Thatte Idli Recipe : सकाळच्या नाश्त्यासाठी परफेक्ट, यंदा घरी बनवा ‘थट्टे इडली’, अशी आहे रेसिपी

Breakfast Recipe : तुम्ही आजवर थट्टे इडली हा पदार्थ खाल्ला आहे का? सोशल मिडियावर ही रेसिपी चांगलीच ट्रेंड करत असून या इडलीची खासियत म्हणजे याचा मोठा आकार आहे. चला नोट करुयात याची भन्नाट रेसिपी.

• कर्नाटक राज्यात थट्टे इडली हा पदार्थ फार लोकप्रिय आहे.
• सकाळच्या नाश्त्यासाठी या पदार्थाचे सेवन केले जाऊ शकते.
• सामान्य इडलीपेक्षा याचा आकार काहीसा मोठा असतो.

दक्षिण भारतीय नाश्त्यांमध्ये इडली हा सर्वांच्या आवडीचा पदार्थ आहे. नेहमीच्या इडलीसोबतच इडलीचे अनेक प्रादेशिक प्रकारही पाहायला मिळतात. त्यापैकी कर्नाटकातील थट्टे इडली हा प्रकार विशेष प्रसिद्ध आहे. आकाराने मोठी, थोडी जाड आणि मऊसर पोत असलेली ही इडली दिसायला वेगळी असली तरी तिची तयारी नेहमीच्या इडलीसारखीच सोपी आहे. थट्टे इडलीचे वैशिष्ट्य म्हणजे ती पारंपरिक इडलीच्या साच्याऐवजी सपाट, गोल प्लेटसारख्या साच्यात वाफवली जाते. त्यामुळे इडलीचा आकार मोठा आणि सपाट दिसतो. सकाळच्या नाश्त्यासाठी ही डिश एक उत्तम पर्यंत ठरते. चला याची रेसिपी नोट करून घेऊयात.

Ganeshotsav 2026 : सणाचा गोडवा वाढवा, घरी बनवा मार्केट स्टाईल खुशखुशीत ‘बालुशाही’

साहित्य

• २ कप इडली तांदूळ किंवा साधा तांदूळ
• १ कप उडदाची डाळ
• १ चमचा मेथीदाणे
• २ ते ३ चमचे पोहे
• चवीनुसार मीठ
• आवश्यकतेनुसार पाणी
• साचा तयार करण्यासाठी थोडे तेल

कृती

• तांदूळ स्वच्छ धुऊन साधारण ४ ते ५ तास पाण्यात भिजत ठेवा. उडदाची डाळ आणि मेथीदाणे वेगळे धुऊन त्याचप्रमाणे भिजवून घ्या.
• वाटण्याच्या काही मिनिटे आधी पोहे थोड्या पाण्यात भिजवून मऊ करून घ्या. यामुळे इडलीचा पोत अधिक मऊ होण्यास मदत होते.
• भिजवलेली उडदाची डाळ मऊ आणि हलकी होईपर्यंत वाटून घ्या. त्यानंतर तांदूळ आणि पोहे वाटून घ्या. दोन्ही मिश्रणे एकत्र करून आवश्यकतेनुसार पाणी घाला. पीठ ना फार घट्ट ना फार पातळ असे मध्यम घट्ट ठेवा.
• पीठात चवीनुसार मीठ घालून व्यवस्थित मिसळा. भांडे झाकून उबदार ठिकाणी साधारण ८ ते १२ तास आंबण्यासाठी ठेवा.
• हवामानानुसार आंबण्यास कमी-जास्त वेळ लागू शकतो.
• थट्टे इडलीच्या गोल प्लेटसारख्या साच्याला हलके तेल लावून घ्या. साचा उपलब्ध नसल्यास वाफवण्यासाठी योग्य आकाराच्या छोट्या स्टीलच्या प्लेट्सचाही वापर करता येतो.
• आंबलेले पीठ हलक्या हाताने मिसळा. तयार साच्यात पीठ ओता आणि वाफवणाऱ्या भांड्यात ठेवा. झाकण लावून मध्यम आचेवर साधारण १० ते १५ मिनिटे वाफवून घ्या.
• इडली शिजल्यानंतर गॅस बंद करा आणि काही मिनिटे थंड होऊ द्या. चमच्याच्या किंवा सपाट सुरीच्या मदतीने इडली साच्यातून अलगद काढा. गरमागरम थट्टे इडली नारळाची चटणी आणि सांबारसोबत सर्व्ह करा.

Food Recipe: रोजच्या डब्यासाठी नेहमीच काय बनवावं सुचत नाही ? मग नक्की ट्राय करा चटपटीत पनीर भुर्जी टोस्ट

मऊ थट्टे इडलीसाठी महत्त्वाच्या टिप्स

उडदाची डाळ चांगली भिजवून ती भरपूर हलकी होईपर्यंत वाटणे महत्त्वाचे आहे. पीठ आंबवताना भांडे पूर्ण भरू नये, कारण आंबल्यानंतर पीठाचा आकार वाढतो. इडली वाफवताना सुरुवातीपासून खूप मोठी  आच ठेवण्याऐवजी मध्यम आचेवर वाफवणे चांगले. इडली जास्त वेळ वाफवल्यास ती कोरडी होऊ शकते. वाफवल्यानंतर इडली काही मिनिटे स्थिर होऊ दिल्यास साच्यातून काढणे सोपे जाते.