लसींच्या मर्यादित साठ्याने मुंबईकर हैराण, लसीकरणाचा वेग मंदावला

मुंबई पालिकेने लसीकरणासाठी कोविन पोर्टलवरील नोंदणी बंधनकारक केली आहे. लस मिळण्यासाठी लसीकरण केंद्रांवरील गर्दीची दृश्ये पाहून पालिकेने नोंदणीचा निर्णय घेतला आहे. तसेच लसीकरण केंद्रांचे विकेंद्रीकरण होउन स्थानिकांना गर्दीत उभे राहू नये, म्हणून शहरातील २२७ विभागात स्थानिक पातळीवर लसीकरण केंद्रे सुरू करण्याचाही निर्णय घेतला. त्या निर्णयानंतर स्थानिक लोकप्रतिनिधींनी लगेचच वाजतगाजत स्थानिक लसीकरण केंद्र सुरू करुन श्रेय घेण्यास सुरुवात केली आहे. मात्र तिथेही लशींचा साठा अल्प स्वरुपात उपलब्ध असल्याने रहिवाशांची कुंचबना झाली आहे.

विभागीय केंद्रांमुळे स्थानिक रहिवाशांना मोठ्या प्रमाणात लशी मिळतील, हा हेतू सध्यातरी पूर्ण होताना दिसत नाही. त्यातच हे कमी म्हणून की काय अनेक विभागीय केंद्रांवर लस घेण्यासाठी येणारे स्थानिक विभागातील नसल्याचेही अनेकांचे म्हणणे आहे. या ठिकाणी लस घेण्यासाठी येणाऱ्यांकडे स्थानिकांनी विचारणा केली असता त्यातील काही जण त्या विभागातील रहिवासी नसल्याचे आढळून आले आहे. त्यामुळे विभागीय लसीकरण केंद्रांचा उद्देश सफल होतो का, असाही प्रश्न विचारला जात आहे.

गोरेगाव पूर्वेतील नागरी निवारा भागातील लसीकरण केंद्रांवरदेखील लस घेण्यासाठी आलेले काही जण मुंबईतील विविध भागातील होते, असे स्थानिकांचे म्हणणे आहे. याच पद्धतीचा अनुभव शहरातील अनेक केंद्रांवरही आल्याचे सांगण्यात येते. लशींचा तुटवडा असल्यानेच ही वेळ आल्याचे मुंबईकरांचे म्हणणे आहे. लसीकरणाचा गोंधळ संपला तर विभागीय केंद्रांमुळे स्थानिकांना लस मिळण्यात काहीही त्रास होणार नसल्याचे मुंबईकरांचे म्हणणे आहे.

संबंधित बातम्या