य, शैक्षणिक कामगिरी, क्रीडा, कला व संस्कृती, समाजसेवा आणि शौर्य या श्रेणींमध्ये दिले जाणारे पुरस्कार सोमवारी विज्ञान भवनात आयोजित समारंभात भारताच्या राष्ट्रपतींच्या हस्ते प्रदान केले गेले. यामध्ये महाराष्ट्रातून आदित्य विजय ब्राह्मणे याला त्याच्या शौर्यासाठी मरणोत्तर हा पुरस्कार प्रदान करण्यात आला.

असे दाखवले आदित्यने शौर्य

आदित्य ब्राम्हणे हा मुळचा नंदूरबार जिल्ह्यातील रहिवासी होता. वयाच्या अगदी 12 व्या वर्षी त्य़ाने आपल्या भावंडांसाठी प्राणांची बाजी लावली. तो आणि त्याचे दोन चुलत भाऊ नदीच्या काठापाशी खेळत असताना त्याचे भाऊ पाण्यात बुडू लागले. आपल्या भावांना वाचवण्यासाठी त्याने खोल पाण्यात उडी मारली. आदित्यने हजरजबाबीपणा व शौर्य दाखवत दोन्ही भावांना जरी वाचवले मात्र त्यावेळी तो पाण्यात इतका खोल गेला की त्याला शोधणे कठीण झाले. यामध्ये त्याने आपला जीव गमावला. 12 वर्षीय आदित्य विजय ब्राम्हणे याने धाडसाने हे बचावकार्य केल्यामुळे त्याला मरणोत्तर प्रधानमंत्री राष्ट्रीय बाल पुरस्काराने गौरवण्यात आले.