दुचाकी दुरुस्तीच्या बहाण्याने गॅरेजचालकाला दूर नेलं PhonePe वरून ‘असं’ लुबाडलं

सोमनाथ ढगे यांनी फिर्याद दिली होती. या फिर्यादीनुसार, मंगळवारी दुपारी चारच्या सुमारास ते स्वतःच्या गॅरेजवर काम करत असताना त्यांच्या ओळखीचा अविनाश देवकर हा तिथे गाडी दुरुस्तीसाठी आला.

अंबाजोगाई : शहरातील राजीव गांधी चौकात गॅरेज चालवणाऱ्या एकाला लुटल्याची घटना समोर आली. सोमनाथ मदन ढगे असे या व्यक्तीचे नाव आहे. सोमनाथ ढगे यांच्याकडून जबरदस्तीने मोबाईलमधून पैसे ट्रान्सफर करून घेतल्याचे समोर आले आहे. याप्रकरणी पोलिसांनी गुन्हा दाखल केला असून, तपास सुरु केला आहे.

सोमनाथ ढगे यांनी फिर्याद दिली होती. या फिर्यादीनुसार, मंगळवारी दुपारी चारच्या सुमारास ते स्वतःच्या गॅरेजवर काम करत असताना त्यांच्या ओळखीचा अविनाश देवकर हा तिथे गाडी दुरुस्तीसाठी आला. गाडीत काहीतरी अडचण असल्याचे सांगून त्याने गाडी चालवून पाहण्यास सांगितले आणि स्वतः पाठीमागे बसला. योगेश्वरी नगरीपर्यंत आल्यानंतर अविनाशचा मित्र अजहर अब्दुल रहेमान पठाण तेथे उभा असल्याचे दिसून आले. त्यालाही मोटरसायकलवर बसवून हे तिघे पुढे गेले.

हेदेखील वाचा : मुंबईकरांचा लोकल प्रवास आता अधिक सुरक्षित होणार, पश्चिम रेल्वेवर १२,४४६ व्हिडीओ सव्हॅलन्स सिस्टीम

योगेश्वरी नगरीच्या पुढे असलेल्या तळ्याजवळ त्याने मोटरसायकल थांबवली. याच दरम्यान, अविनाशने ढगे यांच्या खिशातून मोबाईल काढून घेतला आणि फोन-पेचा पिन नंबर विचारला. सुरुवातीला चुकीचा पिन दिल्यावर अजहरने त्याला विश्वासात घेतल्याचा बहाणा करत दबाव आणला. त्यानंतर अविनाशने जीवे मारण्याची धमकी दिल्यामुळे भीतीपोटी ढगे यांनी खरा पिन नंबर दिला.

जीवे मारण्याची धमकी

पिन मिळाल्यानंतर त्यांनी ढगे यांच्या फोन-पे अकाउंटमधून तीन व्यवहारातून एकूण ८४ हजार रुपये ट्रान्सफर करून घेतले. याबाबत कोणाला काही सांगितल्यास जीवे मारण्याची धमकी देत ढगे यांना यशवंतराव चव्हाण चौकात सोडून ते दोघे पसार झाले. अविनाश देवकर व अजहर अब्दुल रहेमान पठाण या दोघांविरुद्ध अंबाजोगाई शहर ठाण्यात गुन्हा नोंद झाला असून पुढील तपास पोलिसांकडून केला जात आहे.