Recipe : हिवाळ्यातील पौष्टिक भाज्यांची मजा लुटा, घरी बनवा मसालेदार अन् चमचमीत ‘व्हेज कोल्हापुरी’

Veg Kolhapuri Recipe : हिवाळ्याच्या दिवसांत बाजारात भरपूर भाज्या विक्रीसाठी येतात. या सिजनल भाज्या आपल्या आरोग्यासाठी फार फायद्याच्या ठरतात अशात तुम्ही यापासून चविष्ट असा महाराष्ट्रीयन पारंपरिक पदार्थ तयार करू शकता.

•  भरपूर भाज्या वापरून व्हेज कोल्हापुरी ही डिश तयार केली जाते
• हिवाळ्यात बाजारात भरपूर भाज्या येतात, ज्यामुळे या काळात व्हेज कोल्हापुरी बनवणं चांगला पर्याय ठरेल
• याची चव फार झणझणीत आणि स्वादिष्ट लागते

कोल्हापूर या महाराष्ट्रातील ऐतिहासिक शहराचं नाव ऐकलं की तिखट-मसालेदार पदार्थांची आठवण लगेच येते. कोल्हापुरी मिसळ, पंढरीची रसोई आणि मसालेदार झणझणीत पदार्थांचा खास अंदाज जगभरात प्रसिद्ध आहे. या चवीचा अनुभव देणारा एक अतिशय प्रसिद्ध पदार्थ म्हणजे व्हेज कोल्हापुरी. हा एक अस्सल मराठमोळा चवदार डिश आहे, ज्यात विविध भाज्या, तिखट मसाले आणि नारळ-खोबऱ्याचा खमंग सुगंध एकत्र येतो. रोटी, भाकरी, नान किंवा जिरा राईससोबत ही डिश अप्रतिम लागते. हॉटेलमध्ये मिळणाऱ्या व्हेज कोल्हापुरीची चव आपण घरच्या घरी अगदी सहज तयार करू शकतो. चला तर पाहूया ही स्वादिष्ट आणि झणझणीत व्हेज कोल्हापुरी रेसिपी.

दिवसाची सुरुवात होईल उत्साहाने! सकाळच्या नाश्त्यासाठी १० मिनिटांमध्ये बनवा पौष्टिक रव्याचा चिल्ला

साहित्य

भाज्यांसाठी:

• गाजर – १ (चिरलेलं)
• बटाटा – १ (क्युबमध्ये कापलेला)
• फुलकोबी – १ कप (तुकडे केलेले)
• शेंगा – ७ ते ८ (कापलेल्या)
• मटार – अर्धा कप
• कांदा – १ मोठा (चिरलेला)
• टोमॅटो – २ मध्यम (चिरलेले)
• आले-लसूण पेस्ट – १ टीस्पून
• तेल – ३ टेबलस्पून
• मीठ – चवीनुसार
• कोथिंबीर – सजावटीसाठी

कोल्हापुरी मसाला तयार करण्यासाठी:

• सुके खोबरे (किसलेले) – २ टेबलस्पून
• खसखस – १ टीस्पून
• काजू – ५ ते ६
• धने – १ टेबलस्पून
• जिरे – १ टीस्पून
• बडीशेप – १ टीस्पून
• लवंगा – २
• दालचिनी – १ छोटा तुकडा
• काळी मिरी – ५ ते ६ दाणे
• सुके लाल मिरचे – ४ ते ५
• हळद – अर्धा टीस्पून

नागपूरची फेमस ‘सांबरवडी’ खाल्ली आहे का? नाही तर मग या पारंपरिक पदार्थाची घरीच तयार करा मेजवानी

कृती

• यासाठी सर्व भाज्या स्वच्छ धुवून घ्या आणि थोडं मीठ व पाण्यात उकळून घ्या, म्हणजे त्या अर्धवट शिजतील.
• एका पॅनमध्ये थोडंसं तेल गरम करा आणि त्यात धने, जिरे, बडीशेप, लवंग, दालचिनी, काळी मिरी, लाल मिरच्या, खोबरे आणि खसखस घाला.
• हे सर्व मसाले मंद आचेवर भाजा जोपर्यंत त्यांचा खमंग वास येत नाही.
• भाजलेले मसाले थंड झाल्यावर मिक्सरमध्ये टाका. त्यात काजू आणि थोडं पाणी घालून बारीक वाटून घ्या. हा आपला कोल्हापुरी मसाला तयार आहे.
• एका खोल कढईत तेल गरम करा. त्यात आले-लसूण पेस्ट आणि चिरलेला कांदा घालून परतवा. कांदा हलका सोनेरी झाला की टोमॅटो घाला आणि नरम होईपर्यंत शिजवा.
• आता त्यात तयार केलेला मसाला घाला आणि ५ मिनिटे मंद आचेवर परतवा. मसाला नीट परतल्यावर त्यात थोडं पाणी घालून घट्ट ग्रेवी तयार करा.
• उकडलेल्या भाज्या या ग्रेवीत घाला, मीठ टाका आणि ७ ते ८ मिनिटे मंद आचेवर शिजू द्या. वरून कोथिंबीर टाकून गॅस बंद करा.
• गरमागरम व्हेज कोल्हापुरी बटर नान, तंदुरी रोटी किंवा जिरा राईससोबत सर्व्ह करा. याची तिखट-मसालेदार आणि सुगंधी चव प्रत्येक घासाला महाराष्ट्राची आठवण करून देते.