Recipe : पिझ्झाची मजा लुटा कोणत्याही गिल्टशिवाय… घरी बनवा ‘ग्लूटन फ्री पिझ्झा’, सर्वांच्या आवडीची रेसिपी

Glutan Free Pizza Recipe : हा ग्लुटन-फ्री पिझ्झा चविष्ट तर आहेच, पण आरोग्यासाठीही उत्तम पर्याय आहे. या रेसिपीने आता डाएटची चिंता न करता मनसोक्त पिझ्झाचा आनंद घ्या! 

• पिझ्झा लव्हर्ससाठी आजची रेसिपी खास ठरणार आहे.
• पिझ्झा खायला आवडतो पण त्यातील मैदा आपल्या आरोग्यासाठी चांगला नाही.
• अशावेळी घरी बनवा टेस्टी ग्लुटन फ्री पिझ्झा.

आजकाल अनेक जण आरोग्याची विशेष काळजी घेत आहेत. काहींना गहू किंवा मैद्यामधील ग्लुटन पचत नाही, तर काहीजण वजन नियंत्रणासाठी किंवा हेल्दी लाईफस्टाईलसाठी ग्लुटन-फ्री आहार निवडतात. अशा वेळी पिझ्झा खायची इच्छा झाली तर काय करायचं? काळजी करू नका! ग्लुटन-फ्री पिझ्झा हा चविष्ट, हलका आणि पचायला सोपा पर्याय आहे.

खुसखुशीत आणि चविष्ट पनीर नगेट्स! घरच्या घरी बनवा परफेक्ट स्नॅक, नोट करून घ्या रेसिपी

हा पिझ्झा आपण तांदळाचं पीठ, ज्वारीचं पीठ किंवा बाजरीचं पीठ वापरून सहज बनवू शकतो. बाहेर मिळणाऱ्या पिझ्झापेक्षा हा घरचा पिझ्झा अधिक पौष्टिक आणि सुरक्षित असतो. मुलांपासून मोठ्यांपर्यंत सगळ्यांनाच आवडेल अशी ही रेसिपी आहे. त्यामुळे आता जेव्हा लहान मुलं तुमच्याकडे पिझ्झा खाण्याचा हट्ट करतील तेव्हा लगेच त्यांना हा टेस्टी गुल्टन फ्री पिझ्झा घरीच बनवून खायला घाला.

साहित्य:

बेससाठी:

• 1 कप तांदळाचं पीठ
• ½ कप ज्वारीचं पीठ
• 1 टेबलस्पून कॉर्नफ्लोअर
• 1 टीस्पून ड्राय यीस्ट
• 1 टीस्पून साखर
• ½ टीस्पून मीठ
• 1 टेबलस्पून ऑलिव्ह ऑईल
• कोमट पाणी (पीठ मळण्यासाठी)

टॉपिंगसाठी:

• ½ कप पिझ्झा सॉस
• 1 कप किसलेलं मोझरेला चीज
• कांदा, ढोबळी मिरची, टोमॅटो, कॉर्न (चिरलेले)
• ओरेगॅनो आणि चिली फ्लेक्स

गरमागरम वरण भातासोबत खा चविष्ट भरलेली हिरवी मिरची, झणझणीत पदार्थाने वाढेल जिभेची चव

कृती:

• सर्वप्रथम  एका भांड्यात कोमट पाण्यात साखर आणि ड्राय यीस्ट घाला. 5–10 मिनिटे झाकून ठेवा. फेस आला की यीस्ट तयार आहे.
• मोठ्या भांड्यात तांदळाचं पीठ, ज्वारीचं पीठ, कॉर्नफ्लोअर आणि मीठ एकत्र करा. त्यात यीस्ट मिश्रण आणि ऑलिव्ह ऑईल घालून मऊसर पीठ मळा.
• पीठ झाकून 1 तास उबदार ठिकाणी ठेवा. पीठ थोडंसं फुगेल.
• बटर पेपरवर थोडं तेल लावून पीठ हाताने थापून पिझ्झाचा गोल आकार द्या. काट्याने हलके छिद्र पाडा.
• ओव्हन 180°C वर प्रीहीट करा. बेस 8–10 मिनिटे अर्धवट भाजून घ्या.
• बेसवर पिझ्झा सॉस पसरवा. त्यावर चीज आणि आवडीच्या भाज्या घाला.
• पुन्हा 10–12 मिनिटे बेक करा, जोपर्यंत चीज वितळून हलके सोनेरी होत नाही.
• गरमागरम पिझ्झावर ओरेगॅनो आणि चिली फ्लेक्स भुरभुरा आणि लगेच सर्व्ह करा.