Winter Recipe : हिवाळ्याच्या गारव्यापासून शरीराला सुरक्षित करा, घरी बनवा स्वादिष्ट आणि गरमा गरम ‘चिकन सूप’

Chicken Soup Recipe : थंडीच्या वातावरणात आपल्या शरीराला ऊब हवी असते, ज्यासाठी चिकन सूप एक चांगला पर्याय आहे. तुम्ही घरी देखील याला तयार करू शकता. जाणून घेऊया एक सोपी रेसिपी.

• थंडीच्या वातावरणासाठी परफेक्ट रेसिपी
• चिकन सूपची एक सोपी आणि चविष्ट रेसिपी
• चिकन सूप सर्दी, खोकला आणि इतर आजारांवर एक प्रभावी घरगुती उपाय ठरतो

चिकन सूप म्हणजे फक्त एक पदार्थ नाही तो अनेक घरांमध्ये आरोग्य, ऊब आणि काळजी यांचा प्रतिक आहे. थंड हवामानात शरीराला उब देण्यासाठी, सर्दी-खोकला आल्यावर घशाला आराम देण्यासाठी किंवा फक्त एखाद्या संध्याकाळी हलकं, पोट भरणारं काहीतरी हवं असेल तेव्हा चिकन सूपची आठवण हमखास येते.

हिवाळ्यात रोगप्रतिकारशक्ती वाढवण्यासाठी नियमित प्या गरमागरम सूप, हाडांचे आरोग्य सुधारून कायमच राहाल ठणठणीत

आपल्या भारतीय घरांमध्ये सूपची परंपरा अगदी काही वर्षांपूर्वी आली असली तरी, हलकंसं चिकन सूप हे आपल्या रोजच्या स्वयंपाकात सहज मिसळलं आहे. त्यातल्या हलक्या मसाल्यांचा सुवास, उकळत्या पाण्यात मोकळं होत जाणारं चिकनचं रसाळ सार आणि त्यातून तयार होणारा नैसर्गिक ब्रोथ हा आरोग्यासाठी अतिशय उपयुक्त ठरतो. अनेक डॉक्टरदेखील आजारी अवस्थेत जड अन्नापेक्षा चिकन सूपसारखं नाजूक, पचनास सोपं काहीतरी घेण्याचा सल्ला देतात.

चिकन सूपची गंमत म्हणजे ते घराघरानुसार बदलतं. कुणाच्या सूपमध्ये काळीमिरीची उष्णता असते, कुणी त्यात आले-लसूणाचा तडका देतो, तर कुणी पाश्चात्य पद्धतीने गाजर-सेलेरी टाकून स्वाद वाढवतो. पण तत्त्व एकच हे सूप शरीराला आराम देतं, मनाला शांत करतं आणि घरगुती उब देतं. चला जाणून घेऊया यासाठी लागणारे साहित्य आणि कृती.

 साहित्य

• चिकन (हाडांसह) – 250 ग्रॅम
• पाणी – 4 कप
• कांदा – 1 छोटा (चिरलेला)
• टोमॅटो – 1 (चिरलेला)
• गाजर – 1 छोटं (चिरलेलं)
• आले – 1 इंच तुकडा (कुटलेला)
• लसूण – 3-4 पाकळ्या (कुटलेल्या)
• काळी मिरी – ½ टीस्पून
• हळद – ¼ टीस्पून
• मीठ – चवीनुसार
• बारीक चिरलेली कोथिंबीर – 1 टेबलस्पून
• तूप / तेल – 1 टीस्पून

रक्ताची कमतरता बिट भरून काढेल… घरी बनवा गुलाबी बीटाची चपाती; दिसायला आकर्षित अन् चवीला मजेदार

कृती

• यासाठी सर्वप्रथम भांड्यात तूप किंवा तेल गरम करून त्यात कांदा, आले आणि लसूण घाला. ते सोनेरी आणि सुगंधी होईपर्यंत परतून घ्या.
• आता त्यात टोमॅटो आणि गाजर घालून 2–3 मिनिटे परता. हे सूपला गोडवा आणि रंग देते.
• हाडांसह चिकन घालून 3–4 मिनिटे परता. चिकन थोडं पांढरट होत जाईल.
• हळद, काळी मिरी आणि मीठ घालून चांगलं हलवा.
• पाणी घालून भांडे झाकून 20–25 मिनिटे मध्यम आचेवर उकळू द्या. चिकनमधला रस (स्टॉक) पाण्यात मिसळून सूपला अप्रतिम चव येईल.
• शिजल्यावर चिकनचे तुकडे बाहेर काढून हाडं वेगळी करा आणि मांस बारीक करून पुन्हा सूपमध्ये मिसळा.
• शेवटी कोथिंबीर घालून एक चांगली उकळी द्या. गरमागरम सूप तयार